Read Nguna Togoa Etafe North YOANE 14 Bible Online

YOANE 14 - Nguna Togoa Etafe North bible

YOANE 14

¹Nap̃op̃omu ega ta dogo kite sa mau: kuga saralomau Sup̃e, go kuga saralomau au.

²Nasum̃a ki Tamagu nasum̃atokoana laapa eu doko asa; e pe tika, a pe noa ki mu asa; nalakena a naga aga vano naga aga manimu mari m̃ata ki tokora sikai.

³Go a pe vano po manimu mari m̃ata ki tokora sikai, a pe moro umai, go aga wo piragi lua mu umai punusi au; naga tokora waina kinau a doko asa, nimu ma kuga toko asa.

⁴Go tokora waina kinau a naga aga vaki asa pano, ku atae napua.

⁵Toma e noa ki nia, e naga, Nawota, au da atae tokora waina ku naga p̃a vaki asa pano mau, go au atae napua dapale sava?

⁶Yesu e noa ki nia, e naga, Kinau a pei napua, go nalomauana, go namauriana: te naata e pe ta pae au mau, e pe ta umai punusi Tamagu mau.

⁷Ku pe atae au, ku pe atae gami ma Tamagu: go pae ragi waia pa pa ku atae a, go ku po punusi a.

⁸Filipo e noa ki nia, e naga, Nawota, p̃a visei ki gami Tamam̃a, go ega vei tea lapa.

⁹Yesu e noa ki nia, e naga, A sikoti mu doko ragi varau pa, go ku da atae au mau, Filipo, kite? Tea waina e punusi au e punusi Tamagu; ekasana ku naga, P̃a viseiki gami Tamam̃a?

¹⁰Ku da saralomau mau naga kinau a doko Tamagu, go Tamagu e doko au? Navasaana maga waina kinau a noa ki mu ara a da dum̃agu pasa ara mau: ma Tamagu waina e doko au doko e do mari nawosiana aneana maga.

¹¹Kuga saralomau navasaana aginau naga a doko Tamagu, go Tamagu e doko au: ma ku pe ta saralomau navasaana aginau mau, kuga saralomau asa nalakena nawosiana maga.

¹²Lomau, lomau, a noa ki mu, naga Tea waina e saralomau au, nawosiana maga waina kinau a do mari a nae ma ega wo mari a; go ega wo mari nawosiana maga waina eu p̃arua liu tea maga waia; nalakena kinau aga vano punusi Tamagu.

¹³Go tea waina ku pe wo datago asa pae nagisagu, tea wanogoe aga wo mari a, naga Tamagu ega vei tea samasamaniana Natuna.

¹⁴Ku pe tatago te navatuna pae nagisagu, kinau a pe wo mari a.

¹⁵Ku pe dodomi au, ku pe wo dogo parati ki natip̃akiana aginau maga.

¹⁶Go kinau aga wo pavarani Tamagu, go ega wo dua mu Tea Vasapakavakale p̃ota sikai, naga ega sikoti mu doko pa pa ega tu mau du,

¹⁷Naatana ni nalomauana: waina maramana e da mari atae dape a mau; nalakena e da leo punusi a mau, go e da atae a mau: nimu ku atae a; nalakena e doko sikoti mu doko, go ega wo doko nap̃alau mu.

¹⁸Aga wo da doropusi mu naga kuga vei namatapesu maga mau: aga wo umai punusi mu.

¹⁹Ragi kiki e ko doko, go maramana ega wo da moro leopunusi au mau; ma nimu kuga wo leopunusi au: nalakena kinau a mauri doko, nimu ma kuga wo mauri doko.

²⁰Naaleatia wanogoe nimu kuga wo atae naga kinau a doko Tamagu, go nimu ku doko au, go kinau a doko mu.

²¹Tea waina e peani natip̃akiana aginau maga, po do dogo paratiki da, nae e pei tea waina e dodomi au: go tea waina e dodomi au ega wo pei tea dodomiana pae Tamagu, go kinau aga wo dodomi a, po dum̃agu pisei ki nia au.

²²Yuda (e da pei Iskariote mau) e noa ki nia, e naga, Nawota, e dapale sava p̃a wo dum̃am̃a pisei ki gami ako, go p̃a wo da dum̃am̃a pisei ki maramana ako mau?

²³Yesu e pasa dara po noa ki nia, e naga, Te naata sikai e pe dodomi au, e pe wo dogo paratiki navasaana aginau: go Tamagu e pe wo dodomi a, go aro pe wo umai punusi a, po mari nasum̃atokoana aginami e pe wo sikoti a.

²⁴Tea waina e da dodomi au mau e da dogo parati ki navasaana aginau maga mau: go navasaana waina ku dogoe eda pei tea aginau mau, ma e pei tea ki Tamagu waina e dip̃aki lua au umai.

²⁵A pasa ki mu tea maga wanogoe ragi waina a doko sikoti mu doko.

²⁶Ma Tea Vasapakavakale, Naatana Tapu, waina Tamagu ega wo dip̃aki lua e umai pae nagisagu, nae ega wo pasa piseiki mu naleo maga mamau puti, po mari mu kuga wo moro midoaki naleo maga mamau puti waina a noa ki sua mu ara.

²⁷Natam̃ateana a manimu ligiraki nia; natam̃ateana aginau a dua mu asa: kinau a da dua mu dapala waina maramana e pitua mau. Nap̃op̃omu ega ta dogo kite sa mau, go ega ta mataku mau.

²⁸Ku dogo naga kinau a noa ki mu, naga, Aga vano, go aga moro umai punusi mu. Ku pe dodomi au, ku pe laelaea, nalakena aga vano punusi Tamagu: nalakena Tamagu e p̃arua liu au.

²⁹Go ragi waia a po noa ki mu asa pea ki ega vakilina, naga, ragi waina ega wo pakilina, kuga saralomau.

³⁰Aga wo da moro pasa p̃arua sikoti mu mau, nalakena tea maraki ni maramana e umai: go e da peani te navatuna sikai nap̃alaugu mau;

³¹ma naga maramana ega atae naga a dodomi Tamagu, go dapala waina Tamagu e dip̃a ki nau, a do mari dapala nogoe. Kuga tuleana, tuga vano m̃elu dua ki tokora waia.