Read Nguna Togoa Etafe North APOSTOLO MAGA 1 Bible Online

APOSTOLO MAGA 1 - Nguna Togoa Etafe North bible

APOSTOLO MAGA 1

¹A mari tusi vea waina, Theofilo, nalo ni tea maga mamau puti waina Yesu e atulake mari ra po pasapisei ki ara,

²pa pa paki naaleatia waina e pei tea tapeana sake asa, ragi waina e dip̃aki sua pae Naatana Tapu apostolo maga waina e matadoa ra:

³e moro lawodu naraeda e mauri edaku ki e sua navitinumateana aneana, navaivaiana kakana eu laapa, e do pakilina ki da naaleatia rualima pati, po do noa ki da naleo maga nalo ni namarakiana ki Sup̃e:

⁴go ragi waina nae ma nara eu mamau saisai, e pasa parati ki da naga euga ta m̃elu dua ki Yerusalem pano mau, ma naga euga toko raki nasaiana ki Tamana, waina, e noa e, ku dogo e kiagu:

⁵nalakena Yoane e bapetiso lomau ki noai; ma naaleatia eu da laapa mau eu ko puoli go nimu kuga wo pei tea bapetisoana ki Naatana Tapu.

⁶Nalakena tea wanogoe ragi waina eu saisai doko, eu pusuusu paki nia, eu naga, Nawota, p̃a wo magi Israel dape namarakiana liliu ragi waia kite?

⁷Go e noa ki da, E da pei tea animu mau naga kuga atae ragi maga kite sala maga waina Tamagu e lawo ki da eu doko naveinawotaana aneana.

⁸Ma kuga wo dape nakasuaana ragi waina Naatana Tapu ega wo umai doko mu: go kuga wo pei tea noasokisoki aginau maga Yerusalem, go Yudea mamau, go Samaria, go pa pa paki namatap̃ago ni maramana.

⁹Go ragi waina e noa sua tea maga wanogoe, go nara eu do leo punusi, e pei tea tapeana sake; go napopouru sikai e dape lua e ki namatada.

¹⁰Go ragi waina eu do leo sokisoki paki nakoroatelagi, go nae e do pano, kuga leo, naatam̃oli dua ero lawodu pisari ra waina ero suni sugoro tare maga;

¹¹go waina ero naga, Naatam̃oli ni Calilea maga, ekasana ku lawodu po do leo paki nakoroatelagi? Yesu waia, waina e pei tea tapeana sake m̃elu dua ki mu paki nakoroatelagi pano, ega wo umai dapala waina ku punusi a e paki nakoroatelagi pano.

¹²Ragi wanogoe eu liliu paki Yerusalem pae tava waina e pei tea sosoana ki Oliva, waina e pei m̃aladigi ki Yerusalem, nasurataana ni sabbath sikai.

¹³Go ragi waina eu rumai sili asa, eu sake paki ekopu ni em̃ago ni tagona ni elagi, waina eu doko asa doko; Petero go Yoane go Yakobo go Anderea, Filipo go Toma, Bartolomaio go Mataio, Yakobo natu ni Alefaio, go Simon Selote, go Yuda natu ni Yakobo.

¹⁴Tea maga mamau puti wanogoe eu do dapasavasa pitip̃atip̃a, nap̃op̃oda sikai maau asa, nara ma nagoroi seara, go Maria Yesu p̃ilana, go taina maga.

¹⁵Go Petero e duleana naaleatia maga wanogoe m̃aleop̃uto ni taigida maga, (go taua sikai ni naatam̃oli maga eu saisai doko, eu alagoro pei p̃onotia sikai rualima takuna dua),

¹⁶e naga, Taigu maga, e one navasaana midiriana one naga ega lolomana, waina Naatana Tapu e pea noa e pae nawoka ni David nalo ni Yuda, waina e maraki pae napua tea maga waina eu pua soki Yesu.

¹⁷Nalakena e pei tea veveana e pei sikai kakagida, po dape namagovai ni nasuasuaana waia.

¹⁸(Go nae e pakotovi vanua sikai ki namoriana ni namarinaleotageleana; po dowo dap̃olosiwo, go nap̃alauna e lotu po mapua, go namaritana eu pevera puti.

¹⁹Go tea wanogoe e pei tea ataeana paki tea maga mamau puti waina eu doko Yerusalem doko; dapala waina vanua wanogoe e pei tea sosoana pae navasaana adeada ki Akeldama, waina e pei, Vanua ni nada.)

²⁰Nalakena e pei tea midiriana tusi ni Salamo maga, Nasum̃a aneana ega vei tea mariana ega vei maso maladi, Go te naata ega ta doko asa mau: go, Navei‐tea‐leo‐parati‐kiana aneana tea p̃ota sikai ega tape a.

²¹Nalakena tea wanogoe naatam̃oli maga waina eu sikoti gida doko ragi mamau waina Nawota Yesu e paki ekopu po paki katama m̃aleoputo kakagida,

²²e atulake pae nabapetisoana ki Yoane, pa pa paki naaleatia waina e pei tea tapeana sake m̃elu dua ki gida asa, tea maga wanogoe sikai kakada e one asa one naga ega vei tea noasokisoki sikoti gida ni namoroduleanaana aneana.

²³Go eu mari edua ero lawodu, Yosef tea sosoana ki Barsabba, waina e pei tea salagisana ki Yusto, go Mattia.

²⁴Go eu dapasavasa, po naga, Nigo, Nawota, waina ku atae nap̃op̃o ni naatam̃oli maga mamau puti, p̃a visei ki gami naatam̃oli dua waia ku po matadoa,

²⁵seve tea kakada, naga ega tape tokora ni nasuasuaana waia go ni navei‐apostolo‐ana, waina Yuda e dawasi pa dua ki nia pano, naga ega vaki tokora aneana pano.

²⁶Go eu madeada pitua ki gole maga; go gole e dowo Mattia; go e pei tea veveana sikoti apostolo rualima sikai tamate sikai.