Read Nguna Togoa Etafe North YOANE 7 Bible Online

YOANE 7 - Nguna Togoa Etafe North bible

YOANE 7

¹Go edaku ki tea maga wanogoe, Yesu e surata Calilea: nalakena e da masauna mau naga ega surata Yudea, nalakena navarapule maga ni Yudea eu do laaga naga euga mari punue a.

²Go nasaisaiana ki naka ni Yudea, nasaisaiana ni na‐mari‐tap̃aup̃au‐ana e pei m̃aladigi.

³Nalakena tea wanogoe taina maga eu noa ki nia, eu naga, P̃a m̃elu dua ki tokora waia, go p̃a vaki Yudea pano, naga tea vasapiseikiana anigo maga ma euga vunusi nawosiana anigo maga waina ku do mari a.

⁴Nalakena te naata sikai e da mari panako ki te navatuna mau, go nae e dum̃ana laaga naga ega toko lina. Ku pe to mari naleo maga waina, p̃a tum̃ama piseiki maramana ako.

⁵Nalakena taina maga ma eu da saralomau asa mau.

⁶Nalakena tea wanogoe Yesu e noa ki da e naga, Ragi aginau e ko da umai mau; ma ragi animu e doko p̃ia doko sara ragi.

⁷Maramana e da mari atae pilosi mu mau; ma e do pilosi au, nalakena kinau a do noasokisoki nalo kakana naga nawosiana aneana maga eu sa.

⁸Nimu kuga sake paki nasaisaiana pano: kinau aga ko da sake paki nasaisaiana waia pano mau; nalakena ragi aginau e ko da umai sua mau.

⁹Go ragi waina e noa ki sua ra tea maga wanogoe, e ko doko Calilea doko.

¹⁰Ma ragi waina taina maga eu sake sua paki nasaisaiana pano, ragi wanogoe nae ma e sake pano, e da pae lina mau, ma e dapala waina e pano panako pano.

¹¹Nalakena tea wanogoe navarapule maga ni Yudea eu laaga asa nasaisaiana, po naga, Nae e doko esava?

¹²Go natauruuruana warua e doko m̃aleoputo ni taua maga ni naatam̃oli nalo kakana: te seara eu do naga, E pei naatam̃oli wia; ma tea p̃ota seara eu do naga, Ee, ma e do piragi sasap̃o ki taua ni naatam̃oli maga.

¹³Ma te naata sikai e da pasa lina nalo kakana mau nalakena namatakuana paki navarapule maga ni Yudea.

¹⁴Ma ragi waina e po pei m̃aleoputo ni nasaisaiana Yesu e sake paki nasum̃a tapu pano, po pasa piseiki.

¹⁵Nalakena tea wanogoe navarapule maga ni Yudea eu maga, po naga, Naatam̃oli waia e atae namidiriana dapale sava, waina e da pei tea vasapiseikiana mau?

¹⁶Nalakena tea wanogoe Yesu e pasa dara ra, po naga, Navasapiseikiana aginau e da pei tea aginau mau, ma e pei tea ki tea waina e dip̃aki lua au umai.

¹⁷Te naata e pe masauna naga ega mari namasauana aneana, e pe wo atae nalo ni navasapiseikiana, e pe vei tea ki Sup̃e, kite kinau a pe tum̃agu pasa.

¹⁸Tea waina e dum̃ana pasa e laaga nasamasamaana aneana: ma tea waina e laaga nasamasamaana ki tea waina e dip̃aki lua e umai, nae e pei lomau, go te namarinaleotageleana e da doko asa mau.

¹⁹Moses e da dua mu nawotaeana kite, go sikai kakamu e da do mari nawotaeana mau? Ekasana ku laaga naga kuga mari punue au?

²⁰Taua ni naatam̃oli maga eu pasa dara, eu naga, Ku peani dimon sikai: sei e laaga naga ega mari punue ko?

²¹Yesu e pasa dara po noa ki da, e naga, A mari nawosiana sikai, go ku maga puti.

²²Nalakena tea waia Moses e dua mu natovadaviviana (e da pei nalakena e pei tea ni Moses mau, ma e pei tea ni tamamu maga); go ku dovadavivi naatam̃oli sikai sabbath.

²³Naatam̃oli sikai e pe tape natovadaviviana sabbath, naga nawotaeana ki Moses ega ta pei tea tapiriana mau; ku kokona ki nau nalakena a mari naatam̃oli sikai e p̃ia sabbath kite?

²⁴Kuga ta pasa p̃otae pae tea vunusiana mau, ma kuga vasa p̃otae navasap̃otaeana leana.

²⁵Nalakena tea wanogoe tea ni Yerusalem maga seara kakada eu naga, Tea waia e da pei tea waina eu laaga naga euga mari punue a kite?

²⁶Go kuga leo, e pasa lina, go eu da noa ki nia te navatuna mau. Tea maraki maga eu atae lomau naga nae e pei Kristo kite?

²⁷Ma tu atae naatam̃oli waia tokora waina e pae asa umai: ma ragi waina Kristo ega wo umai, te naata sikai ega wo da atae tokora waina e pae asa umai.

²⁸Nalakena tea wanogoe Yesu e pioso roara ni nasum̃a tapu, ragi waina e do pasa piseiki, po naga, Ku atae au, go ku atae tokora waina a pae asa umai: go a da dum̃agu umai mau, ma tea waina e dip̃aki lua au umai e pei lomau, waina nimu ku da atae a mau.

²⁹Ma kinau a atae a, nalakena a m̃elu asa umai, go nae e dip̃aki lua au umai.

³⁰Nalakena tea wanogoe eu laaga naga euga vua soki a: go te naata sikai e da nadi ki nam̃elearuna asa mau, nalakena aura aneana e ko da umai mau.

³¹Ma taua ni naatam̃oli maga tea laapa kakada eu saralomau asa; go eu naga, Ragi waina Kristo ega wo umai, ega wo mari navaivaiana laapa liu tea maga waina naatam̃oli waia e mari a kite?

³²Farisi maga eu dogo taua ni naatam̃oli maga eu do dauruuru tea maga wanogoe nalo kakana; go tea viri warua maga go Farisi maga eu dip̃aki lua tasiga maga naga euga vua soki a.

³³Nalakena tea wanogoe Yesu e naga, Ragi kiki aga ko sikoti mu doko, go aga wo pano punusi tea waina e dip̃aki lua au umai.

³⁴Kuga wo laaga au, go kuga wo da pap̃ai au mau: go tokora waina kinau aga toko asa, nimu ku da mari atae umai paki asa mau.

³⁵Nalakena tea wanogoe navarapule maga ni Yudea eu dum̃ada noa ki da, eu naga, Naatam̃oli waia e naga ega vaki esava, naga nigida tuga wo da pap̃ai a mau? E naga ega va punusi tea maga waina eu pei taperavera sari naka ni Hellas, po pasapiseiki naka ni Hellas kite?

³⁶Navasaana wanogoe waina e noae epei nasava, e naga, Kuga wo laaga au, go kuga wo da pap̃ai au mau: go tokora waina kinau aga toko asa, nimu ku da mari atae umai paki asa mau?

³⁷Go naaleatia edaku, tea warua ni nasaisaiana wanogoe, Yesu e lawodu po pioso, e naga, Te naata sikai e pe madou, ega umai punusi au po munu.

³⁸Tea waina e saralomau au, noai sara maga ni noai mauri euga wo sara dave nap̃alauna pano, ega tapala waina navasaana midiriana e noa e.

³⁹Ma e noa tea wanogoe nalo ni Naatana, waina tea maga waina eu saralomau asa euga wo dape a: nalakena Naatana e ko da doko mau; nalakena Yesu e ko da pei tea samasamaniana mau.

⁴⁰Nalakena tea wanogoe taua ni naatam̃oli maga seara kakada, ragi waina eu dogo navasaana maga wanogoe, eu naga, Tea waia e pei profeta waina lomau.

⁴¹Tea p̃ota seara eu naga, Tea waia e pei Kristo. Ma te seara eu naga, Ee, Kristo e pae Calilea umai kite?

⁴²Navasaana midiriana e da noa naga Kristo e pei tea ni nawora ni David, po pae Bethlehem umai, natokoana kiki waina David e doko asa kite?

⁴³Nalakena tea wanogoe natap̃otaeana sikai e pakilina m̃aleoputo ni taua ni naatam̃oli maga nalakena nae.

⁴⁴Go te seara kakada eu masauna naga euga vua soki a; ma te naata sikai e da nadi ki nam̃elearuna maga asa mau.

⁴⁵Nalakena tea wanogoe tasiga maga wanogoe eu rumai punusi tea viri warua maga go Farisi maga; go nara eu noa ki da, eu naga, Ekasana ku da piragi a umai mau?

⁴⁶Tasiga maga wanogoe eu pasa dara, eu naga, Te naatam̃oli e da pasa dapalana te ragi mau.

⁴⁷Nalakena tea wanogoe Farisi maga eu pasa dara, eu naga, Nimu ma ku pei tea viragisasap̃okiana kite?

⁴⁸Tea maraki maga sikai kakada e saralomau asa kite? Kite Farisi maga sikai kakada?

⁴⁹Ma taua waia ni naatam̃oli maga waina eu da atae nawotaeana mau eu pei tea vasasakiana.

⁵⁰Nikodemo e noa ki da (nae waina e umai punusi a sala vea, e pei sikai kakada),

⁵¹e naga, Nawotaeana anigida, e pe ta pea dogo ki naatam̃oli sikai, go e pe ta atae tea waina e do mari a mau, e pe vasa p̃otae a kite?

⁵²Eu pasa dara po noa ki nia, eu naga, Nigo ma ku pei tea ni Calilea kite? P̃a midoaki usiusi po punusi naga te profeta sikai e da pakilina m̃elu Calilea mau.

⁵³Go sara naatam̃oli eu sikasikai paki nasum̃a adeada pano: ma Yesu e paki tava ni Oliva pano.