Read Nguna Togoa Etafe North YOANE 19 Bible Online

YOANE 19 - Nguna Togoa Etafe North bible

YOANE 19

¹Ragi wanogoe nalakena tea wanogoe Pilato e puati Yesu, po parati a.

²Go naatam̃oli maga ni navakalo eu piri vauvau sikai ni tea makalikali maga, po sawa ki nia nap̃auna, go eu sugoro e ki sugoro kovagoro miala‐kesakesa sikai;

³go eu do umai punusi a, po do naga, P̃a laelaea, nawota ki naka ni Yudea! Go eu do dapagi a.

⁴Go Pilato e moro paki katama, po noa ki da, e naga, Kuga leo, a piragi a paki katama punusi mu, naga kuga atae naga a da pap̃ai te namariana sa asa mau.

⁵Nalakena tea wanogoe, Yesu e umai paki katama, e suni vauvau ni tea makalikali maga go sugoro kovagoro miala‐kesakesa wanogoe. Go Pilato e noa ki da, e naga, Kuga leo, naatam̃oli!

⁶Ma ragi waina tea viri warua maga go tasiga maga eu punusi a, eu pioso, po naga, P̃a turi a nakau valadagoto, pa turi a nakau valadagoto. Pilato e noa ki da, e naga, Nimu kuga vuati a, po duri a nakau valadagoto: nalakena kinau a da pap̃ai te namariana sa asa mau.

⁷Navarapule maga ni Yudea eu pasadara e, eu naga, Kinami au peani nawotaeana sikai, go pae nawotaeana wanogoe e one asa one naga ega mate, nalakena e dum̃ana mari a e pei Sup̃e Natuna.

⁸Nalakena tea wanogoe ragi waina Pilato e dogo navasaana wanogoe e mataku p̃arua;

⁹go e moro paki ekopu ni Pretorio, po noa ki Yesu, e naga, Nigo ku pei tea ni esava? Ma Yesu e da dua e te navasadaraana mau.

¹⁰Nalakena tea wanogoe Pilato e noa ki nia, e naga, Ku da pasa ki nau mau kite? Ku da atae mau naga a peani naveinawotaana naga aga veresi ko, go a peani naveinawotaana naga aga turi ko nakau valadagoto kite?

¹¹Yesu e pasa dara e, e naga, E pe ta pei tea vituakiana paki‐go pae elagi mau, ku pe ta peani te naveinawotaana dip̃a au mau: nalakena tea wanogoe tea waina e pitua ki nau paki‐go e peani namarinaleosaana waina e p̃arua liu tea anigo,

¹²Pae ragi wanogoe pa pa Pilato e laaga naga ega veresi a: ma navarapule maga ni Yudea eu pioso, eu naga, Ku pe veresi naatam̃oli waia, ku pe ta pei Kaisar tana ri mau: sara naatam̃oli waina eu dum̃ada mari ra eu pei nawota eu pasadugoro Kaisar.

¹³Nalakena tea wanogoe ragi waina Pilato e dogo navasaana maga wanogoe, e piragi Yesu paki katama, po dasake malo tasake ni navasap̃otaeana tokora sikai waina e pei tea sosoana ki Napara ni vatu, ma pae Heberu, ki Cabbatha.

¹⁴Go e pei naaleatia ni namarim̃atakiana ni navakalauana: e alagoro pei aura kelatesa. Go e noa ki navarapule maga ni Yudea, e naga, Kuga leo, Nawota animu!

¹⁵Nalakena tea wanogoe nara eu pioso, eu naga, P̃a tape lua e, p̃a tape lua e, p̃a turi a nakau valadagoto. Pilato e noa ki da, e naga, Aga turi Nawota animu nakau valadagoto kite? Tea viri warua maga eu pasa dara, eu naga, Au da peani te nawota mau, ma Kaisar e sikina.

¹⁶Ragi wanogoe nalakena tea wanogoe e pitua ki nia paki da naga ega vei tea turiana nakau valadagoto.

¹⁷Nalakena tea wanogoe eu piragilua Yesu: go e dapetape nakau valadagoto aneana po dave pano paki tokora waina e pei tea sosoana ki Tokora ni nagarai, waina e pei tea sosoana pae Heberu ki Colcotha:

¹⁸tokora wanogoe eu duri a asa nakau valadagoto, go eu duri tea p̃ota dua ero sikoti a, nadigina go nadigina, go Yesu namawota kakada.

¹⁹Go Pilato e midiri nanoasaiana sikai, po doropusi a e doko nakau valadagoto. Go tea waina e pei tea midiriana, e pei YESU NI NASARETH, NAWOTA KI NAKA NI YUDEA.

²⁰Nalakena tea wanogoe nanoasaiana wanogoe naka ni Yudea tea laapa kakada eu peve a: nalakena tokora waina Yesu e pei tea turiana asa e pei m̃aladigi ki natokoana: go e pei tea midiriana pae Heberu, go pae Roma, go pae Hellas.

²¹Nalakena tea wanogoe tea viri warua maga ni navarapule maga ni Yudea eu noa ki Pilato, eu naga, P̃a ta midiri, Nawota ki naka ni Yudea mau; ma p̃a midiri naga nae e naga, A pei Nawota ki naka ni Yudea.

²²Pilato e pasa dara, e naga, Tea waina a midiri a, ta midiri a.

²³Nalakena tea wanogoe naatam̃oli maga ni navakalo ragi waina eu duri sua Yesu nakau valadagoto, eu dape sugoro aneana maga, po mari namalomalo pati ara, agi sara naatam̃oli ni navakalo namalo sikai sarasara ra; go eu dape sugoro tokop̃ai nawilina: go sugoro tokop̃ai nawilina natuturiana e dika asa, e pei tea vausiana pae elagi usuraki.

²⁴Nalakena tea wanogoe eu dum̃ada noa ki da, eu naga, Tuga ta puap̃orae a mau, ma tuga visaara asa, ega vei agi sei: naga navasaana midiriana ega lolomana, waina e naga, Eu madeada p̃otae sugoro aginau maga eu sarasara ra, Go tea suniana aginau eu nadi ki gole asa.

²⁵Nalakena tea wanogoe naatam̃oli maga ni navakalo eu mari tea maga wanogoe. Ma Yesu p̃ilana, go p̃ilana taina, Maria, nagoroi ki Kelopa, go Maria ni Macdala eu lawodu pisari nakau valadagoto ki Yesu.

²⁶Nalakena tea wanogoe ragi waina Yesu e punusi p̃ilana, go tea vasapiseikiana waina e dodomi a e lawodu pisari a, e noa ki p̃ilana, e naga, Koroi, p̃a leo, natum̃a!

²⁷E edaku noa ki tea vasapiseikiana wanogoe, e naga, P̃a leo, p̃ilam̃a! Go pae aura wanogoe pa pa tea vasapiseikiana wanogoe e piragi a paki sum̃a ni kiana.

²⁸Edaku ki tea wanogoe Yesu, waina e atae naga naleo maga mamau puti eu po pei tea marisuaana, naga navasaana midiriana ega vei tea vakavuroana, e naga, A madou.

²⁹Lasa sikai e doko waina e pura ki waine kokona: go nalumulumu sikai waina e pura ki waine kokona wanogoe eu dakani a ki napati hussop sikai, po sai ki nia paki nawokana.

³⁰Nalakena tea wanogoe ragi waina Yesu e menadogo sua waine kokona wanogoe, e naga, E nopu: go e kusu, po pitua ki naatana.

³¹Nalakena tea wanogoe navarapule maga ni Yudea, nalakena e pei naaleatia ni namarim̃atakiana, naga nap̃atokoda euga ta doko nakau valadagoto doko sabbath mau (nalakena naaleatia ni sabbath wanogoe e pei naaleatia warua), eu pavarani Pilato naga natuada maga euga vei tea marip̃oriana, naga euga vei tea tapeluaana.

³²Nalakena tea wanogoe naatam̃oli maga ni navakalo eu rumai, po mari p̃ori natua ni tea vea, go ni tea p̃ota waina e pei tea turiana nakau valadagoto sikoti a:

³³ma ragi waina eu rumai paki Yesu, po punusi naga e mate sua, eu da mari p̃ori natuana maga mau:

³⁴ma naatam̃oli maga ni navakalo sikai kakada e puri navidina ki naio sikai, go nada go noai ero dave umai m̃araverave.

³⁵Go tea waina e punusi e po noasokisoki, go nanoasokisokiana aneana e pei lomau: go nae e atae naga e noa tea lomau maga, naga nimu ma kuga saralomau.

³⁶Nalakena tea maga wanogoe eu pakilina, naga navasaana midiriana ega lolomana, waina e naga, Te navatuna sikai ega wo da pei tea marip̃oriana mau.

³⁷Go navasaana midiriana p̃ota sikai e moro naga, Euga wo leopunusi tea waina eu puri a.

³⁸Go edaku ki tea maga wanogoe Yosef ni Arimathea, waina e pei tea vasapiseikiana sikai ki Yesu, ma e doko loku nalakena e matauki navarapule maga ni Yudea, e pavarani Pilato naga ega tape lua nap̃atoko ni Yesu: go Pilato e suasua ki nia. Nalakena tea wanogoe e umai po dape lua nap̃atokona.

³⁹Go Nikodemo ma e umai, waina e umai punusi a p̃ogi ragi vea, e dape murra go aloe sarisari umai, e alagoro pei paund p̃onotia sikai.

⁴⁰Go ero dape nap̃atoko ni Yesu, po pivisi a ki namasia maga ni nakulukulu ni linen go tea ni nap̃o wia wanogoe e pilake a, dapala waina naka ni Yudea eu do mari naovakiana.

⁴¹Go tokora waina e pei tea turiana asa nakau valadagoto roara sikai e doko asa; go roara wanogoe matigo vau sikai e doko asa, waina te naata sikai e ko da pei tea toropusiana asa mau.

⁴²Nalakena tea wanogoe eu doropusi Yesu tokora wanogoe, nalakena naaleatia ni namarim̃atakiana ki naka ni Yudea, nalakena matigo wanogoe e pei m̃aladigi.