Read Nguna Togoa Etafe North YOANE 3 Bible Online

YOANE 3 - Nguna Togoa Etafe North bible

YOANE 3

¹Ma naatam̃oli sikai ni Farisi maga e doko, nagisana Nikodemo, tea maraki sikai ki naka ni Yudea:

²nae e umai punusi Yesu p̃ogi, po noa ki nia, e naga, Rabbi, au atae naga ku pei tea vasapiseiki sikai waina ku m̃elu Sup̃e umai: nalakena te naata sikai, Sup̃e e pe ta sikoti a doko mau, e pe ta mari atae mari navaivaiana maga mau waina nigo ku do mari ra.

³Yesu e pasa dara po noa ki nia, e naga, Lomau, lomau, a noa ki‐go, Te naata sikai e pe ta pakilina pau mau, e pe ta mari atae punusi namarakiana ki Sup̃e mau.

⁴Nikodemo e noa ki nia, e naga, Naatam̃oli sikai e mari atae pakilina ragi waina e pei tea matua dapale sava? E mari atae sili paki nap̃ele ni p̃ilana sala kerua, po pakilina kite?

⁵Yesu e pasa dara, e naga, Lomau, lomau, a noa ki‐go, Te naata sikai e pe ta pakilina m̃elu noai go Naatana mau, e pe ta mari atae sili paki namarakiana ki Sup̃e mau.

⁶Tea waina e pakilina m̃elu nap̃okasi e pei nap̃okasi; go tea waina e pakilina m̃elu Naatana e pei naatana.

⁷P̃a ta maga mau nalakena a noa ki‐go, naga E one mu one naga kuga vakilina pau.

⁸Nalagi e sau tokora waina e masauna, go ku dogo nadaleona, ma tokora waina e pae asa umai, go tokora waina e paki asa pano ku da atae a mau: Sara naata waina e pakilina m̃elu Naatana e dapala nogoe.

⁹Nikodemo e pasa dara po noa ki nia, e naga, Tea maga wanogoe eu mari atae pei tea mariana dapale sava?

¹⁰Yesu e pasa dara po noa ki nia, e naga, Nigo ku pei tea vasapiseiki ki Israel, go ku da midoaki atae tea maga wanogoe kite?

¹¹Lomau, lomau, a noa ki‐go, naga Kinami au do pasa tea waina au atae a, po do noasokisoki tea waina au punusi a; go nimu ku da dape nanoasokisokiana aginami mau.

¹²A pe noa ki sua mu tea maga ni maramana, go ku da saralomau mau, a pe noa ki mu tea maga ni nakoroatelagi, kuga wo saralomau dapale save?

¹³Go te naata sikai e da sake paki nakoroatelagi mau, ma tea waina e pae nakoroatelagi siwo umai e sikina sake paki asa, naatam̃oli Natuna waina e doko nakoroatelagi.

¹⁴Go dapala waina Moses e sike m̃aata pakilagi masop̃alo, dapala nogoe e one naatam̃oli Natuna one naga ega vei tea sikeana pakilagi:

¹⁵naga sara naata waina eu saralomau asa euga veani namauriana waina e du mau du.

¹⁶Nalakena Sup̃e e dodomi maramana dapala waina e pitua ki Natuna sikedau, naga sara naata waina e saralomau asa ega ta mate puoli mau, ma ega veani namauriana waina e du mau du.

¹⁷Nalakena Sup̃e e da dip̃aki lua Natuna umai paki maramana naga ega vasa p̃otae maramana mau, ma e dip̃aki lua e umai naga maramana ega vei tea mautipauriana pae asa.

¹⁸Tea waina e saralomau asa e da pei tea vasap̃otaeana mau: tea waina e da saralomau mau e po pei tea vasap̃otaeana sua, nalakena e da saralomau nagisa ni Sup̃e Natuna sikedau mau.

¹⁹Go tea waia e pei navasap̃otaeana, naga namarama e po umai paki maramana, go naatam̃oli maga eu dodomi p̃arua ki namaligo, po dodomi kiki ki namarama; nalakena nawosiana adeada maga e sa.

²⁰Nalakena sara naata waina e do mari naleo sa e pilosi namarama, go e da umai paki namarama mau, naga nawosiana aneana maga ega ta pei tea maramap̃aiana mau.

²¹Ma tea waina e do mari nalomauana e umai paki namarama, naga nawosiana aneana maga ega vei tea mariana ega toko lina, naga eu pei tea wosiwosikiana doko Sup̃e.

²²Edaku ki tea maga wanogoe Yesu go tea vasapiseikiana aneana maga eu rumai paki navanua ni Yudea, go e doko tokora wanogoe sikoti ra doko, po do bapetiso.

²³Go Yoane ma e do bapetiso Ainon, m̃aladigi ki Salim, nalakena noai laapa eu doko tokora wanogoe: go eu rumai po pei tea bapetisoana.

²⁴Nalakena Yoane e ko da pei tea nadikiana paki ekopu ni nasum̃a ni navavaigoroana mau.

²⁵Nalakena tea wanogoe navusuusuana sikai e pakilina m̃elu tea vasapiseikiana maga ki Yoane paki tea ni Yudea sikai nalo ni namaridautauana.

²⁶Go eu rumai punusi Yoane, po noa ki nia, eu naga, Rabbi, tea waina e sikoti ko doko taleva kerua ni Yordan, waina ku maneana noasokisoki, p̃a leo nae e do bapetiso, go tea maga mamau puti eu rumai punusi a.

²⁷Yoane e pasa dara po naga, Naatam̃oli sikai, te navatuna e pe ta pei tea vituakiana paki nia m̃elu nakoroatelagi mau, e da mari atae dape a mau.

²⁸Nimu ku dum̃amu maginau noa sokisoki naga a noa, naga Kinau a da pei Kristo mau, ma naga A pei tea tip̃akiluaana pea ki nia umai.

²⁹Tea waina e peani nagoroi laki e pei tea vitawiri: ma tea vitawiri tana ri, waina e lawodu po dogo e, e laelaea p̃arua nalakena nadaleo ni tea vitawiri: nalakena tea wanogoe nalaelaeaana aginau waia e pei tea vakavuroana.

³⁰E one asa one naga nae ega risu po p̃arua, ma e one au one naga aga risu po kiki.

³¹Tea waina e pae elagi umai e dap̃au tea maga mamau puti: tea waina e pei tea ni maramana e pei tea ni maramana, po do pasa tea ni maramana: tea waina e pae nakoroatelagi umai e dap̃au tea maga mamau puti.

³²Tea waina e punusi a po dogo e, tea wanogoe e do noa sokisoki a; go te naata sikai e da dape nanoasokisokiana aneana mau.

³³Tea waina e dape sua nanoasokisokiana aneana, e pulusoki naga Sup̃e e pei lomau.

³⁴Nalakena tea waina Sup̃e e dip̃aki lua e umai e do pasa navasaana maga ki Sup̃e: nalakena Sup̃e e da pitua ki Naatana pae totowo paki nia mau.

³⁵Tamana e dodomi Natuna, go e pitua ki naleo maga mamau puti paki nam̃elearuna.

³⁶Tea waina e saralomau Natuna e peani namauriana waina e du mau du; ma tea waina e da saralomau Natuna mau ega wo da punusi namauriana mau, ma namaetoana ki Sup̃e e doko asa doko.