Read Nguna Togoa Etafe North YOANE 13 Bible Online

YOANE 13 - Nguna Togoa Etafe North bible

YOANE 13

¹Go pea ki nasaisaiana ni navakalauana, Yesu e atae naga aura aneana e po umai waina ega m̃elu dua ki maramana waia asa, po pa punusi Tamana, e dodomi tea aneana maga waina eu doko maramana, e dodomi ra pa pa paki ragi edaku mau.

²Go ragi waina eu do ganikani nakaniana ni ragi melu, diabolo e nadi ki sua paki nap̃op̃o ni Yuda Iskariote, natu ni Simon,

³naga ega vitua ki nia, Yesu, waina e atae naga Tamana e dua sua e naleo maga mamau puti paki nam̃elearuna maga, go naga e m̃elu Sup̃e dave umai, go naga ega vano punusi Sup̃e,

⁴e duleana pa dua ki nakaniana, po doropusi sugoro aneana maga eu doko; go e dape tauel sikai, po dum̃ana dasoki a asa.

⁵E edaku da ki noai paki tea vavano, po atulake naga ega sarue nam̃ele ni tea vasapiseikiana maga, go naga ega kasi ra ki tauel waina e pei tea tasokiana asa.

⁶Nalakena tea wanogoe e umai punusi Simon Petero. Nae e noa ki nia, e naga, Nawota, nigo ku naga p̃a sarue nam̃elegu maga kite?

⁷Yesu e pasa dara po noa ki nia, e naga, Tea waina kinau a mari a, nigo ku da atae a mau ragi waia; ma p̃a wo midoaki atae a edaku ki tea waia.

⁸Petero e noa ki nia, e naga, P̃a wo da sarue nam̃elegu maga mau pa pa ega tu mau du. Yesu e pasa dara e, e naga, A pe ta sarue ko mau, ku pe ta peani te matele sikai sikoti au mau.

⁹Simon Petero e noa ki nia, e naga, Nawota, nam̃elegu maga eroga ta sikida mau, ma nam̃elearugu maga go nap̃augu euga mamau.

¹⁰Yesu e noa ki nia, e naga, Tea waina e loloso sua e pe sarue nam̃elena maga sikida, e pe tautau usuraki: go nimu ku dautau, ma ku da mamau puti dautau mau.

¹¹Nalakena e atae tea waina e naga ega vitua ki nia; nalakena tea wanogoe e naga, Ku da mamau puti dautau mau.

¹²Go ragi waina e sarue sua nam̃eleda maga, po dape sugoro aneana maga, po moro kere one, e noa ki da, e naga, Ku atae tea waina a po manimu mari a kite?

¹³Nimu ku soso au ki Tea Vasapiseiki, go ki Nawota: go ku noa p̃ia; nalakena a pei tea wanogoe.

¹⁴Ma kinau, Nawota go Tea Vasapiseiki, a pe sarue nam̃elemu maga, e pe one mu one naga nimu ma kuga tum̃amu manimu sarue nam̃elemu maga.

¹⁵Nalakena a po dua mu naviseikiana sikai, naga nimu ma kuga mari ega tapala waina kinau a po manimu mari a.

¹⁶Lomau, lomau, a noa ki mu, naga, Tea suasua sikai e da dap̃au nawota aneana mau: go tea tip̃akiluaana sikai e da dap̃au tea waina e dip̃aki lua e mau.

¹⁷Ku pe atae tea maga wanogoe, go ku pe mari ra, ku pe maropa.

¹⁸A da noa e nalo ni nimu mamau puti mau: kinau a atae tea maga waina a matadoa ra: ma naga navasaana midiriana ega lolomana, waina e naga, Tea waina e gani navinaga aginau e sike nam̃ago ni nam̃elena kup̃e au.

¹⁹Pae ragi waia pa pa a noa ki mu asa pea ki ega vakilina, naga, ragi waina ega wo pakilina, kuga saralomau naga kinau a pei nae.

²⁰Lomau, lomau, a noa ki mu, naga Tea waina e piragi naata waina a pe wo dip̃aki luae epiragi au; go tea waina e piragi au e piragi tea waina e dip̃aki lua au umai.

²¹Ragi waina Yesu e noa sua tea wanogoe e dogo kite sa pae naatana, po noa sokisoki, po naga, Lomau, lomau, a noa ki mu, naga sikai kakamu ega wo pitua ki nau.

²²Tea vasapiseikiana maga eu dum̃ada leopunusi ra, eu midoaki putuaki nalo ni naata waina e noa e.

²³Tea vasapiseikiana aneana maga sikai kakada, waina Yesu e dodomi a, e ovi narum̃a ni Yesu.

²⁴Nalakena tea wanogoe Simon Petero e ligivasu paki nia, po noa ki nia, e naga, P̃a noa naata waina e noa e nalo kakana e pei sei?

²⁵Nae waina e ovi one dapala nogoe narum̃a ni Yesu, e noa ki nia, e naga, Nawota, e pe sei?

²⁶Nalakena tea wanogoe Yesu e pasadara, e naga, Tea waina kinau aga wo maneana pupugi matele po dua e asa, e pei nae. Go ragi waina e pupugi sua matele, e dape a po dua Yuda asa, natu ni Simon Iskariote.

²⁷Go edaku ki matele, ragi wanogoe Satan e sili paki asa. Nalakena tea wanogoe Yesu e noa ki nia, e naga, Tea waina ku naga p̃a mari a, p̃a mari a m̃araverave.

²⁸Ma tea maga waina eu kere one ganikani sikai kakada e da atae tea waina e pei nalakena e noa ki nia tea wanogoe mau.

²⁹Nalakena te seara eu midoaki nia, nalakena Yuda e dape nala ni m̃ane, naga Yesu e noa ki nia, naga P̃a vakotovi naleo maga waina tu dika ara go waina e p̃ia naga tuga veani ra ragi ni nasaisaiana; kite naga ega tua tea tika maga te navatuna.

³⁰Nalakena tea wanogoe ragi waina nae e dape sua matele e dave pano m̃araverave: go e pei p̃ogi.

³¹Nalakena tea wanogoe ragi waina e dave sua pano, Yesu e naga, Ragi waia naatam̃oli Natuna e pei tea samasamaniana, go Sup̃e e pei tea samasamaniana asa;

³²go Sup̃e ega wo samasamani a ega sikoti a, go ega wo samasamani a m̃araverave.

³³Piakirikiri ragi kiki aga ko sikoti mu doko. Kuga wo laaga au: go dapala waina a noa ki navarapule maga ni Yudea, naga, Tokora waina kinau aga vaki asa, nimu ku da mari atae umai paki asa mau; a moro noa ki mu asa ragi waia.

³⁴Natip̃akiana vau a dua mu asa, naga kuga tum̃amu dodomi mu; dapala waina a dodomi mu, naga nimu ma kuga tum̃amu dodomi mu.

³⁵Ku pe veani nadodomiana dum̃amu paki mu, naatam̃oli maga mamau puti eu pe wo atae pae tea wanogoe naga ku pei tea vasapiseikiana aginau maga.

³⁶Simon Petero e noa ki nia, e naga, Nawota, ku naga p̃a vaki esava? Yesu e pasa dara, e naga, Tokora waina aga vaki asa pano, ku da mari atae dausi au paki asa ragi waia mau, ma p̃a wo dausi au ragi edaku.

³⁷Petero e noa ki nia, e naga, Nawota, ekasana a da mari atae dausi ko ragi waia mau? Aga wo manigo doropusi namauriana aginau ega madoko.

³⁸Yesu e pasa dara, e naga, P̃a wo maginau doropusi namauriana anigo ega madoko kite? Lomau, lomau, a noa ki‐go, naga Toa ega wo da dare mau pa pa p̃a wo paka tolu pasa goro au.