Read Nguna Togoa Etafe North YOANE 12 Bible Online

YOANE 12 - Nguna Togoa Etafe North bible

YOANE 12

¹Nalakena tea wanogoe naaleatia latesa pea ki navakalauana Yesu e umai paki Bethania, tokora waina Lasaro e doko asa, waina Yesu e sike a e duleana m̃elu dua ki tea mate maga.

²Nalakena tea wanogoe eu maneana mari nakaniana ni ragi melu tokora wanogoe: go Martha e suasua; ma Lasaro e pei sikai ni tea maga waina eu kere one ganikani sikoti a.

³Nalakena tea wanogoe Maria e dape paund sikai ni naroro lolo ni nardo lomau ni naulu laapa, po puvurai ki nam̃ele ni Yesu asa, po kasi nam̃elena maga ki naloluna: go nasum̃a e pura ki nap̃o ni naroro lolo wanogoe.

⁴Ma Yuda Iskariote, tea vasapiseikiana aneana maga sikai, waina e naga ega vitua ki nia,

⁵e naga, Ekasana naroro lolo waia e da pei tea soriana raki denario p̃onotia dolu, po pei tea vituakiana paki tea tika maga?

⁶E noa tea wanogoe, ma e da noa e nalakena e midoa ki parati ki tea tika maga mau, ma nalakena e pei tea vanako sikai, po dape nala ni m̃ane, po dape lua tea maga waina e pei tea nadikiana paki asa.

⁷Nalakena tea wanogoe Yesu e naga, P̃a toro e, naga ega mauti a raki naaleatia ni naova‐kinauana.

⁸Nalakena ku peani tea tika maga eu sikoti mu sara ragi; ma ku da peani au sara ragi mau.

⁹Nalakena tea wanogoe taua warua ni navarapule maga ni Yudea eu atae naga e doko tokora wanogoe: go eu rumai, eu da umai nalakena Yesu sikina mau, ma eu rumai naga euga vunusi ra ma Lasaro, waina e sike a e duleana m̃elu dua ki tea mate maga.

¹⁰Ma tea viri warua maga eu midoaki nia naga euga mari punue ra ma Lasaro;

¹¹nalakena navarapule maga ni Yudea tea laapa kakada eu pano nalakena nae, po saralomau Yesu.

¹²Matamai ki nia taua warua sikai ni naatam̃oli maga waina eu rumai paki nasaisaiana, ragi waina eu dogo naga Yesu e do umai paki Yerusalem,

¹³eu puati naulu ni paama maga po dave pano naga euga sua e, go eu pioso, eu naga, Hosanna: tea waina e umai pae nagisa ni Yehovah e pei tea vasap̃iakiana, Nawota ki Israel.

¹⁴Go Yesu, ragi waina e pap̃ai ass tureai sikai, e sakesaake asa;

¹⁵dapala waina e pei tea midiriana, e naga, P̃a ta mataku mau, Sion natuna nagoroi: p̃a leo, Nawota anigo e do umai, e sakesaake ass natuna sikai.

¹⁶Tea vasapiseikiana aneana maga eu da midoakiatae tea maga wanogoe ragi vea mau: ma ragi waina Yesu e pei tea samasamaniana sua, ragi wanogoe eu midoaki nia naga tea maga wanogoe eu pei tea midiriana nalo kakana, go naga eu mari tea maga wanogoe paki nia.

¹⁷Nalakena tea wanogoe taua ni naatam̃oli maga waina eu sikoti a doko ragi waina e soso Lasaro e dave m̃elu dua ki matigo, po sike a e duleana m̃elu dua ki tea mate, eu noa sokisoki.

¹⁸Go nalakena tea wanogoe taua ni naatam̃oli maga eu pa sua e, nalakena eu dogo naga e mari navaivaiana wanogoe.

¹⁹Nalakena tea wanogoe Farisi maga eu dum̃ada noa ki da, eu naga, Kuga leopunusi naga ku da mari matua te navatuna mau: kuga leo, maramana e dausi a pano.

²⁰Go tea maga waina eu sake pano naga euga lotu nasaisaiana wanogoe seara kakada eu pei tea ni Hellas:

²¹nalakena tea wanogoe nara eu rumai punusi Filipo, waina e pei tea ni Bethsaida ni Calilea, po pavarani a, eu naga, Nawota, au masauna naga auga vunusi Yesu.

²²Filipo e umai po noa ki Anderea asa: Anderea e umai, go Filipo, go ero noa ki Yesu asa.

²³Go Yesu e pasa dara ra, e naga, Aura e po umai waina Naatam̃oli Natuna ega vei tea samasamaniana asa.

²⁴Lomau, lomau, a noa ki mu, naga Napati ni whiit sikai e pe ta dowo paki natano po da mate mau, e pe sikina doko; ma e pe mate, e pe tau p̃arua ki nawana.

²⁵Tea waina e dodomi namauriana aneana e dape puoli ki nia; go tea waina e pilosi namauriana aneana maramana waia, ega wo pavaigoro e pa pa paki namauriana waina e du mau du.

²⁶Te naata sikai e pe maginau suasua, ega rausi au; go tokora waina kinau a doko asa, tokora wanogoe tea suasua aginau ma ega wo doko asa: te naata sikai e pe maginau suasua, Tamagu e pe wo dodomadagani a.

²⁷Ragi waia naatagu e dogo kite sa; go aga noa nasava? Mama, p̃a mauti au ki aura waia. Ma nalakena tea waia a umai paki aura waia.

²⁸Mama, p̃a samasamani nagisam̃a. Nalakena tea wanogoe nadaleo sikai e pae nakoroatelagi umai, e naga, A samasamani sua e, go aga wo moro samasamani a.

²⁹Nalakena tea wanogoe taua ni naatam̃oli maga, waina eu lawodu, po dogo e, eu noa naga tovae e kati: tea p̃ota seara eu naga, Agelo sikai e po pasa ki nia.

³⁰Yesu e pasa dara po naga, Nadaleo waia e da umai nalakena kinau mau, ma e umai nalakena nimu.

³¹Ragi waia e pei ragi ni navasap̃otaeana ni maramana waia: ragi waia tea maraki ni maramana waia ega wo pei tea nadikiana paki etaku.

³²Go kinau a pe vei tea sikeana pakilagi m̃elu dua ki natano, a pe wo puati naatam̃oli maga mamau puti eu pe umai punusi au.

³³Ma e noa tea wanogoe, e paivai ki namateana waina ega wo mate asa.

³⁴Nalakena tea wanogoe taua ni naatam̃oli maga eu pasa dara e, eu naga, Kinami au dogo m̃elu nawotaeana naga Kristo e doko pa pa ega tu mau du: go ekasana nigo ku noa, naga E one naatam̃oli Natuna one naga ega vei tea sikeana pakilagi. Naatam̃oli Natuna wanogoe e pei sei?

³⁵Nalakena tea wanogoe Yesu e noa ki da, e naga, Ragi kiki namarama e ko doko m̃aleoputo kakamu. Kuga surata ragi waina ku peani namarama, naga namaligo ega ta pa paratiki mu mau: go tea waina e surata namaligo e da atae tokora waina e paki asa pano mau.

³⁶Ragi waina ku peani namarama, kuga saralomau namarama, naga kuga vei namarama natuna maga. Yesu e pasa tea maga wanogoe, go e pano po dum̃ana dasuru ki nia paki da.

³⁷E mari sua navaivaiana laapa sa naraeda, ma eu da saralomau asa mau:

³⁸naga navasaana ki profeta Isaiah ega lolomana, waina e noa e, e naga, Nawota, sei e saralomau narogorogoana aginami? Go naru ni Yehovah e pei tea mariana e doko lina paki sei?

³⁹Nalakena tea wanogoe eu da mari atae saralomau mau, nalakena Isaiah e moro noa, naga

⁴⁰E mari namatada eu kesa, go e mari nap̃op̃oda e kasua; Naga euga ta leosai ki namatada mau, po da midoaki atae ki nap̃op̃oda mau, Po da maradoa mau, Go naga aga ta mari pauri ra mau.

⁴¹Isaiah e noa tea maga wanogoe, nalakena e punusi nasamasamaana aneana; go e pasa nalo kakana.

⁴²Ma tea maraki maga ma tea laapa kakada eu saralomau asa; ma nalakena Farisi maga eu da noasai a mau, naga euga ta pei tea mariana euga toko etaku ni nasum̃a ni nasaisaiana mau:

⁴³nalakena eu dodomi nasamasamaana ki naatam̃oli maga p̃arua liu nasamasamaana ki Sup̃e.

⁴⁴Go Yesu e pioso po naga, Tea waina e saralomau au, e da saralomau au mau, ma e saralomau tea waina e dip̃aki lua au umai.

⁴⁵Go tea waina e leopunusi au, e leopunusi tea waina e dip̃aki lua au umai.

⁴⁶Kinau namarama sikai a umai paki maramana, naga sara naata waina eu saralomau au euga ta doko namaligo mau.

⁴⁷Go te naata sikai e pe rogo nanoaana aginau maga, po da pavaigoro ra mau, kinau a pe ta pasa p̃otae a mau: nalakena a da umai naga aga vasa p̃otae maramana mau, ma a umai naga aga mauti pauri maramana.

⁴⁸Tea waina e dip̃adoa au po da dape nanoaana aginau maga mau, e peani tea waina e do pasa p̃otae a: navasaana waina a pasa sua e, tea wanogoe ega wo pasa p̃otae a naaleatia edaku mau.

⁴⁹Nalakena kinau a da dum̃agu pasa mau; ma Tamagu waina e dip̃aki lua au, nae e dua au natip̃akiana sikai, tea waina aga noa e, go tea waina aga vasa asa.

⁵⁰Go a atae naga natip̃akiana aneana e pei namauriana waina e du mau du. Nalakena tea wanogoe tea maga waina kinau a do pasa asa, a do pasa asa dapala waina Tamagu e noa ki nau asa.