Read Nguna Togoa Etafe North APOSTOLO MAGA 14 Bible Online

APOSTOLO MAGA 14 - Nguna Togoa Etafe North bible

APOSTOLO MAGA 14

¹Go e pakilina ragi waina ero doko Ikonio naga ero dua paki ekopu ni nasum̃a ni nasaisaiana ki tea ni Yudea, po pasa dapala waina taua warua sikai ni tea ni Yudea go ni Hellas eu saralomau.

²Ma tea ni Yudea waina eu da saralomau mau eu sike naata maga ni tea ni nalauna p̃ota maga, po mari ra eu kokona ki taigida maga.

³Nalakena tea wanogoe ero doko parau doko tokora wanogoe po pasa piviari doko Nawota, waina e magi navasaana ni nasaup̃iaana aneana noa sokisoki, e pitua ki navaivaiana maga go tea ni namagaana maga naga euga vei tea mariana pae nam̃elearuda maga.

⁴Ma taua ni naatam̃oli maga ni natokoana wanogoe eu pei tea wotaeana; go te seara eu sikoti tea ni Yudea, go te seara eu sikoti apostolo maga.

⁵Ma ragi waina nasava‐umai‐ana sikai ki tea ni nalauna p̃ota maga go ki tea ni Yudea maga nara ma tea maraki adeada maga e pakilina, naga euga mari sa ki da po nadi ra ki vatu maga,

⁶ero atae a, po sava paki natokoana maga ni Likaonia, Listra go Derbe, go navanua waina e one daliviri:

⁷go tokora wanogoe ero dogorogo ki narogorogoana wia asa.

⁸Go naatam̃oli sikai e do natano Listra, waina nam̃elena ero manainai, e pei pito pae nap̃ele ni p̃ilana, waina e da surata te naaleatia mau.

⁹Nae e dogo Paulo e do pasa: waina e leo soki a, po punusi naga e peani nasaralomauana naga ega vei tea maripauriana,

¹⁰go e noa ki nadaleo kasua sikai, e naga, P̃a tuleana du nam̃elem̃a maga. Go e sokamidi duleana po surata.

¹¹Go ragi waina taua ni naatam̃oli maga eu punusi tea waina Paulo e mari a, eu sike nadaleoda, po noa pae navasaana ni Likaonia, eu naga, Sup̃e maga eu po suruoli naatam̃oli maga po siwo umai punusi gida.

¹²Go eu soso Barnaba, ki Yupiter; go Paulo, ki Merkurio, nalakena nae e pei tea maraki ni navasaana.

¹³Go tea viri ki Yupiter waina nasum̃a tapu aneana e doko kivea ki natokoana, e puati oks seara go vauvau seara umai paki namata‐pua maga, po masauna naga nara ma taua maga ni naatam̃oli maga euga mari naviriana.

¹⁴Ma ragi waina apostolo maga, Barnaba go Paulo, ero dogo e, ero pua p̃orae sugoro adeada maga, po sokamidi dave paki m̃aleoputo ni taua ni naatam̃oli maga, ero pioso po naga,

¹⁵Maariki maga, ekasana ku mari tea waia? Kinami ma aro pei naatam̃oli waina aro sua narogoana maga dakiusi mu, go aro dogorogo paki mu narogorogoana wia, naga kuga maradoa m̃elu dua ki tea p̃alo maga waia paki Sup̃e mauri, waina e mari nakoroatelagi go maramana go natasi, go tea maga mamau puti waina eu doko ara:

¹⁶waina ragi ni tagona maga waina eu pano e suasua ki nalauna maga mamau puti naga euga surata napua adeada maga.

¹⁷Ma e da dum̃ana doropusi a naga ega tika nanoasokisokiana mau, e do mari m̃ataki, po do dua mu usa maga pae nakoroatelagi umai go ragi maga ni namasu warua, po pakavuro nap̃op̃omu ki navinaga go ki nalaelaeana.

¹⁸Go ero noa tea maga wanogoe po m̃aladigi mari sa atugoro taua maga ni naatam̃oli naga euga ta mari naviriana paki da mau.

¹⁹Ma tea ni Yudea seara eu pae Antiokia go Ikonio umai: go eu pasa die taua maga ni naatam̃oli po nadi Paulo ki vatu maga, po dosagi a paki etaku ni natokoana, eu midoaki nia naga e mate.

²⁰Ma ragi waina tea vasapiseikiana maga eu lawodu dalivirigoro e, e duleana po sili paki natokoana pano: go matamai ki nia nara ma Barnaba ero paki Derbe pano.

²¹Go ragi waina ero dogorogo ki sua narogorogoana wia paki natokoana wanogoe, po mari sua tea vasapiseikiana laapa, ero liliu paki Listra, go paki Ikonio,

²²go paki Antiokia, ero do lawo soki naata ni tea vasapiseikiana maga, ero do pasa parati ki da naga euga toko nasaralomauana doko, go naga waina e one gida one naga tuga vae nariesokiana laapa po sili paki namarakiana ki Sup̃e.

²³Go ragi waina ero madeada pasa dawonaki sua tea matua seara sara ekalesia, po dapasavasa po pali sua, ero pitua ki da paki Nawota, waina eu saralomau sua asa.

²⁴Go ero surata duaduru Pisidia, po umai paki Pamfilia.

²⁵Go ragi waina ero pasa sua navasaana Perca, ero siwo paki Attalia pano;

²⁶go ero porau pae tokora wanogoe paki Antiokia pano, waina ero pea pei tea vituakiana asa paki nasaup̃iaana ki Sup̃e raki nawosiana waina ero pakavuro sua e.

²⁷Go ragi waina ero umai sua, po saisai ki sua ekalesia, ero dogorogo ki naleo maga mamau puti waina Sup̃e e mari ra sikoti ra, go naga e magi tea ni nalauna p̃ota maga p̃olagati namata sikai ni nasaralomauana.

²⁸Go ero doko sikoti tea vasapiseikiana maga ragi e da puru mau.