Read Nguna Togoa Etafe North APOSTOLO MAGA 11 Bible Online

APOSTOLO MAGA 11 - Nguna Togoa Etafe North bible

APOSTOLO MAGA 11

¹Go apostolo maga go taigida maga waina eu doko Yudea doko eu dogo naga tea ni nalauna p̃ota maga eu dape navasaana ki Sup̃e.

²Go ragi waina Petero e sake umai paki Yerusalem, tea ni natovadaviviana maga eu pululu ki nia,

³po naga, Ku paki ekopu punusi naatam̃oli maga waina eu da pei tea tovadaviviana mau, go ku ganikani sikoti ra.

⁴Ma Petero e atulake, po pasa lawolawo ki nia paki da.

⁵Po naga, Kinau a doko natokoana ni Yoppa po dapasavasa: go a saram̃akoto po punusi navunusiana sikai, lasa sikai e siwo, e dakiusi nakulukulu p̃elewelea warua sikai waina e pei tea toroana ki namatap̃agona pati pae nakoroatelagi pakitano;

⁶go e umai paki nau; go ragi waina a leo soki a, a leo usiusi, po punusi tea tuavati maga ni maramana go tea mila maga go tea kakaravi maga go manu maga ni nakoroatelagi.

⁷Go a dogo nadaleo sikai waina e noa ki nau, P̃a tuleana, Petero; p̃a mari punue po ganikani.

⁸Ma kinau a naga, Ee, Nawota: nalakena te navatuna waina e pei tea m̃oli kite tea loa e ko da sili paki nawokagu te naaleatia mau.

⁹Ma nadaleo sikai e pasa dara sala kerua pae nakoroatelagi, e naga, Tea waina Sup̃e e mari a e dautau, nigo p̃a ta mari a e pei tea m̃oli mau.

¹⁰Go tea wanogoe e pei tea mariana paka tolu: go tea maga mamau puti eu moro pei tea vuatiana sake paki nakoroatelagi pano.

¹¹Go kuga leo, naatam̃oli dolu eu m̃araverave lawodu narae ni nasum̃a waina au doko asa, eu pei tea tip̃akiluaana pae Kaisarea umai punusi au.

¹²Go Naatana e noa ki nau naga aga sikoti ra pano, po da mari p̃otawotae mau.

¹³Go taigida latesa waia eu sikoti au pano; go au paki ekopu ni nasum̃a ki naatam̃oli wanogoe: go e dogorogo paki gami ki dapala waina e punusi agelo e lawodu ekopu ni nasum̃a aneana, po naga, P̃a tip̃aki lua paki Yoppa, po pitautau Simon waina e pei tea sosoana ki Petero;

¹⁴waina ega wo pasa paki‐go navasaana maga waina p̃a wo pei tea mautipauriana asa, nimu ma nasum̃a mamau anigo.

¹⁵Go ragi waina kinau a atulake navasaana, Naatana Tapu e lawo ara, dakiusi waina e lawo gida ragi ni naatulakeana.

¹⁶Go a midoaki navasaana ki Nawota, dapala waina e naga, Yoane e bapetiso lomau ki noai; ma nimu kuga wo pei tea bapetisoana ki Naatana Tapu.

¹⁷Go Sup̃e e pe tua ra navituam̃olikiana pataka ni tea waina e dua gida asa, ragi waina tu saralomau Nawota Yesu Kristo, kinau a pei sei naga aga mari atae dugoro Sup̃e?

¹⁸Go ragi waina eu dogo tea maga wanogoe, eu punuta, po pasasamasamani Sup̃e, po naga, Go Sup̃e e dua tea ni nalauna p̃ota maga namidoakidoaana paki namauriana.

¹⁹Go tea maga waina eu pei tea taperaverakiana nalakena nariesokiana waina e pakilina nalo ni Stefano eu surata usuraki pa pa paki Foinike, go Kupero, go Antiokia, eu do pasa navasaana paki tea ni Yudea eu sikida.

²⁰Ma seara kakada eu pei naatam̃oli ni Kupero go ni Kurene, go ragi waina eu rumai paki Antiokia, eu pasa paki naka ni Hellas, po dogorogo ki Nawota Yesu.

²¹Go nam̃elearu ni Nawota e sikoti ra doko: go taua warua sikai waina eu saralomau eu maradoa paki Nawota.

²²Go navasaana nalo kakada e pei tea rogoana pa pa paki nadaliga ni ekalesia waina eu doko Yerusalem: go eu dip̃aki lua Barnaba naga ega surata pano pa pa paki Antiokia: go nae,

²³ragi waina e umai, po punusi nasaup̃iaana ki Sup̃e, e laelaea; go e pasa paratiki puti ra, naga euga vuluti Nawota ki namidoakisokiana ni nap̃op̃oda:

²⁴nalakena e pei naatam̃oli wia sikai, go e pura ki Naatana Tapu go nasaralomauana: go taua warua sikai ni naatam̃oli maga eu sokari Nawota.

²⁵Go e surata paki Tarso pano naga ega laaga Saul: go ragi waina e pap̃ai a, e piragi a umai paki Antiokia.

²⁶Go e pakilina, naga ero do saisai sikoti ekalesia natau mamau sikai po pasa piseiki taua warua sikai ni naatam̃oli maga: go tea vasapiseikiana maga eu pea pei tea sosoana ki Kristian maga Antiokia.

²⁷Go naaleatia maga wanogoe profeta seara eu pae Yerusalem siwo umai paki Antiokia.

²⁸Go sikai kakada e duleana, nagisana Acabo, po paivai pae Naatana naga navitoloana warua sikai e one asa one naga ega wo doko usuraki maramana mamau; waina e pakilina naaleatia maga ki Klaudio.

²⁹Go tea vasapiseikiana maga eu midoaki dawonaki naga euga mamau puti, ega takiusi waina sara naata kakada eu peani a, dip̃aki lua nasilaeana dua taida maga asa waina eu doko Yudea doko:

³⁰go eu mari a, eu dip̃aki lua e paki tea matua maga pae nam̃elearu ni Barnaba go Saul.