Read Nguna Togoa Etafe North YOANE 2 Bible Online

YOANE 2 - Nguna Togoa Etafe North bible

YOANE 2

¹Go naaleatia ketolu navitawiriana sikai e pei tea mariana Kana ni Calilea; go Yesu p̃ilana e doko tokora wanogoe;

²go Yesu ma e pei tea vitautauana, go tea vasapiseikiana aneana maga, paki navitawiriana wanogoe.

³Go ragi waina waine e nopu, Yesu p̃ilana e noa ki nia, e naga, Eu da peani waine mau.

⁴Go Yesu e noa ki nia, e naga, Aga kasa ki‐go, koroi? Aura aginau e ko da umai mau.

⁵P̃ilana e noa ki tea suasua maga, e naga, Tea waina e pe noa ki mu asa kuga mari a.

⁶Go noai ni vatu latesa eu pei tea lawokiana tokora wanogoe pae namaridautauana ki naka ni Yudea, eu dape noai ni bakita latelatesa kite loveloveti sarasara ra.

⁷Yesu e noa ki da, e naga, Kuga vakavuro noai ni vatu maga ki noai. Go eu pakavuro ra eu pura matoto.

⁸Go e noa ki da, e naga, Kuga vautu ragi waia, po dape a pano dua tea maraki nakaniana asa. Go eu dape e pano.

⁹Go ragi waina tea maraki nakaniana e munu dogo noai waina e pei tea mariana e pei waine, go e da atae a naga e pae esava (ma tea suasua maga waina eu pautui noai eu atae a), tea maraki nakaniana e soso tea vitawiri, po noa ki nia,

¹⁰e naga, Sara naatam̃oli eu pea doropusi waine wia; go ragi waina naatam̃oli maga eu munu sua p̃arua, eu edaku doropusi tea sa marara: nigo ku mauti waine wia pa pa paki ragi waia.

¹¹Naatulakeana wanogoe ni navaivaiana maga Yesu e mari a Kana ni Calilea, po mari nasamasamaana aneana e doko lina asa; go tea vasapiseikiana aneana maga eu saralomau asa.

¹²Edaku ki tea wanogoe e siwo paki Kapernaum pano, nae, go p̃ilana, go taina maga, go tea vasapiseikiana aneana maga, eu mamau: go eu doko tokora wanogoe doko naaleatia maga eu da laapa mau.

¹³Go navakalauana ki naka ni Yudea e pei m̃aladigi, go Yesu e sake paki Yerusalem pano.

¹⁴Go e pap̃ai nasum̃a tapu tea maga waina eu do sori oks maga go shiip maga go tokopea maga, go tea surupioli ki m̃ane maga eu dasake:

¹⁵go e mari tea varati sikai ni namea kiki maga, po kopasi puti ra paki etaku ni roara ni nasum̃a tapu, shiip maga go oks maga; go e da ki m̃ane ki tea surupioli ki m̃ane maga, po dapera ki wede adeada maga;

¹⁶go e noa ki tea maga waina eu sori tokopea maga, e naga, Kuga tape lua tea maga waia euga m̃elu dua ki tokora waia pano; kuga ta mari nasum̃a ki Tamagu ega vei nasum̃a ni navakokotoana mau.

¹⁷Tea vasapiseikiana aneana maga eu midoa ki nia naga e pei tea midiriana, Nasuisuiana ega wo magi nasum̃a anigo gani dinomi au.

¹⁸Nalakena tea wanogoe navarapule maga ni Yudea eu pasa dara po noa ki nia, eu naga, Seve navaivaiana ku piseiki gami asa, waina ku mari tea maga waia?

¹⁹Yesu e pasa dara po noa ki da, e naga, Kuga rakai nasum̃a tapu waia, go aga wo sike a ega tuleana naaleatia dolu.

²⁰Nalakena tea wanogoe navarapule ni Yudea eu naga, Natau rualima pati tamate latesa nasum̃a tapu waia e do pei tea tavagiana ara, go nigo p̃a wo sike a ega tuleana naaleatia dolu kite?

²¹Ma nae e noa e nalo ni nasum̃a tapu ni nap̃atokona.

²²Nalakena tea wanogoe ragi waina e pei tea sikeana duleana m̃elu dua ki tea mate maga, tea vasapiseikiana maga eu midoa ki nia naga e noa tea wanogoe; go eu saralomau navasaana midiriana wanogoe, go navasaana waina Yesu e noa e.

²³Go ragi waina e doko Yerusalem ragi ni navakalauana, ragi ni nasaisaiana kakana, tea laapa eu saralomau nagisana, eu do leo punusi navaivaiana aneana maga waina e mari ra.

²⁴Ma Yesu e da dum̃ana pavatu ara asa mau, nalakena nae e atae tea maga mamau puti,

²⁵go nalakena e da pei sap̃o mau naga te naata sikai ega noasokisoki nalo ni naatam̃oli: nalakena nae e dum̃ana atae tea waina e doko nap̃alau ni naatam̃oli.