Read Nguna Togoa Etafe North APOSTOLO MAGA 18 Bible Online

APOSTOLO MAGA 18 - Nguna Togoa Etafe North bible

APOSTOLO MAGA 18

¹Ragi edaku ki tea maga wanogoe e m̃elu dua ki Athens pano, po umai paki Korintho.

²Go e pap̃ai naatam̃oli ni Yudea sikai nagisana Akula, tea ni Ponto pae namatarau aneana, waina e pae Italia umai m̃aladigi ki ragi wanogoe, nara ma anagoroi Priskilla, nalakena Klaudio e dip̃a ki tea ni Yudea maga mamau puti naga euga m̃elu dua ki Roma pano: go e umai punusi ra;

³go nalakena nae go nara eu pei mataisau sikai maau, e doko sikoti ra doko, go eu do posiwosi nalakena eu pei tea mari tap̃aup̃au ki naveimataisauana.

⁴Go e pasa piseiki pululu ekopu ni nasum̃a ni nasaisaiana sara sabbath, po pasa die tea ni Yudea go tea ni Hellas naga euga saralomau.

⁵Ma ragi waina Sila go Timotheo ero pae Masedonia siwo umai, Paulo e pei tea vuasokiana ki navasaana, e do noa sokisoki kasua paki tea ni Yudea naga Yesu e pei Kristo.

⁶Go ragi waina eu dugoro, po pasa sa ki, e meseura ki sugoro aneana maga po noa paki da, Nadamu ega toko nap̃aumu; kinau a dautau: aga wo pa punusi tea ni nalauna p̃ota maga pae ragi waia pa pa pa.

⁷Go e m̃elu dua ki tokora wanogoe pano, po paki ekopu ni nasum̃a ki naatam̃oli sikai nagisana Tito Yusto, tea lotu ki Sup̃e, waina nasum̃a aneana e dip̃a sokari nasum̃a ni nasaisaiana.

⁸Go Krispo, tea maraki ni nasum̃a ni nasaisaiana, e saralomau Nawota nara ma nasum̃a mamau aneana; go naka ni Korintho tea laapa kakada eu dogo po saralomau, po pei tea bapetisoana.

⁹Go Nawota e noa ki Paulo pae navunusiana sikai p̃ogi, e naga, P̃a ta mataku mau, ma p̃a to pasa, po da punuta mau: nalakena kinau a sikoti ko doko,

¹⁰go te naata sikai ega wo da lawodu dip̃a ko naga ega mari sa ki‐go mau: nalakena a peani narei warua natokoana waia.

¹¹Go e doko asa natau sikai go atelagi latesa, e do pasa piseiki navasaana ki Sup̃e m̃aleoputo kakada.

¹²Ma ragi waina Callio e pei tea maramara ni Akaia, tea ni Yudea eu duleana sava paraki Paulo nap̃op̃oda sikai maau asa, po piragi a umai paki malo tasake ni navasap̃otaeana, po naga,

¹³Naatam̃oli waia e pasa die naatam̃oli maga naga euga lotu ki Sup̃e ega va pele nawotaeana.

¹⁴Ma ragi waina Paulo e naga ega vasa, Callio e noa ki tea ni Yudea maga, e naga, E pe vei te namarisakiana kite te nasigisigileoana, tea ni Yudea maga, e pe wia naga aga soki mu:

¹⁵ma e pe vei navusuusuana maga nalo ni navasaana go ni nagisa maga go ni nawotaeana animu, kuga tum̃amu punusi a; kinau a da masauna mau naga aga vei tea vasap̃otae sikai ni tea maga wanogoe.

¹⁶Go e kopasi ra eu m̃elu dua ki malo tasake ni navasap̃otaeana pano.

¹⁷Go eu mamau puti pua soki Sosthene, tea maraki ni nasum̃a ni nasaisaiana, po p̃okawokati a narae ni malo tasake ni navasap̃otaeana. Go Callio e dodop̃arop̃aro ki tea maga wanogoe.

¹⁸Go Paulo, ragi waina e moro doko sua naaleatia laapa, e pasa dule ki taigida maga, po porau paki Siria pano go Priskilla go Akula ero sikoti a pano; e alati naloluna Kegekerea: nalakena e peani nasaiana sikai.

¹⁹Go eu rumai paki Efeso, go e doropusi ra ero doko tokora wanogoe; ma nae e paki ekopu ni nasum̃a ni nasaisaiana, po pasa piseiki pululu ki tea ni Yudea.

²⁰Go ragi waina eu pavarani a naga ega toko ragi varau sikai, e da suasua asa mau;

²¹ma ragi waina e pasa dule ki sua ra, po naga, Sup̃e e pe suasua, a pe wo moro liliu umai punusi mu, e porau pae Efeso pano.

²²Go ragi waina e paki euta Kaisarea, e sake po pasa dodomi ekalesia, po siwo paki Antiokia pano.

²³Go ragi waina e doko sua ragi sikai asa, e m̃elu pano, po surata duaduru lawolawo ki navanua ni Calatia go Ferucia, e do mari tea vasapiseikiana maga eu kasua puti.

²⁴Go naatam̃oli ni Yudea sikai nagisana Apollo, tea ni Alexandria pae namatarau aneana, naatam̃oli vasa p̃ia sikai, e umai paki Efeso; go e atae p̃arua ki navasaana midiriana maga.

²⁵Naatam̃oli wanogoe e pei tea vasapiseikiana napua ki Nawota; go nalakena e pei tea suisui ki naatana, e pasa po pasa piseiki paratiki tea maga nalo ni Yesu, e atae nabapetisoana ki Yoane sikina:

²⁶go e atulake navasa‐piviari‐ana ekopu ni nasum̃a ni nasaisaiana. Ma ragi waina Priskilla go Akula ero dogo e ero piragi a punusi ra, po pasa lawolawo ki paratiki napua ki Sup̃e paki nia.

²⁷Go ragi waina e masauna naga ega tuagoto paki Akaia pano, taigida maga eu silae a asa, po midiri paki tea vasapiseikiana maga naga euga viragi soki a: go ragi waina e umai, e silae p̃arua ki tea maga waina eu saralomau sua pae nasaup̃iaana:

²⁸nalakena e pasa piseiki pululu ki doa kasua ki tea ni Yudea maga lina, e do pasa piseiki saisai ki nia pae navasaana midiriana maga naga Yesu e pei Kristo.