Read Nguna Togoa Etafe North APOSTOLO MAGA 20 Bible Online

APOSTOLO MAGA 20 - Nguna Togoa Etafe North bible

APOSTOLO MAGA 20

¹Go edaku ki navasap̃araiana e nopu, Paulo e dip̃aki lua paraki tea vasapiseikiana maga euga umai, go e pasa paratiki da, po pasa dule ki da, po m̃elu pano naga ega vaki Masedonia pano.

²Go ragi waina e surata duaduru sua tokora maga wanogoe, po pasa paratiki p̃arua ki sua ra, e umai paki Hellas.

³Go ragi waina e doko sua asa atelagi dolu, go tea ni Yudea eu seke ki nia, ragi waina e naga ega vorau paki Siria pano, e midoaki p̃otae naga ega liliu duaduru Masedonia pano.

⁴Go Sopater ni Beria, natu ni Pirro, e sikoti a pano pa pa paki Asia; nara ma Aristarko go Sekundo ni naka ni Thessalonika; go Caio ni Derbe, go Timotheo; go tea ni Asia, Tikiko go Trofimo.

⁵Ma nara eu pea pano, po doko raki gami Troas.

⁶Go kinami au porau pae Filippi edaku ki naaleatia maga ni bred waina leven e dika asa, go au rumai paki Troas punusi ra naaleatia kelima; go au doko tokora wanogoe naaleatia larua.

⁷Go naaleatia vea ni wiik, ragi waina au pei tea saisaikiana naga auga tova p̃orae bred, Paulo e pasa piseiki pululu ki da, e midoaki nia naga ega vano matamai ki nia; go e pasa parau pa pa p̃ogi matua.

⁸Go nasulu laapa eu doko em̃ago ni tagona ni elagi, waina au pei tea saisaikiana asa.

⁹Go natureai sikai nagisana Eutiko e dasake namata leo sikai, waina e pei tea vuatiana ki namaturuana daratara; go ragi waina Paulo e ko do pasa piseiki paraurau, e pei tea vuatiana pakitano ki namaturuana aneana po dowo pae tagona ketolu siwo pakitano, po pei tea tapedakatiana e mate.

¹⁰Go Paulo e siwo, po dowo asa, po doti a po naga, kuga ta p̃arai mau; nalakena naatana e doko asa.

¹¹Go ragi waina e m̃oro sake, po dova p̃orae bred, po ganikani, po pasa ki da ragi varau, pa pa paki ragi ni namakotokotoana, e dapala nogoe pano.

¹²Go eu piragi natureai wanogoe e mauri, go eu pei tea vakavakaleana e da kiki mau.

¹³Ma kinami au pea paki shipe pano, po porau naga auga vaki Asso, waina au midoaki nia naga auga musagi Paulo asa: nalakena e dawonaki dapala nogoe, nae e midoaki nia naga ega vae euta.

¹⁴Go ragi waina e sua gami Asso, au musagi a, po umai paki Mitilene.

¹⁵Go au porau pae tokora wanogoe, go matamai ki nia au rumai doko kivea ki Kio; go matamai ki nia au paki euta Samo ragi kiki; go matamai ki nia au rumai paki Mileto.

¹⁶Nalakena Paulo e midoaki p̃otae naga ega vorau liu Efeso, naga ega ta pakilina ki nia mau naga ega toko parau doko Asia; nalakena e do mari m̃araverave, naga e pe mari atae, ega toko Yerusalem naaleatia ni Pentekoste.

¹⁷Go e dip̃aki lua pae Mileto paki Efeso, po soso tea matua maga ni ekalesia naga euga umai punusi a.

¹⁸Go ragi waina eu rumai punusi a, e noa ki da, e naga. Nimu ku dum̃amu atae, dapala waina a doko sikoti mu doko ragi mamau, pae naaleatia waina a pea umai pasi Asia asa,

¹⁹naga a do magi Nawota suasua ki sara naveip̃op̃ovakitanoana, go ki naririmata maga, go ki namaridogoana maga waina eu pakilina ki nau nalakena nasekeana maga ki tea ni Yudea:

²⁰naga a da suka ki noa ki sai mu mau tea maga waina eu p̃ia ki mu, po pasa piseiki mu lina, go pae nasum̃a animu maga,

²¹po do noasokisoki kasua paki tea ni Yudea go tea ni Hellas namidoakidoaana paki Sup̃e, go nasaralomauana paki Nawota anigida Yesu Kristo.

²²Go ragi waia, kuga leo, kinau a pei tea soliana naatagu paki Yerusalem pano, a da atae tea maga waina euga wo pakilina ki nau asa mau:

²³ma a atae tea waia sikai maau, naga Naatana Tapu e do noa sokisoki kasua paki nau sara natokoana, e noa naga natali solisoli maga go nariesokiana maga eu doko raki nau doko.

²⁴Ma a mari namauriana aginau e pei tea m̃oli, e da maginau pei tea lomau mau, naga aga mari sua nasavaana ni namalopa aginau, go nasuasuaana waina a dape a ki Nawota Yesu, naga aga noa sokisoki kasua ki narogorogoana wia ni nasaup̃iaana ki Sup̃e.

²⁵Go ragi waia, kuga leo, kinau a atae naga nimu maga tea mamau puti, waina a surata m̃aleoputo kakamu po dogorogo ki namarakiana, kuga wo da moro punusi naraegu mau.

²⁶Nalakena tea wanogoe a noa sokisoki kasua paki mu naaleatia waia, naga a dautau pa dua ki nada ni tea maga mamau puti.

²⁷Nalakena a da suka ki noa ki sai mu namidoakip̃otaeana mamau ki Sup̃e mau.

²⁸Kuga tum̃amu leo paratiki mu, go ki navata mamau, waina Naatana Tapu e mari mu ku pei tea leo paratiki kakana, naga kuga leo paratiki pakale ekalesia ki Sup̃e, waina e dalua e ki nadana aneana.

²⁹Kinau a atae naga edaku ki navanoana aginau wulf mari pavakoto maga euga wo umai paki m̃aleoputo kakamu waina euga wo da p̃op̃osoki navata mau;

³⁰go nimu naatam̃oli seara kakamu euga wo pakilina, po pasa tea sa maga, naga euga viragi lua tea vasapiseikiana maga euga rausi ra.

³¹Nalakena tea wanogoe kuga to leleogoro, po midoaki nia naga natau dolu a do dapavanau sara naatam̃oli sikasikai p̃ogi go aleati pilake naririmata maga a da makoto ki nia mau.

³²Go ragi waia a pitua ki mu paki Sup̃e, go paki navasaana ni nasaup̃iaana aneana, waina e mari atae davagi mu, po dua mu tea veaniana m̃aleoputo ni tea maga mamau puti waina eu pei tea maridautaukiana.

³³A da matam̃agura ki silver, kite kold, kite sugoro maga ki te naata sikai mau.

³⁴Ku dum̃amu atae naga nam̃elearugu maga waia ero magi natikaana aginau maga suasua, go ero magi tea maga waina eu sikoti au suasua.

³⁵A piseiki mu pae naleo maga mamau puti naga e one mu one naga kuga wosiwosi‐mawosa ega tapala nogoe, po silae tea manainai maga, po midoaki navasaana ki Nawota Yesu, naga nae e noa, naga Namaropaana ni navituaana e p̃arua liu tea ni natapeana.

³⁶Go ragi waina e noa sua tea maga wanogoe, e ditip̃atua, po dapasavasa nae ma nara mamau puti eu mamau.

³⁷Go eu mamau puti dagi p̃arua, po dowo nanoa ni Paulo, po dum̃ili a,

³⁸eu dogo kite sa p̃arua liu nalakena navasaana waina e noa e, naga euga ta moro leopunusi naraena mau. Go eu pitana ki nia paki shipe pano.