Read Nguna Togoa Etafe North YOANE 9 Bible Online

YOANE 9 - Nguna Togoa Etafe North bible

YOANE 9

¹Go ragi waina e do liu pano, e punusi naatam̃oli kesa sikai waina e kesa pakilina.

²Go tea vasapiseikiana aneana maga eu pusuusu paki nia, eu naga, Rabbi, sei e mari naleo sa, naatam̃oli waia, kite tamana go p̃ilana, naga e kesa pakilina?

³Yesu e pasa dara, e naga, Naatam̃oli waia e da mari naleo sa mau, go tamana go p̃ilana ero da mari naleo sa mau: ma e dapalana naga nawosiana maga ki Sup̃e euga vei tea mariana euga toko lina asa.

⁴E one gida one naga tuga wosiwosi ki nawosiana maga ki tea waina e dip̃aki lua au umai, ragi waina e ko pei aleati: p̃ogi e do umai, waina te naata sikai e da mari atae p̃osiwosi asa mau.

⁵Ragi waina a doko maramana, a pei namarama ni maramana.

⁶Ragi waina e noa sua tea wanogoe, e daniu natano, po mari nalepa ki nataniuana, po puluti namatana maga ki nalepa,

⁷po noa ki nia, e naga, P̃a vano, p̃a sarue namatam̃a lukunoai‐ava ni Siloam (waina e pei tea vasadoaana e pei, Tea Tip̃akiluaana). Nalakena tea wanogoe e pano, po sarue namatana po leosai umai.

⁸Nalakena tea wanogoe tea ni m̃aladigi maga, go tea maga waina eu punusi a sala vea, naga e pei tea tatago sikai, eu naga, Naatam̃oli waia e da pei tea waina e do natano po datago kite?

⁹Tea p̃ota seara eu naga, E pei nae: tea p̃ota seara eu naga, Ee, ma e dakiusi a.

¹⁰Nae e naga, Kinau a pei nae. Nalakena tea wanogoe eu noa ki nia, eu naga, Namatam̃a maga ero pei tea wolagatiana dapale sava?

¹¹Nae e pasa dara, e naga, Naatam̃oli waina e pei tea sosoana ki Yesu a mari nalepa, po puluti namatagu maga, po noa ki nau, e naga, P̃a vaki Siloam pano, po sarue namatam̃a: nalakena tea wanogoe a pano po sarue namatagu, go a leosai.

¹²Go eu noa ki nia, eu naga, Nae e doko esava.? E naga, A da atae a mau.

¹³Eu piragi tea waina e kesa sala vea umai punusi Farisi maga.

¹⁴Go e pei sabbath naaleatia waina Yesu e mari nalepa asa, po p̃olagati namatana maga.

¹⁵Nalakena tea wanogoe Farisi maga ma eu moro pusuusu paki nia ki e leosai dapale sava? Go e noa ki da, e naga, E doropusi nalepa doko namatagu maga, go a sarue namatagu, go a leosai.

¹⁶Nalakena tea wanogoe Farisi maga seara kakada eu naga, Naatam̃oli waia e da m̃elu Sup̃e umai mau, nalakena e da dapugoro sabbath mau. Ma tea p̃ota seara eu naga, Naatam̃oli waina e pei tea mari naleo sa e mari atae mari navaivaiana maga dapalana dapale sava? Go natap̃otaeana sikai e doko m̃aleoputo kakada.

¹⁷Nalakena tea wanogoe eu noa ki tea kesa eu naga, Nigo ku noa nasava nalo kakana, waina e p̃olagati namatam̃a maga? Go e naga, E pei profeta sikai.

¹⁸Nalakena tea wanogoe navarapule maga ni Yudea eu da saralomau nalo kakana mau, naga e pei tea kesa, po leo sai, pa pa eu soso tama ni go p̃ila ni tea waina e po leo sai, po pusuusu paki da,

¹⁹po naga, Tea waia e pei natumu, waina nimu koro noa naga e kesa pakilina kite? Go e leo sai ragi waia dapale sava?

²⁰Tamana go p̃ilana ero pasa dara po naga, Aro atae naga tea waia e pei natugami, go naga e kesa pakilina:

²¹ma dapale sava e leo sai ragi waia, aro da atae a mau: kite sei e p̃olagati namatana maga, kinami aro da atae a mau: kuga vusuusu paki nia; e pei tea matua; nae ega wo dum̃ana pasa nalo kakana.

²²Tamana go p̃ilana ero noa dapala nogoe, nalakena ero matau ki navarapule maga ni Yudea: nalakena navarapule maga ni Yudea eu saisai ki sua navasaana, naga te naata sikai e pe noa sai naga nae e pei Kristo, ega vei tea mariana ega toko etaku ni nasum̃a ni nasaisaiana.

²³Nalakena tea wanogoe tamana go p̃ilana ero naga, E pei tea matua; kuga vusuusu paki nia.

²⁴Nalakena tea wanogoe, eu soso sala kerua naatam̃oli waina e pei tea kesa, po noa ki nia, eu naga, P̃a tua Sup̃e nasamasamaana: kinami au atae naga naatam̃oli waia e pei tea mari naleo sa.

²⁵Nalakena tea wanogoe nae e pasa dara, e naga, E pe vei tea mari naleo sa, a da atae a mau: a atae tea sikai maau, naga a pei tea kesa, po leosai ragi waia.

²⁶Nalakena tea wanogoe eu noa ki nia, eu naga, E manigo mari nasava? E p̃olagati namatam̃a maga dapale sava?

²⁷E pasa dara ra, e naga, A noa ki sua mu asa, go ku da dogo mau: ekasana ku masauna naga kuga moro dogo e? Nimu ma ku masauna naga kuga vei tea vasapiseikiana aneana maga kite?

²⁸Go eu suori a, po naga, Nigo ku pei tea vasapiseikiana aneana: ma kinami au pei tea vasapiseikiana maga ki Moses.

²⁹Kinami au atae naga Sup̃e e pasa ki Moses: ma naatam̃oli waia au da atae tokora waina e pae asa umai mau.

³⁰Naatam̃oli wanogoe e pasa dara po noa ki da, e naga, Tea waia e pei tea ni namagaana, naga nimu ku da atae tokora waina e pae asa umai mau, go e p̃olagati namatagu maga.

³¹Tu atae naga Sup̃e e da dogo tea mari naleo sa maga mau: ma te naata sikai e pe vei tea lotu ki Sup̃e, po do mari namasauana aneana, e pe rogo naata wanogoe.

³²Pae ragi vea ni maramana pa pa e da pei tea rogoana mau naga te naata sikai e p̃olagati namata maga ni tea waina e kesa pakilina.

³³Naatam̃oli waia e pe ta m̃elu Sup̃e umai mau, e pe ta mari atae mari te navatuna mau.

³⁴Eu pasa dara po noa ki nia, eu naga, Nigo ku pei tea mari naleo sa usuraki pakilina, go nigo ku pasa piseiki gami kite? Go eu nadi ki nia paki etaku.

³⁵Yesu e dogo naga eu nadi ki nia paki etaku; go e pap̃ai a, po noa ki nia, e naga, Nigo ku saralomau Sup̃e Natuna kite?

³⁶Nae e pasa dara po naga, Go e pei sei, Nawota, naga aga saralomau asa?

³⁷Yesu e noa ki nia, e naga, Ku po punusi a, go tea waina e do pasa sikoti ko e pei nae.

³⁸Go e naga, A saralomau, Nawota.

³⁹Go e lotu ki nia. Go Yesu e naga, Kinau a umai paki maramana waia raki navasap̃otaeana, naga tea maga waina eu da leo sai mau euga leo sai; go naga tea maga waina eu leo sai euga vei tea mariana euga kesa.

⁴⁰Farisi maga seara kakada waina eu sikoti a doko, eu dogo tea maga wanogoe, go eu noa ki nia, eu naga, Kinami ma au kesa kite?

⁴¹Yesu e noa ki da, e naga, Ku pe kesa, ku pe ta peani namarinaleosaana mau: ma ragi waia ku naga, Au leo sai: namarinaleosaana animu e doko.