Read Nguna Togoa Etafe North APOSTOLO MAGA 13 Bible Online

APOSTOLO MAGA 13 - Nguna Togoa Etafe North bible

APOSTOLO MAGA 13

¹Go profeta seara go tea vasapiseiki seara eu doko Antiokia, tea ni ekalesia kakana, Barnaba, go Simeon waina e pei tea sosoana ki Nicer, go Lukio ni Kurene, go Manaen waina e pei tea vakaleana sikoti Herod tetrarke, go Saul.

²Go ragi waina eu magi Yehovah suasua, po pali, Naatana Tapu e naga, Kuga maginau mari masale ki Barnaba go Saul raki nawosiana waina a soso ra paki asa.

³Ragi wanogoe, ragi waina eu pali po dapasavasa sua po pusake sua nam̃elearuda ara, eu dip̃aki lua ra.

⁴Dapala nogoe nara, waina ero pei tea tip̃akiluaana pae Naatana Tapu, ero siwo paki Seleukia pano; go ero porau pae tokora wanogoe paki Kupero pano.

⁵Go ragi waina ero doko Salami, ero dogorogo ki navasaana ki Sup̃e ekopu ni nasum̃a ni nasaisaiana maga ki tea ni Yudea: go ero peani Yoane e pei tasiga adeada.

⁶Go ragi waina ero surata duaduru sua naure mamau paki Pafo pano, ero pap̃ai naatam̃oli sikai waina e pei munuai, profeta sorosoro sikai, tea ni Yudea, nagisana Bar‐Yesu;

⁷waina e sikoti tea maramara doko, Sercio Paulo, naatam̃oli midoaki atae sikai. Nae e soso Barnaba go Saul ero umai punusi a, po masauna naga ega rogo navasaana ki Sup̃e.

⁸Ma Elima munuai wanogoe (nalakena nagisana e pei tea vasadoaana dapala nogoe) e lawo dugoro ra, e laaga naga ega vua doa tea maramara pa dua ki nasaralomauana.

⁹Ma Saul, waina ma e pei Paulo, e pei tea vakavuroana ki Naatana Tapu, po leo soki a,

¹⁰po naga, Tea vura ki sara nasorosoroana go sara nasigisigileoana, natu ni diabolo, tea kokona ki sara namarinaleoleanaana, p̃a wo da makoto ki navuadoaana ni napua leana maga ki Yehovah kite?

¹¹Go p̃a leo, ragi waia nam̃elearu ni Yehovah e doko ako, go p̃a wo kesa, p̃a wo da punusi elo mau pa pa paki te ragi. Go namavu sikai go namaligo sikai ero dowo asa m̃araverave; go e surata daliepu, e laaga te seara waina euga vuati nam̃elearuna pano.

¹²Ragi wanogoe tea maramara, ragi waina e punusi tea waina e pei tea mariana, e saralomau, go e saram̃akoto navasapiseikiana ki Yehovah.

¹³Go Paulo go tea maga waina eu sikoti a doko eu porau pae Pafo po umai paki Perca ni Pamfilia: go Yoane e m̃elu dua ki da pano, po liliu umai paki Yerusalem.

¹⁴Ma nara, eu surata duaduru pae Perca, po umai paki Antiokia ni Pisidia; go ero paki ekopu ni nasum̃a ni nasaisaiana naaleatia ni sabbath, po do natano.

¹⁵Go edaku ki naveveana ni nawotaeana go profeta maga tea maraki maga ni nasum̃a ni nasaisaiana eu dip̃aki lua pa punusi ra, po naga, Taigami maga, koro pe veani te navasaana ni navasaparatikiana paki narei, koroga noa e.

¹⁶Go Paulo e duleana, po alosoki ki nam̃elearuna po naga. Naatam̃oli ni Israel maga, go tea maga waina ku matauki Sup̃e, kuga takidorogo.

¹⁷Sup̃e ki narei ni Israel waia, e matadoa tamagida maga, po sike narei eu pakilagi ragi waina eu m̃enaki‐atatoko navanua ni Ityipt, go e piragi lua ra ki aru sikeana sikai m̃elu dua ki nia pano.

¹⁸Go e dapetape pakale ra ragi ni natau eu alagoro pei rualima pati masop̃alo.

¹⁹Go ragi waina e mari matua ki sua nalauna larua navanua ni Kanaan, e dua ra navanua adeada naga euga veani a, e alagoro pei natau p̃onotia pati rualima takuna lima:

²⁰go edaku ki tea maga wanogoe e dua ra tea vasap̃otae maga pa pa paki Samuel profeta.

²¹Go eu edaku datago nawota sikai, go Sup̃e e dua ra Saul natu ni Kish, naatam̃oli sikai ni naworawora ni Benyamin, natau rualima pati.

²²Go ragi waina e dape lua sua e, e mari David e pakilina naga ega vei nawota adeada; waina e maneana noa sokisoki, po naga, A pap̃ai David natu ni Yesse, naatam̃oli sikai waina e pataka nap̃op̃ogu, waina ega wo mari namasauana aginau mamau puti.

²³Naatam̃oli wanogoe naworaworana Sup̃e e piragi sikai kakada pae nasaiana e magi Israel pei Tea Maumau pauri, Yesu;

²⁴ragi waina e ko da umai mau Yoane e pea dogorogo ki nabapetisoana ni namidoakidoaana paki narei ni Israel mamau.

²⁵Go ragi waina Yoane e do pakavuro nasavaana ni namalopa aneana, e naga, Ku midoa ki nia naga kinau a pei sei? Kinau a da pei nae mau. Ma kuga leo, tea sikai e umai edaku ki nau, waina a da p̃ia mau naga aga veresi nam̃elevasiana ni nam̃elena maga.

²⁶Taigu maga, naworawora ni Abraham natuda maga, go tea maga waina eu sari mu waina eu matauki Sup̃e, navasaana ni namautipauriana waia e manigida pei tea tip̃akiluaana umai.

²⁷Nalakena tea maga waina eu doko Yerusalem doko, go tea maraki adeada maga, nalakena eu da atae a mau, eu dip̃akotovi a, po mari nadaleo ni profeta maga waina eu pei tea veveana sara sabbath eu lolomana.

²⁸Go eu da pap̃ai te nalakena ni namateana asa mau, ma eu datagovi Pilato naga ega vei tea maripunueana.

²⁹Go ragi waina eu mari sua tea maga mamau puti waina eu pei tea midiriana nalo kakana, eu dape a e siwo m̃elu dua ki nakau, po doropusi a e one matigo sikai.

³⁰Ma Sup̃e e sike a e duleana m̃elu dua ki tea mate maga:

³¹go e pakilina naaleatia laapa ki tea maga waina eu sake sikoti a pae Calilea umai paki Yerusalem, waina eu pei tea noa sokisoki aneana maga paki narei ragi waia.

³²Go kinami aro dogorogo paki mu ki narogorogoana wia ni nasaiana waina e pei tea mariana paki tamagida maga,

³³naga Sup̃e e magi natugida maga mari a e lolomana, e sike Yesu e duleana; dakiusi waina e pei tea midiriana Salamo kerua, Nigo ku pei Natugu, kinau a pesi ko masoso.

³⁴Go nalo ni waina e sike a e duleana m̃elu dua ki tea mate, naga ega wo da moro liliu paki namesoana mau, e noa dapala waia, e naga, Aga wo dua mu tea tautau maga go tea lomau maga ki David.

³⁵Nalakena e moro noa doko Salamo p̃ota sikai, P̃a wo da pitua ki Tea Tautau anigo naga ega vunusi namesoana mau.

³⁶Nalakena David, ragi waina e magi tagona aneana suasua sua pae namidoakip̃otaeana ki Sup̃e, e maturu, po pei tea toropusiana sikoti tamana maga, po punusi namesoana:

³⁷ma tea waina Sup̃e e sike a e duleana e da punusi namesoana mau.

³⁸Nalakena tea wanogoe, taigu maga ega vei tea ataeana paki mu, naga namidoakikorokoroana ni namarinaleosaana maga pae naatam̃oli wanogoe e pei tea rogorogokiana paki mu:

³⁹go sara naata waina eu saralomau eu pei tea marileanakiana pae asa m̃elu dua ki naleo maga mamau puti, waina ku mari sa pei tea marileanakiana m̃elu dua ki da pae nawotaeana ki Moses.

⁴⁰Nalakena tea wanogoe kuga vunusi, naga tea waina e pei tea noaana tusi ki profeta maga, ega ta pakilina ki mu mau;

⁴¹Kuga leo, tea midoakip̃alo maga, go kuga maga, po puoli; Nalakena kinau a p̃osiwosi ki nawosiana sikai naaleatia animu maga, Nawosiana sikai waina te naata e pe rogorogo ki nia paki mu, ku pe ta saralomau asa mau.

⁴²Go ragi waina ero do dave pano, eu pavara naga navasaana maga wanogoe ega vei tea vasaana paki da sabbath m̃ogi larua.

⁴³Go ragi waina nasaisaiana e peravera, tea ni Yudea maga go proseluto lotu p̃ia maga tea laapa kakada eu dausi Paulo go Barnaba: waina ero do pasa ki da, po pasa die ra naga euga toko nasaup̃iaana ki Sup̃e doko.

⁴⁴Go sabbath waina e dausi a m̃aladigi natokoana wanogoe mamau eu pei tea saisaikiana naga euga rogo navasaana ki Sup̃e.

⁴⁵Ma ragi waina tea ni Yudea eu punusi taua maga ni naatam̃oli, eu pei tea vakavuroana ki naroitoiana, po pasa dugoro tea maga waina eu pei tea vasaana pae Paulo, po pasa sa ki.

⁴⁶Go Paulo go Barnaba ero pasa piviari, po naga, E one asa one naga navasaana ki Sup̃e ega vei tea vasaana pea paki mu. Ma nalakena ku dip̃a doa e, po dum̃amu pasa p̃otae mu naga ku da p̃ia ki namauriana waina e du mau du mau, kuga leo, au maradoa paki tea ni nalauna p̃ota maga.

⁴⁷Nalakena Yehovah e dip̃a ki gami dapala nogoe, e naga, A lawo ki‐go naga p̃a vei namarama agi tea ni nalauna p̃ota maga, Naga p̃a vei namautipauriana pa pa paki namatap̃ago ni maramana.

⁴⁸Go ragi waina tea ni nalauna p̃ota maga eu dogo tea wanogoe, eu laelaea, po pasa samasamani navasaana ki Sup̃e: go tea maga waina eu pei tea tawonakiana paki namauriana waina e du mau du eu saralomau.

⁴⁹Go navasaana ki Nawota e sokapule usuraki navanua wanogoe mamau.

⁵⁰Ma tea ni Yudea eu pasa die nagoroi lotu p̃ia tea dodomadaganiana maga, go naanoai vea maga ni natokoana po sike nakopaleleana sikai dip̃a Paulo go Barnaba, po nadi ki da ero m̃elu dua ki navanua adeada pano.

⁵¹Ma ero meseura ki nam̃otam̃ota ni nam̃eleda dip̃a ra po umai paki Ikonio.

⁵²Go tea vasapiseikiana maga eu pei tea vakavuroana ki nalaelaeaana go ki Naatana Tapu.