Read Nguna Togoa Etafe North YOANE 15 Bible Online

YOANE 15 - Nguna Togoa Etafe North bible

YOANE 15

¹Kinau a pei vaine lomau, go Tamagu e pei tea wosiwosi natano.

²Sara ara waina eu doko au waina eu da dau ki nawada mau, e dape lua ra: go sara ara waina eu dau ki nawada, e mari pakasa ki da, naga euga dau p̃arua ki nawada.

³Ragi waia nimu ku dautau sua nalakena navasaana waina a pasa ki mu asa.

⁴Kuga toko au doko, go kinau aga toko mu doko. Dapala waina ara e pe ta doko vaine doko mau, e pe ta mari atae dum̃ana dau ki nawana mau; dapala nogoe nimu, ku pe ta doko au doko mau, ku pe ta mari atae dau mau.

⁵Kinau a pei vaine, nimu ku pei arana maga: tea waina e doko au doko, go kinau a doko asa doko, nae e dau p̃arua ki nawana: nalakena ku pe masale ki nau ku pe ta mari atae mari te navatuna sikai mau.

⁶Te naata sikai e pe ta doko au doko mau, e pe vei tea nadikiana paki etaku dapala ara sikai, go e kokolo; go eu pila daua ki da, po nadi ki da paki nakapu, go eu pei tea tap̃arakiana.

⁷Ku pe toko au doko, go navasaana aginau maga eu pe toko mu doko, kuga tatago tea waina ku pe masauna, go ega wo manimu pei tea mariana.

⁸Tea waia Tamagu e pei tea samasamaniana asa, naga kuga tau p̃arua ki nawamu; go kuga wo pei tea vasapiseikiana aginau maga asa.

⁹Dapala waina Tamagu e dodomi au, kinau ma a dodomi mu: kuga toko nadodomiana aginau doko.

¹⁰Ku pe rogo paratiki natip̃akiana aginau maga, ku pe wo doko nadodomiana aginau doko; dapala waina kinau a dogo paratiki natip̃akiana maga ki Tamagu, po doko nadodomiana aneana doko.

¹¹A po pasa ki mu tea maga wanogoe, naga nalaelaeaana aginau ega toko mu, go naga nalaelaeaana animu ega vei tea vakavuroana.

¹²Natip̃akiana aginau e pei tea waia, naga kuga tum̃amu dodomi mu, ega tapala waina kinau a dodomi mu.

¹³Nadodomiana waina e p̃arua liu tea waia te naata sikai e da peani a mau, naga naata sikai ega magi tana ri maga doropusi namauriana aneana ega madoko.

¹⁴Nimu ku pe mari tea maga waina kinau a dip̃aki mu ara, ku pe vei tagu ri maga.

¹⁵A da moro soso mu ki tea suasua maga mau; nalakena tea suasua e da atae tea waina nawota aneana e mari a mau: ma a soso mu ki tagu ri maga, nalakena tea maga mamau puti waina a dogo ra ki Tamagu a mari mu ku atae ra.

¹⁶Nimu ku da matadoa au mau, ma kinau a matadoa mu, po dawona ki mu, naga nimu kuga vano po dau ki nawa, go naga nawamu ega tu: naga tea waina ku pe wo datagovi Tamagu asa pae nagisagu, ega tua mu asa.

¹⁷A dip̃a ki mu tea maga wanogoe, naga kuga tum̃amu dodomi mu.

¹⁸Maramana e pe vilosi mu, kuga atae naga e pilsoi au pea ki e pilosi mu.

¹⁹Ku pe vei tea ni maramana, maramana e pe dodomi tea aneana: ma nalakena ku da pei tea ni maramana mau, ma kinau a matadoa mu m̃elu dua ki maramana, nalakena tea wanogoe maramana e pilosi mu.

²⁰Kuga midoaki navasaana waina kinau a noa ki mu asa, a naga, Tea suasua e da p̃arua liu nawota aneana mau. Eu pe kopalele au, eu pe wo moro kopalele mu: eu pe rogo paratiki navasaana aginau, eu pe wo moro dogo paratiki animu.

²¹Ma euga wo mari tea maga mamau puti wanogoe paki mu nalakena nagisagu, nalakena eu da atae tea waina e dip̃aki lua au umai mau.

²²A pe ta umai po pasa ki da mau, eu pe ta peani namarinaleosaana mau: ma ragi waia eu da peani nakokorokiana nalo ni namarinaleosaana adeada mau.

²³Tea waina e pilosi au, e pilosi gami ma Tamagu.

²⁴A pe ta mari nawosiana maga m̃aleoputo kakada waina te naata p̃ota sikai e da mari ra mau, eu pe ta peani namarinaleosaana mau: ma ragi waia eu punusi po pilosi gami ma Tamagu.

²⁵Ma e dapala nogoe, naga navasaana waina e pei tea midiriana nawotaeana adeada ega lolomana, waina e naga, Eu pilosi au nalakena e dika.

²⁶Ma ragi waina Tea Vasapakavakale ega wo umai, waina kinau aga wo dipaki lua e m̃elu Tamagu umai punusi mu, Naatana ni nalomauana waina e do m̃elu Tamagu pano, nae ega wo noa sokisoki nalo kakagu:

²⁷go nimu ma kuga wo noa sokisoki, nalakena ku sikoti au doko pae naatulakeana pa pa.