Read Nguna Togoa Etafe North YOANE 21 Bible Online

YOANE 21 - Nguna Togoa Etafe North bible

YOANE 21

¹Edaku ki tea maga wanogoe Yesu e moro dum̃ana mari a e doko lina ki tea vasapiseikiana maga pisari natasi ni Tiberia;

²go e dum̃ana mari a e doko lina dapala waia. Simon Petero, go Toma waina e pei tea sosoana ki Didimo, go Nathanael ni Kana ni Calilea, go Sebedaio natuna dua, go tea p̃ota dua ni tea vasapiseikiana aneana maga, eu mamau doko.

³Simon Petero e noa ki da, e naga, Aga va araika. Eu noa ki nia, eu naga, Nigida ma tuga mamau. Eu dave pano, po pagi rarua; go nap̃ogiana wanogoe eu da puati te navatuna mau.

⁴Ma ragi waina e po pei ragi ni namakotokotoana, Yesu e lawodu elau garagara: ma tea vasapiseikiana maga eu da atae mau naga e pei Yesu.

⁵Ragi wanogoe Yesu e noa ki da, e naga, Piakirikiri, ku peani te navatuna waina kuga kani a kite? Eu pasa dara e, eu naga, Ee.

⁶Go e noa ki da, e naga, Kuga siva ki kup̃ena paki taleva ni matua ni rarua, go kuga wo pap̃ai. Nalakena tea wanogoe eu siva ki nia, go eu da moro mari atae puati a umai mau, nalakena navata ni naika maga wanogoe.

⁷Nalakena tea wanogoe tea vasapiseikiana wanogoe waina Yesu e dodomi a, e noa ki Petero, e naga, E pei Nawota. Go ragi waina Simon Petero e dogo naga e pei Nawota, e otisoki namalona ki sugoro aneana (nalakena e m̃alam̃ala), po dum̃ana nadi ki nia paki natasi.

⁸Ma tea vasapiseikiana p̃ota maga eu rumai rarua kiki (nalakena eu da uvea ki euta mau, ma namalopa kakana e alagoro pei navasiana p̃onotia sikai), eu do dosagi kup̃ena waina e pura ki naika maga.

⁹Go ragi waina eu paki euta, eu punusi nakapu sikai ni nam̃elevara e one, go naika e pei tea toropusiana e one asa, go bred.

¹⁰Yesu e noa ki da, e naga, Kuga tape te naika seara umai ni tea maga waina ku po puati ra ragi waia.

¹¹Nalakena tea wanogoe Simon Petero e pagi rarua, po puati kup̃ena paki euta, e pura ki naika warua maga, p̃onotia sikai rualima takuna lima tamate dolu: eu laapa, ma kup̃ena e da mawora mau. Yesu e noa ki da, e naga, Kuga umai ganikani.

¹²Go tea vasapiseikiana maga sikai kakada e da piviari pusuusu paki nia mau, po naga, Nigo ku pei sei?

¹³Eu atae naga e pei Nawota. Yesu e umai, po dape bred wanogoe, po dua ra asa, go dapala nogoe e dua ra naika.

¹⁴Tea wanogoe e pei sala ketolu waina Yesu e pakilina ki tea vasapiseikiana maga asa, edaku ki e duleana m̃elu dua ki tea mate maga.

¹⁵Go ragi waina eu ganikani sua, Yesu e noa ki Simon Petero, e naga, Simon natu ni Yoane, ku dodomi au p̃arua liu tea maga waia kite? E noa ki nia, e naga, Ioro, Nawota; nigo ku atae naga a dodomi ko. E noa ki nia, e naga, P̃a vagani shiip vusavusa aginau maga.

¹⁶E moro noa ki nia sala kerua, e naga, Simon, natu ni Yoane, ku dodomi au kite? E noa ki nia, e naga, Ioro, Nawota; nigo ku atae naga a dodomi ko. E noa ki nia, e naga, P̃a leo paratiki shiip aginau.

¹⁷E noa ki nia sala ketolu e naga, Simon, natu ni Yoane, ku dodomi au kite? Petero e susue nalakena e noa ki nia sala ketolu, e naga, Ku dodomi au kite? Go e noa ki nia, e naga, Nawota, nigo ku atae naleo maga mamau puti; nigo ku atae naga a dodomi ko. Yesu e noa ki nia, e naga, P̃a vagani shiip aginau.

¹⁸Lomau, lomau, a noa ki‐go, naga Ragi waina ku pei natureai ku dum̃am̃a dasoki ko, po surata paki tokora waina ku masauna naga p̃a vaki asa: ma ragi waina p̃a wo pei tea matua, p̃a wo sai ki nam̃elearum̃a maga, go tea p̃ota sikai ega wo dasoki ko, po piragi ko paki tokora waina p̃a wo karai paki asa.

¹⁹Ma e noa tea wanogoe, e paivai ki namateana waina ega wo samasamani Sup̃e asa. Go ragi waina e noa sua tea wanogoe, e noa ki nia, e naga, P̃a rausi au.

²⁰Petero e dum̃ana doa e, po punusi tea vasapiseikiana waina Yesu e dodomi a e dausi; go waina e pei tea waina e ovi narum̃ana ragi ni nakaniana ni ragi melu, po naga, Nawota, tea waina e naga ega vitua ki‐go e pei sei?

²¹Go ragi waina Petero e punusi a e noa ki Yesu, e naga, Nawota, go naatam̃oli waia, nasava?

²²Yesu e noa ki nia, e naga, A pe masauna naga nae ega toko pa pa aga umai, nigo p̃a kasa ki nia?

²³Nigo p̃a rausi au. Nalakena tea wanogoe navasaana wanogoe e sokapule m̃aleoputo ni taigida maga, naga tea vasapiseikiana wanogoe ega ta mate mau: ma Yesu e da noa ki nia mau, naga ega ta mate mau; ma, A pe masauna naga ega toko pa pa aga umai, nigo p̃a kasa ki nia?

²⁴Nae e pei tea vasapiseikiana waina e noasokisoki nalo ni tea maga wanogoe, po midiri tea maga wanogoe: go au atae naga nanoasokiana aneana e pei lomau.

²⁵Go naleo p̃ota laapa ma eu doko waina Yesu e mari ra, waina eu pe mamau puti pei tea midiriana sikasikai, a midoaki nia naga maramana ma e pe ta dape tusi maga waina eu pe vei tea midiriana.