Read Nguna Togoa Etafe North YOANE 6 Bible Online

YOANE 6 - Nguna Togoa Etafe North bible

YOANE 6

¹Edaku ki naleo maga wanogoe Yesu e duagoto pano paki taleva kerua ni natasi ni Calilea, waina e pei natasi ni Tiberia.

²Go taua warua sikai ni naatam̃oli maga eu dausi a, nalakena eu punusi navaivaiana maga waina e mari ra nalo ni tea sasana maga.

³Go Yesu e sake paki tava pano, go e do natano tokora wanogoe sikoti tea vasapiseikiana aneana maga.

⁴Go navakalauana, nasaisaiana ki naka ni Yudea, e pei m̃aladigi.

⁵Nalakena tea wanogoe, ragi waina Yesu e sike namatana, po punusi naga taua warua sikai ni naatam̃oli maga eu rumai punusi a, e noa ki Filipo, e naga, Tuga vakotovi bred esava, naga tea maga wanana euga kanikani?

⁶Ma e noa tea wanogoe naga ega mari dogo e: nalakena nae e dum̃ana atae tea waina e naga ega mari a.

⁷Filipo e pasa dara e, e naga, Bred ni denario p̃onotia dua e da patakada mau, naga sara naata euga tape tea kiki.

⁸Tea vasapiseikiana aneana maga sikai kakada, Anderea, Simon Petero taina, e noa ki nia,

⁹e naga, Natureai kiki sikai e doko nea, waina e peani bred ni barle elima, go naika dua: ma tea wanogoe eu magi tea laapa waina eu doko pei nasava?

¹⁰Yesu e naga, Kuga mari naatam̃oli maga euga to natano. Go nam̃enau laapa e doko tokora wanogoe. Go naanoai maga eu do natano, naveveana kakada e alagoro pei manu lima.

¹¹Go Yesu e dape bred maga wanogoe; go ragi waina e dapasavasa dodom̃ataki sua, e duri dua tea maga waina eu do natano; go dapala nogoe e duri dua ra naika maga pa pa eu karai.

¹²Go ragi waina eu puka e noa ki tea vasapiseikiana aneana maga, e naga, Kuga vila daua ki matele maga waina eu dupele, naga te seara ega ta pei tea tape puolikiana mau.

¹³Nalakena tea wanogoe eu pila daua ki da, po pakavuro nala rualima sikai tamate dua ki matele maga ni bred ni barle elima wanogoe, waina eu magi tea maga waina eu ganikani dupele.

¹⁴Nalakena tea wanogoe ragi waina naatam̃oli maga wanogoe eu punusi navaivaiana waina e mari a, eu naga, Tea waia e pei profeta lomau waina ega wo umai paki maramana.

¹⁵Nalakena tea wanogoe ragi waina Yesu e atae naga eu naga euga umai, po puati pavakoto asa, naga euga mari a ega vei nawota, e moro m̃elu paki tava pano nae e sikina.

¹⁶Go ragi waina e pei ragi melu, tea vasapiseikiana aneana maga eu siwo paki natasi pano;

¹⁷go eu pagi rarua sikai, po do porau duagoto natasi paki Kapernaum pano. Go e maligo sua, go Yesu e ko da umai punusi ra mau.

¹⁸Go natasi e do p̃arua nalakena nalagi warua waina e sau.

¹⁹Go ragi waina eu paluse sua e alagoro pei maile dolu kite pati, eu leopunusi Yesu e surata natasi, po do umai paki m̃aladigi ki rarua: go eu mataku.

²⁰Ma e noa ki da, e naga, E pei kinau; kuga ta mataku mau.

²¹Nalakena tea wanogoe eu masauna naga euga viragi a paki rarua; go m̃araverave rarua e paki navanua waina eu naga euga vaki asa.

²²Matamai ki nia taua ni naatam̃oli maga waina eu lawodu taleva kerua ni natasi eu punusi naga rarua p̃ota sikai e da doko tokora wanogoe mau, ma tea sikai maau, go naga Yesu e da sikoti tea vasapiseikiana aneana maga paki rarua mau, ma naga tea vasapiseikiana aneana maga eu sikida pano

²³(ma rarua seara eu pae Tiberia umai paki m̃aladigi ki tokora waina eu gani bred asa ragi waina e dapasavasa dodom̃ataki sua):

²⁴nalakena tea wanogoe ragi waina taua ni naatam̃oli maga eu punusi naga Yesu e da doko tokoro wanogoe mau, go naga tea vasapiseikiana aneana maga eu da doko asa mau, nara ma eu pagi rarua maga, po umai paki Kapernaum, eu do laaga Yesu.

²⁵Go ragi waina eu pap̃ai a taleva kerua ni natasi, eu noa ki nia, eu naga, Rabbi, ku umai paki nea seve ragi?

²⁶Yesu e pasa dara ra po naga, Lomau, lomau, a noa ki mu, naga Ku da laaga au mau nalakena ku punusi navaivaiana maga, ma ku laaga au nalakena ku gani bred seara po puka asa.

²⁷Kuga ta p̃osiwosi mau raki navinaga waina e do sa puoli, ma kuga wosiwosi raki navinaga waina e doko pa pa paki namauriana waina e du mau du, waina naatam̃oli Natuna ega wo dua mu asa, nalakena nae wanogoe Tamana, Sup̃e, e pulusoki a.

²⁸Nalakena tea wanogoe eu noa ki nia, eu naga, Auga mari nasava, naga auga wosiwosi ki nawosiana maga ki Sup̃e?

²⁹Yesu e pasa dara po noa ki da, e naga, Tea waia e pei nawosiana ki Sup̃e, naga kuga saralomau tea waina nae e dip̃aki lua e umai.

³⁰Nalakena tea wanogoe eu noa ki nia, eu naga, Nigo ku mari nasava ega vei navaivaiana, naga auga vunusi a po saralomau navasaana anigo? Ku do p̃osiwosi ki nasava?

³¹Tamagami maga eu gani manna masop̃alo; dapala waina e pei tea midiriana, naga E dua ra navinaga waina e pae nakoroatelagi umai naga euga kani a.

³²Nalakena tea wanogoe Yesu e noa ki da, e naga Lomau, lomau, a noa ki mu, naga E da pei Moses mau waina e dua mu navinaga waina e pae nakoroatelagi umai; ma Tamagu e dua mu navinaga lomau waina e pae nakoroatelagi umai.

³³Nalakena navinaga ki Sup̃e e pei tea waina e pae nakoroatelagi siwo umai, po dua maramana namauriana.

³⁴Nalakena tea wanogoe eu noa ki nia, en naga, Nawota, p̃a tua gami navinaga wanogoe sara ragi.

³⁵Yesu e noa ki da, e naga, Kinau a pei navinaga ni namauriana: tea waina e umai punusi au ega wo da pitolo mau, go tea waina e saralomau au ega wo da madou mau te ragi.

³⁶Ma a noa ki sua mu, naga ku po punusi au, go ku da saralomau au mau.

³⁷Tea mamau waina Tamagu e dua au asa ega wo umai punusi au, go tea waina e umai punusi au aga wo da nadi ki nia paki etaku mau.

³⁸Nalakena a pae nakoroatelagi siwo umai naga aga ta mari namasauana aginau mau, ma naga aga mari namasauana ki tea waina e dip̃aki lua au umai.

³⁹Go tea waia e pei namasauana ki tea waina e dip̃aki lua au umai, naga tea mamau waina e dua au asa aga wo da dape puoli ki te navatuna kakana mau, ma aga wo sike a ega wo duleana naaleatia edaku mau.

⁴⁰Nalakena tea waia e pei namasauana ki Tamagu, naga sara naata waina eu leopunusi Natuna, po saralomau asa, euga veani namauriana waina e du mau du; go kinau aga wo sike ra euga wo duleana naaleatia edaku mau.

⁴¹Nalakena tea wanogoe navarapule maga ni Yudea eu dauruuru nalo kakana, nalakena e naga, Kinau a pei navinaga waina e pae nakoroatelagi siwo umai.

⁴²Go eu naga, Tea waia e da pei Yesu natu ni Yosef, waina nigida tu atae tamana go p̃ilana kite? Ekasana e noa ragi waia, A po pae nakoroatelagi siwo umai?

⁴³Yesu e pasa dara po noa ki da, e naga, Kuga ta dauruuru dum̃amu paki mu mau.

⁴⁴Te naata, Tamagu waina e dip̃aki lua au umai e pe ta puati a mau, e pe ta mari atae umai punusi au mau: go kinau aga wo sike a ega tuleana naaleatia edaku mau.

⁴⁵E pei tea midiriana profeta maga, e naga, Go euga wo mamau puti pei tea vasapiseikiana ki Sup̃e. Sara naata waina eu dogo ki Tamagu, po ataedogo, eu do umai punusi au.

⁴⁶E da pei naga te naata e punusi sua Tamagu mau, ma tea waina e m̃elu Sup̃e umai, nae e punusi sua Tamagu.

⁴⁷Lomau, lomau, a noa ki mu, naga Tea waina e saralomau e peani namauriana waina e du mau du.

⁴⁸Kinau a pei navinaga ni namauriana.

⁴⁹Tamamu maga eu gani manna masop̃alo, go teu mate.

⁵⁰Tea waia e pei navinaga waina e pae nakoroatelagi siwo umai, naga naatam̃oli euga kani seara kakana, po da mate mau.

⁵¹Kinau a pei navinaga mauri waina e pae nakoroatelagi siwo umai: te naata e pe kani navinaga waia seara kakana, e pe wo mauri pa pa e pe tu mau du: ioro go navinaga waina aga wo magi namauriana ni maramana pitua ki nia e pei nap̃okasigu.

⁵²Nalakena tea wanogoe navarapule maga ni Yudea eu dum̃ada pululu ki da, eu naga, Naatam̃oli waia e mari atae dua gida nap̃okasina tuga kani a dapale sava?

⁵³Nalakena tea wanogoe Yesu e noa ki da, e naga, Lomau, lomau, a noa ki mu, naga Ku pe ta gani nap̃okasi ni naatam̃oli Natuna po da munu nadana mau, ku pe ta peani namauriana doko nap̃alaumu mau.

⁵⁴Tea waina e gani nap̃okasigu po munu nadagu e peani namauriana waina e du mau du; go kinau aga wo sike a ega tuleana naaleatia edaku mau.

⁵⁵Nalakena nap̃okasigu e pei navinaga kaniana lomau, go nadagu e pei noai munuana lomau.

⁵⁶Tea waina e gani nap̃okasigu po munu nadagu e doko au doko, go kinau a doko asa doko.

⁵⁷Dapala waina Tamagu waina e mauri e dip̃aki lua au umai, go kinau a mauri nalakena Tamagu, dapala nogoe tea waina e gani au, nae ma ega wo mauri nalakena kinau.

⁵⁸Tea waia e pei navinaga waina e pae nakoroatelagi siwo umai: e da dapala waina tamamu maga eu ganikani, po mate: tea waina e gani navinaga waia ega wo mauri pa pa ega tu mau du.

⁵⁹E noa tea maga wanogoe ekopu ni nasum̃a ni nasaisaiana ragi waina e do pasa piseiki Kapernaum.

⁶⁰Nalakena tea wanogoe tea vasapiseikiana aneana maga tea laapa kakada ragi waina eu dogo e, eu naga, Navasaana wanogoe e kasua; sei e mari atae dogo e?

⁶¹Ma Yesu, waina e dum̃ana atae naga tea vasapiseikiana aneana maga eu dauruuru nalo ni tea wanogoe, e noa ki da, e naga, Tea wanogoe e mari mu ku dapilagona kite?

⁶²Mase ku pe leopunusi naatam̃oli Natuna e pe to sake paki tokora waina e doko asa sala vea?

⁶³Naatana e pei tea waina e pakamauri; nap̃okasi e da silae kiki ki nia mau: navasaana maga waina kinau a po noa ki mu ara eu pei naatana, go eu pei namauriana.

⁶⁴Ma te seara kakamu eu doko waina eu da saralomau mau. Nalakena Yesu e atae pae naatulakeana pa pa sei maga eu doko waina eu da saralomau mau, go sei e doko waina ega wo pitua ki nia.

⁶⁵Go e naga, Nalakena tea wanogoe a noa ki sua mu, naga te naata sikai, e pe ta pei tea vituakiana paki nia pae Tamagu mau, e pe ta mari atae umai punusi au mau.

⁶⁶Pae ragi wanogoe tea vasapiseikiana aneana maga tea laapa kakada eu liliu pano, po da moro surata sikoti a mau.

⁶⁷Nalakena tea wanogoe Yesu e noa ki tea rualima sikai tamate dua, e naga, Nimu ma ku masauna naga kuga vano kite?

⁶⁸Simon Petero e pasa dara e, e naga, Nawota, auga va punusi sei? Nigo ku peani navasaana maga ni namauriana waina e du mau du.

⁶⁹Go kinami au saralomau sua, go au atae sua naga nigo ku pei Tea Tapu ki Sup̃e.

⁷⁰Yesu e pasa dara ra, e naga, Kinau a da matadoa mu tea rualima sikai tamate dua, go sikai kakamu e pei diabolo sikai kite?

⁷¹Ma e noa Yuda natu ni Simon Iskariote, nalakena nae e pei tea waina ega wo pitua ki nia, e pei sikai ni tea rualima sikai tamate dua.