Read Nguna Togoa Etafe North YOANE 16 Bible Online

YOANE 16 - Nguna Togoa Etafe North bible

YOANE 16

¹A pasa ki mu tea maga wanogoe, naga kuga ta pei tea mariana kuga tapilagona mau.

²Euga wo mari mu kuga toko etaku ni nasum̃a ni nasaisaiana maga: go aura ega wo umai, waina sara naatam̃oli waina eu mari punue mu euga wo midoaki nia naga eu magi Sup̃e suasua asa.

³Go euga wo mari tea maga wanogoe, nalakena eu da atae Tamagu mau, go eu da atae au mau.

⁴Ma a noa ki mu tea maga wanogoe, naga, ragi waina aura kakada ega umai, kuga midoaki da, naga kinau a noa ki sua mu ara. Go a da noa ki mu tea maga wanogoe pae naatulakeana pa pa mau, nalakena a sikoti mu doko.

⁵Ma ragi waia a naga aga vano punusi tea waina e dip̃aki lua au umai; go nimu sikai kakamu e da pusuusu paki nau mau, po naga, Ku naga p̃a vaki esava?

⁶Ma nalakena a po pasa ki mu tea maga wanogoe, nasusueana e pakavuro nap̃op̃omu.

⁷Ma kinau a noa ki mu nalomauana; E p̃ia ki mu naga kinau aga vano: nalakena a pe ta pano mau, Tea Vasapakavakale e pe wo da umai punusi mu mau; ma a pe vano, a pe wo dip̃aki lua e umai punusi mu.

⁸Go nae, ragi waina ega wo umai, ega wo pasap̃ai maramana nalo ni namarinaleosaana, go nalo ni namarinaleoleanaana, go nalo ni navasap̃otaeana:

⁹nalo ni namarinaleosaana. Nalakena eu da saralomau au mau; nalo ni namarinaleoleanaana,

¹⁰Nalakena a pano punusi Tamagu, go ku da moro punusi au mau;

¹¹nalo ni navasap̃otaeana, nalakena tea maraki ni maramana waia e pei tea vasap̃otaeana.

¹²A ko peani tea laapa waina a naga aga noa ki mu ara, ma ku da mari atae dape ra ragi waia mau.

¹³Ma ragi waina nae, Naatana ni nalomauana, ega wo umai, ega wo maraki mu pae napua paki nalomauana mamau: nalakena ega wo da dum̃ana pasa mau; ma ega wo pasa tea maga waina ega wo dogo ra: go ega wo noakisai mu tea maga waina euga wo umai.

¹⁴Nae ega wo samasamani au: nalakena ega wo dape tea aginau, go ega wo noakisai mu asa.

¹⁵Naleo maga mamau puti waina Tamagu e peani ra eu pei tea aginau: nalakena tea wanogoe a noa, naga e do dape tea aginau, go ega wo noakisai mu asa.

¹⁶Ragi kiki, go ku da moro punusi au mau; go ragi moro kiki, go kuga wo punusi au.

¹⁷Nalakena tea wanogoe tea vasapiseikiana aneana maga seara eu dum̃ada noa ki da, eu naga, Tea wanogoe waina e noa ki gida asa e pei nasava, Ragi kiki, go ku da punusi au mau; go ragi moro kiki, go kuga wo punusi au: go, Nalakena a pano punusi Tamagu?

¹⁸Nalakena tea wanogoe eu naga, Tea wanogoe waina e noa e, Ragi kiki e pei nasava? Tu da atae tea waina e noa e mau.

¹⁹Yesu e atae naga eu masauna naga euga vusuusu paki nia, go e noa ki da, e naga, Ku pusuusu ki nalo ni tea wanogoe dum̃amu paki mu, nalakena a naga, Ragi kiki, go ku da punusi au mau; go ragi moro kiki, go kuga wo punusi au?

²⁰Lomau, lomau, a noa ki mu, naga nimu kuga wo dagi po lalagaarova, ma maramana ega wo laelaea: nimu kuga wo susue, ma nasusueana animu ega wo pei tea mariana ega vei nalaelaeaana.

²¹Nagoroi sikai ragi waina e pisola e peani nasusueana, nalakena aura aneana e po umai: ma ragi waina e piragi sua pipia, e da moro midoaki navitinuana mau, nalakena nalaelaeaana nalakena naatam̃oli sikai e po pakilina maramana.

²²Go nalakena tea wanogoe nimu ku peani nasusueana ragi waia: ma aga wo moro punusi mu, go nap̃op̃omu ega wo laelaea, go nalaelaeaana animu te naata sikai e da dape lua e kiamu mau.

²³Go naaleatia wanogoe kuga wo da pusuusu paki nau ki te navatuna mau. Lomau, lomau, a noa ki mu, naga, Ku pe tatagovi Tamagu ki te navatuna, e pe wo dua mu asa pae nagisagu.

²⁴Pa pa paki ragi waia ku da datago te navatuna pae nagisagu mau: kuga tatago, go kuga wo dape, naga nalaelaeaana animu ega vei tea vakavuroana.

²⁵A pasa ki mu tea maga wanogoe pae naluluakia maga: aura ega wo umai waina aga wo da moro pasa ki mu pae naluluakia maga mau, ma aga wo noakisai mu lina nalo ni Tamagu.

²⁶Naaleatia wanogoe kuga wo datago pae nagisagu: go a da noa ki mu mau, naga kinau aga wo pavarani Tamagu nalo kakamu;

²⁷nalakena Tamagu e dum̃ana dodomi mu, nalakena nimu ku dodomi au, po saralomau naga kinau a m̃elu Tamagu dave umai.

²⁸A m̃elu Tamagu umai, po umai paki maramana: aga moro doropusi maramana ega toko, po pano punusi Tamagu.

²⁹Tea vasapiseikiana aneana maga eu naga, P̃a leo, ragi waia ku pasa lina, po da noa te naluluakia mau.

³⁰Ragi waia au atae naga ku atae naleo maga mamau puti, po da pei sap̃o mau naga te naata sikai ega vusuusu paki‐go: nalakena tea wanogoe au saralomau naga ku m̃elu Sup̃e dave umai.

³¹Yesu e pasa dara ra, e naga, Ku saralomau ragi waia kite?

³²Kuga leo, aura ega wo umai, go e umai sua, naga kuga vei tea taperaverakiana, sara naata sikasikai paki kiamu, po doropusi au aga sikigu doko: go a da sikigu doko mau, nalakena Tamagu e sikoti au doko.

³³A pasa ki mu tea maga wanogoe, naga kuga veani natam̃ateana au. Ku peani nariesokiana maramana: ma kuga marasike, kinau a marimatua ki maramana.