Read Nguna Togoa Etafe North APOSTOLO MAGA 2 Bible Online

APOSTOLO MAGA 2 - Nguna Togoa Etafe North bible

APOSTOLO MAGA 2

¹Go ragi waina naaleatia ni Pentekoste e do pei tea vakavuroana, eu mamau puti doko tokora sikai maau.

²Go m̃araverave nasaruruana sikai e pae nakoroatelagi umai, e dakiusi nasurataana ni nalagi atu sikai, go e pakavuro usuraki nasum̃a waina eu doko asa.

³Go namena maga waina eu darana, dakiusi mena ni nakapu, eu pakilina ki da; go e sake puti ara.

⁴Go eu pura puti ki Naatana Tapu, po pae asa pasa ki namena p̃ota maga, dakiusi waina Naatana e dua ra naga euga vasa lagi.

⁵Go tea ni Yudea seara eu doko Yerusalem, waina eu pei naatam̃oli tape p̃ia, waina eu pae sara nalauna etano ni nakoroatelagi umai.

⁶Go ragi waina nasaruruana wanogoe e pei tea rogoana, taua ni naatam̃oli maga eu saisai, go nap̃op̃oda e pinovinoi, nalakena sara naatam̃oli eu dogo ra eu pasa pae navasaana visarasara adeada.

⁷Go eu mamau puti saram̃akoto po maga, po naga, Kuga leo, tea maga mamau puti waia waina eu pasa eu da pei naatam̃oli maga ni Calilea kite?

⁸Go ekasana nigida, sara naata kakagida, tu dogo pae navasaana waina tu pakilina asa?

⁹Tea ni Parthia go ni Media go ni Elam, go tea maga waina eu doko Mesopotamia, Yudea go Kapadokia,

¹⁰Ponto go Asia, Ferucia go Pamfilia, Ityipt go tokora maga ni Linue m̃aladigi ki Kurene, go nam̃enakiatatoko maga waina eu pae Roma umai, tea ni Yudea maga go proseluto maga,

¹¹tea ni Krete go ni Arabia, tu dogo ra eu pasa pae namenagida maga nawosiana warua maga ki Sup̃e.

¹²Go eu saram̃akoto puti, po midoaki putuaki, po dum̃ada noa ki da, eu naga, Tea waia e pei nasava?

¹³Ma tea p̃ota seara eu mari saudoa ki nia, po naga, Eu munu p̃arua ki waine vau.

¹⁴Ma Petero e duleana, nara ma tea rualima sikai tamate sikai eu mamau, go e sike nadaleona po pasalagi paki da, e naga, Naatam̃oli ni Yudea maga, go tea maga mamau puti waina ku doko Yerusalem, kuga atae tea waia, go kuga takidorogo navasaana aginau maga.

¹⁵Nalakena nara waia eu da matamaloku mau, dakiusi waina nimu ku midoaki nia; nalakena e ko pei aura ketolu ni naaleatia;

¹⁶ma tea waia e pei tea waina e pei tea noaana pae profeta Yoel;

¹⁷Go ega wo doko naaleatia edaku maga, Sup̃e e noa e, Aga wo daki kovai Naatagu paki sara nap̃okasi: Go natumu naanoai maga go natumu nagoroi maga euga wo pea noa sai, Go natureai animu maga euga wo punusi navunusiana maga, Go tea matua animu maga euga wo p̃erea ki nap̃erea maga:

¹⁸Ioro go tea suasua naanoai aginau maga go tea suasua nagoroi aginau maga naaleatia maga wanogoe Aga wo daki kovai Naatagu paki da; go euga wo pea noa sai.

¹⁹Go aga wo pitua ki tea ni namagaana maga nakoroatelagi ni elagi, Go navaivaiana maga maramana ni etano; Nada, go nakapu, go namavu ni naasua:

²⁰Elo ega wo panop̃ota po pei namaligo, Go atelagi ega wo pei nada, Ega wo pea ki naumaiana ni naaleatia ki Yehovah, Naaleatia warua go ni namatakuana:

²¹Go ega wo doko naga sara naata waina euga wo pioso paki nagisa ni Yehovah euga wo pei tea mautipauriana.

²²Naatam̃oli ni Israel maga, kuga rogo navasaana maga waia: Yesu ni Nasareth, naatam̃oli sikai waina e pei tea viseikisokisokiana paki mu pae Sup̃e ki nawosiana kasua maga go ki tea ni namagaana maga go ki navaivaiana maga, waina Sup̃e e mari ra pae asa m̃aleoputo kakamu, dapala waina ku dum̃amu atae a;

²³nae, waina e pei tea vituakiana ki namidoakip̃otaeana tawonakiana go naveaataeana ki Sup̃e, nimu ku duri a nakau valadagoto po mari punue a pae nam̃elearu ni naatam̃oli sigisigileo maga:

²⁴waina Sup̃e e sike a e duleana, e peresi navitinuana ni namateana maga: nalakena e da pei tea mariataeana mau naga nae ega vei tea tapesokiana asa.

²⁵Nalakena David e noa nalo kakana, A leopunusi Yehovah kivea ki naraegu sara ragi: Nalakena e doko pisari nam̃elearugu ni matua, naga aga ta parivari mau:

²⁶Nalakena tea wanogoe nap̃op̃ogu e laelaea go namenagu e sokamidi; Go nap̃okasigu ega wo doko naleogoroana:

²⁷Nalakena p̃a wo da doropusi naatagu paki Hades mau, Go p̃a wo da p̃itua ki tea dodomidodomiana anigo naga ega vunusi namesoana mau.

²⁸Ku mari au a atae napua maga ni namauriana; P̃a wo pakavuro au ki nalaelaeaana doko naraem̃a.

²⁹Taigu maga, e p̃ia naga aga viviari noa ki mu nalo ni patriarke David, naga e mate po pei tea ovakiana, go matigo aneana e sikoti gida doko pa pa paki masoso.

³⁰Ma nae e pei profeta sikai po atae naga Sup̃e e pivisa paki nia ki navivisaana sikai, naga ega wo lawo ki nawa ni nawarer.

³¹Sikai malo tasake aneana; e pea punusi tea wanogoe, po noa namoroduleanaana ki Kristo, naga e da pei tea toropusiana paki Hades mau, go naga nap̃okasina e da punusi namesoana mau.

³²Yesu wanogoe Sup̃e e sike a e duleana, go kinami au mamau puti pei tea noasokisoki kakana.

³³Nalakena tea wanogoe nae waina e pei tea tapeana pakilagi ki nam̃elearu ni matua ni Sup̃e, go waina e dape ki Tamana nasaiana ni Naatana Tapu, e po daki tea waia, waina nimu ku punusi a po dogo e.

³⁴Nalakena David e da sake paki nakoroatelagi mau: ma nae e naga, Yehovah e noa ki Nawota aginau, P̃a toko pisari nam̃elearugu ni matua,

³⁵Pa pa aga wo mari tea kokona ki‐go maga euga vei malo vasiana ni nam̃elem̃a maga.

³⁶Nalakena tea wanogoe nasum̃a mamau ni Israel euga atae m̃ata ki nia, naga Sup̃e e mari a e pei Nawota go Kristo, Yesu waina nimu ku duri a nakau valadagoto.

³⁷Go ragi waina eu dogo tea wanogoe, eu pei tea vuriana nap̃op̃oda, po noa ki Petero go apostolo p̃ota maga, Taigami maga, auga mari nasava?

³⁸Go Petero e noa ki da, e naga, Kuga midoakidoa, po pei tea bapetisoana sara naata kakamu pae nagisa ni Yesu Kristo paki namidoakikorokoroana ni namarinaleosaana animu maga; go kuga wo dape navituam̃olikiana ni Naatana Tapu.

³⁹Nalakena nasaiana e pei tea animu, go agi natumu maga, go agi tea maga mamau puti waina eu madu uvea, agi tea maga waina Yehovah Sup̃e anigida ega wo soso ra.

⁴⁰Go e noa sokisoki kasua ki navasaana p̃ota laapa, po pasa parati ki da, po naga, Kuga vei tea mautipauriana m̃elu dua ki tagona dagele waia.

⁴¹Go tea maga waina eu dape navasaana aneana eu pei tea bapetisoana: go naaleatia wanogoe naatam̃oli eu alagoro pei manu dolu eu sokari ra.

⁴²Go eu doko mau doko navasapiseikiana ki apostolo maga go nasaisaipeaniana, natova‐p̃oraebred‐ana go natapasavasaana maga.

⁴³Go namatakuana e pakilina ki sara naatam̃oli: go tea ni namagaana laapa go navaivaiana laapa eu pei tea mariana pae apostolo maga.

⁴⁴Go tea maga mamau puti waina eu saralomau eu doko mamau tokora sikai maau, po mari naleo maga mamau puti eu p̃olosi ra;

⁴⁵go eu sori natano veaniana adeada maga go naloriki adeada maga, po p̃otae dua tea maga mamau puti asa, e pataka ni waina te naata e pe vei tea tika.

⁴⁶Go sara naaleatia eu doko mau doko nasum̃a tapu nap̃op̃oda sikai maau asa, go eu dova p̃orae bred nasum̃a adeada, po gani navinaga adeada nap̃op̃oda laelaea po pei lomau,

⁴⁷eu do samasamani Sup̃e, go narei mamau eu saup̃ia ki da. Go Nawota e sokari ra sara naaleatia tea maga waina eu do pei tea mautipauriana.