Read Nguna Togoa Etafe North APOSTOLO MAGA 10 Bible Online

APOSTOLO MAGA 10 - Nguna Togoa Etafe North bible

APOSTOLO MAGA 10

¹Go naatam̃oli sikai e doko Kaisarea, nagisana Kornelio, senturio sikai ni taua ni naatam̃oli maga ni navakalo, waina e pei tea sosoana ki taua ni Italia,

²tea lotu p̃ia sikai, tea matauki Sup̃e nara ma nasum̃a mamau aneana eu mamau, waina e magi narei mari navituam̃olikiana laapa, po dapasavasa paki Sup̃e sara ragi.

³E punusi pae navunusiana marama sikai, e alagoro pei aura keloveti ni naaleatia, agelo ki Sup̃e sikai waina e umai paki ekopu punusi a, po noa ki nia, Kornelio.

⁴Go nae e leo soki a, go e mataku, po naga, E pe nasava, nawota? Go e noa ki nia, Natapasavasaana anigo maga go navituam̃olikiana anigo maga eu sake paki narae ni Sup̃e naga p̃a vei tea midoakiana ara.

⁵Go ragi waia p̃a tip̃aki lua naatam̃oli seara euga vaki Yoppa, po pitautau tea sikai Simon waina e pei tea sosoana ki Petero:

⁶nae e m̃enaki sikoti tea sikai Simon tea wosiwosi ki nawili maga, waina nasum̃a aneana e doko pisari natasi.

⁷Go ragi waina agelo waina e pasa ki nia e pano, e soso tea suasua maga ni nasum̃a aneana edua kakada, go naatam̃oli ni navakalo lotu p̃ia sikai ni tea maga waina eu do doko raki nia pitip̃atip̃a;

⁸go e dogorogo paki da ki naleo maga mamau puti, po dip̃aki lua ra paki Yoppa pano.

⁹Go matamai ki nia, ragi waina eu surata napua, po umai paki m̃aladigi ki natokoana, Petero e sake paki nap̃au ni nasum̃a naga ega tapasavasa, e alagoro pei aura kelatesa:

¹⁰go e pitolo, po masauna naga ega kanikani: ma ragi waina eu do marim̃ata ki navinaga, nasaram̃akotoana sikai e pakilina ki nia;

¹¹go e leopunusi nakoroatelagi e pamawota, go lasa sikai e siwo, e dapala nakulukulu p̃elewelea warua sikai, waina e pei tea toroana ki namatap̃agona pati paki maramana:

¹²waina sara naleo visarasara eu doko asa, tea tuavati maga go tea kakaravi maga ni maramana go manu maga ni nakoroatelagi.

¹³Go nadaleo sikai e umai paki nia, e naga, P̃a tuleana, Petero; p̃a mari punue po ganikani.

¹⁴Ma Petero e naga, Ee, Nawota; nalakena a ko da gani te navatuna waina e pei tea m̃oli go tea loa te naaleatia mau.

¹⁵Go nadaleo sikai e moro umai paki nia sala kerua, e naga, Tea waina Sup̃e e mari a e dautau, nigo p̃a ta mari a e pei tea m̃oli mau.

¹⁶Go tea wanogoe e pei tea mariana paka tolu: go lasa wanogoe e m̃araverave pei tea tapeana sake paki nakoroatelagi pano.

¹⁷Go ragi waina Petero e midoaki putuaki p̃arua nap̃alauna, navunusiana waina e punusi a ega vei nasava? Kuga leo, naatam̃oli maga waina eu pei tea tip̃akiluana pae Kornelio, eu pusuusu ki sua nasum̃a ki Simon, go eu lawodu narae ni namata‐pua,

¹⁸po pioso po pusuusu ki Simon waina e pei tea sosoana ki Petero, e m̃enaki tokora waia kite?

¹⁹Go ragi waina Petero e do midoaki navunusiana wanogoe, Naatana e noa ki nia, e naga, P̃a leo, naatam̃oli dolu eu laaga ako.

²⁰Ma p̃a tuleana, po siwo, po surata sikoti ra pano, po da midoaki sara mau: nalakena kinau a po dip̃aki lua ra umai.

²¹Go Petero e siwo punusi naatam̃oli maga wanogoe, po naga, Kuga leo, kinau a pei tea waina ku laaga asa: nasava e pei nalakena ku po umai asa?

²²Go nara eu naga, Kornelio senturio sikai, naatam̃oli leana go waina e matauki Sup̃e, go waina e pei tea noasokisokiana pae nalauna mamau ki naka ni Yudea, Sup̃e e noa ki nia pae agelo tapu sikai naga ega vitautau ako paki nasum̃a aneana, go naga ega rogo navasaana maga kiam̃a.

²³Nalakena tea wanogoe e soso ra paki ekopu po dua ra nam̃enakiana. Go matamai ki nia e duleana po dave sikoti ra pano, go taigida maga ni Yoppa seara kakada eu mamau pano.

²⁴Go matamai ki nia eu sili Kaisarea. Go Kornelio e do leogoro ra, e soso saisai ki sua namatarau aneana maga go tana ri wia maga.

²⁵Go ragi waina Petero e paki ekopu, Kornelio e sua e, po dowo paki nam̃elena maga po lotu ki nia.

²⁶Ma Petero e sike a, po naga, P̃a tuleana; kinau ma a pei naatam̃oli sikai.

²⁷Go ragi waina ero dum̃ada pasa ki da, e paki ekopu, po pap̃ai tea laapa waina eu saisia doko: go e noa ki da,

²⁸Nimu ku dum̃amu atae naga naatam̃oli ni Yudea sikai e pe ta sikoti, kite umai punusi tea ni nalauna p̃ota mau; go Sup̃e e pisei ki nau naga aga ta soso te naatam̃oli sikai ki tea m̃oli kite tea loa mau:

²⁹nalakena tea wanogoe a suasua umai ragi waina a pei tea vitautauana. Nalakena tea wanogoe a pusuusu ki tea waina e pei nalakena ku pitautau au umai.

³⁰Go Kornelio e naga, Nam̃ogi pati, pa pa paki aura waia, a do dapasavasa aura keloveti nasum̃a aginau; go p̃a leo, naatam̃oli sikai e lawodu naraegu waina e suni sugoro maramalaga,

³¹po naga, Kornelio, natapasavasaana anigo e pei tea rogoana, go navituam̃olikiana anigo maga eu pei tea midoakiana namata ni Sup̃e.

³²Nalakena tea wanogoe p̃a tip̃aki lua paki Yoppa, po soso Simon, waina e pei tea sosoana ki Petero, ega umai punusi ko; nae e m̃enaki nasum̃a ki Simon tea wosiwosi ki nawili maga, pisari natasi.

³³Nalakena tea wanogoe a m̃araverave dip̃aki lua punusi ko, go nigo ku mari p̃ia naga ku umai. Nalakena tea wanogoe ragi waia au mamau puti doko nea namata ni Sup̃e, naga auga rogo naleo maga mamau puti waina eu pei tea tip̃akiana paki‐go pae Yehovah.

³⁴Go Petero e p̃olagati nawokana, po naga. A midoaki atae lomau naga Sup̃e e da pei tea viragi narae mau:

³⁵ma sara nalauna naata waina e matau ki nia, po mari namarinaleoleanaana, e pei tea viragiana aneana.

³⁶Navasaana waina e dip̃aki lua e dua Israel natuna maga asa, po dogorogo ki narogorogoana wia ni natam̃ateana pae Yesu Kristo (nae e pei Nawota ki tea maga mamau puti)

³⁷nanoaana wanogoe nimu ku dum̃amu atae a, waina e pei tea rogorogokiana usuraki Yudea mamau, e atulake pae Calilea, edaku ki nabapetisoana waina Yoane e dogorogo ki nia;

³⁸Yesu ni Nasareth, dapala waina Sup̃e e puvurai ki nia ki Naatana Tapu go ki nakasuaana: waina e surata usuraki po do mari m̃ataki, po do mari pauri tea maga mamau puti waina eu pei tea marimatuakiana pae diabolo; nalakena Sup̃e e sikoti a doko.

³⁹Go kinami au pei tea noa sokisoki maga ni tea maga mamau puti waina e mari ra navanua ki naka ni Yudea, go Yerusalem; go waina eu mari punue a, eu sara ki nia nakau.

⁴⁰Nae wanogoe Sup̃e e sike a e duleana naaleatia ketolu, po pitua ki nia naga ega vakilina,

⁴¹e da pakilina ki narei mamau mau, ma e pakilina ki tea noa sokisoki seara waina eu pei tea vea matadoaana pae Sup̃e, kinami, waina au ganikani po munu sikoti a edaku ki e duleana m̃elu dua ki tea mate maga.

⁴²Go e dip̃aki gami naga auga dogorogo paki narei, po noa sokisoki kasua naga nae e pei tea waina e pei tea tawonakiana pae Sup̃e naga ega vei Tea Vasap̃otae ni tea mauri go tea mate maga.

⁴³Nae wanogoe profeta maga mamau puti eu maneana noasokisoki, naga sara naata waina eu saralomau asa euga wo dape namidoakikorokoroana ni namarinaleosaana maga pae nagisana.

⁴⁴Ragi waina Petero e ko do pasa navasaana maga wanogoe, Naatana Tapu e lawo tea maga mamau puti waina eu dogo navasaana.

⁴⁵Go tea ni natovadaviviana maga waina eu saralomau eu saram̃akoto, tea maga waina eu sikoti Petero umai, nalakena navituam̃olikiana ni Naatana Tapu e pei tea takiana paki tea ni nalauna p̃ota maga.

⁴⁶Nalakena eu dogo ra eu pasa ki namena maga, po pasa samasamani Sup̃e.

⁴⁷Ragi wanogoe Petero e pasa dara, e naga, Te naata sikai e mari atae dip̃agoro noai naga nara euga ta pei tea bapetisoana mau, waina eu po dape Naatana Tapu, dakiusi waina kinami ma au dape a kite? Go e dip̃aki da naga euga vei tea bapetisoana pae nagisa ni Yesu Kristo.

⁴⁸Ragi wanogoe eu pavarani a naga ega toko naaleatia seara.