Read Nguna Togoa Etafe North APOSTOLO MAGA 21 Bible Online

APOSTOLO MAGA 21 - Nguna Togoa Etafe North bible

APOSTOLO MAGA 21

¹Go ragi waina e pakilina naga au pa dua ki da po porau, au sava leana umai paki Ko, go matamai ki nia paki Rodo, go au pae tokora wanogoe po paki Patara:

²go ragi waina au pap̃ai shipe sikai waina ega tuagoto paki Foinike, au pagi asa, po porau.

³Go ragi waina au pakilina ki Kupero, au doropusi a e doko nam̃elearugami ni mawiri, po porau paki Siria, po paki euta Tair: nalakena shipe e naga ega lip̃a ki naloriki musagiana kakana maga tokora wanogoe.

⁴Go nalakena au pap̃ai tea vasapiseikiana maga, au doko asa doko naaleatia larua: go nara eu noa ki Paulo pae Naatana, naga ega ta pasi Yerusalem mau.

⁵Go ragi waina e pakilina naga au pakavuro naaleatia maga wanogoe, au m̃elu po surata pano; go eu mamau puti pitana ki gami, nara ma adagoroi maga go natuda maga, pa pa au paki etaku ni natokoana: go au ditip̃atua elau garagara, po dapasavasa, po dum̃agami pasa dule ki gami;

⁶go au pagi shipe, ma nara eu liliu paki kiada.

⁷Go ragi waina au mari sua navorauana pae Tair, au rumai paki Ptolemai; go au pasa dodomi taigida maga, po doko sikoti ra naaleatia sikai.

⁸Go matamai ki nia au m̃elu pano, po umai paki Kaisarea: go au paki ekopu ni nasum̃a ki Filipo tea rogorogo ki narogorogoana wia, waina e pei tea larua sikai kakada, go au doko sikoti a doko.

⁹Go naatam̃oli wanogoe e peani natuna nagoroi pati, naatara maga, waina eu pea noa sai.

¹⁰Go ragi waina au doko tokora wanogoe naaleatia laapa, tea vea noa sai sikai e pae Yudea siwo umai, nagisana Acabo.

¹¹Go e umai punusi gami, po dape tasoki ki Paulo, po dum̃ana soli nam̃elena go nam̃elearuna maga asa, po naga, Naatana Tapu e noa dapala waia, e naga, Naka ni Yudea waina eu doko Yerusalem euga wo soli dapala waia naatam̃oli waina e peani tasoki waia, go euga wo pitua ki nia paki nam̃elearu maga ni tea ni nalauna p̃ota maga.

¹²Go ragi waina au dogo tea maga wanogoe, kinami ma tea maga ni tokora wanogoe au mamau puti pavarani a naga ega ta sake paki Yerusalem pano mau.

¹³Ragi wanogoe Paulo e pasa dara, e naga, Ku mari nasava, ku do dagi po do mari p̃oroworosi nap̃op̃ogu? Nalakena kinau a mari m̃ata sua naga aga ta pei tea soliana sikina mau, ma naga aga mate Yerusalem nalakena nagisa ni Nawota Yesu.

¹⁴Go ragi waina e karai pei tea vasadieana, au punuta, po naga, Namasauana ki Yehovah ega vei tea mariana.

¹⁵Go edaku ki naaleatia maga wanogoe au mari sokisoki naloriki aginami maga, po sake paki Yerusalem pano.

¹⁶Go tea vasapiseikiana ni Kaisarea maga seara kakada eu sikoti gami pano, eu piragi Mnason ni Kupero, tea vasapiseikiana tuai sikai e sikoti ra pano, waina auga m̃enaki sikoti a.

¹⁷Go ragi waina au rumai paki Yerusalem, taigida maga eu laelaea piragi soki gami.

¹⁸Go matamai ki nia Paulo e sikoti gami paki ekopu punusi Yakobo; go tea matua maga mamau puti eu mamau doko asa.

¹⁹Go ragi waina e pasa dodomi sua ra, e dogorogo ki sara naleo sikai go sikai waina Sup̃e e mari a m̃aleoputo ni tea ni nalauna p̃ota maga pae nasuasuaana aneana.

²⁰Go nara, ragi waina eu dogo e, eu samasamani Sup̃e; go eu noa ki nia, eu naga, Ku punusi, tai, naga naka ni Yudea tivilia laapa kakada eu saralomau; go eu mamau puti magi nawotaeana pei tea suisui:

²¹go e pei tea rogorogokiana paki da nalo kakam̃a, naga ku pasa piseiki tea ni Yudea maga mamau puti waina eu sari tea ni nalauna p̃ota maga naga euga toropusi Moses ega madoko, ku noa naga euga ta dovadavivi natuda maga mau, go naga euga ta surata pae natomariana maga mau.

²²Nalakena tea wanogoe e pei nasava? Euga wo dogo lomau naga ku po umai.

²³Nalakena tea wanogoe p̃a mari tea waia waina au noa ki‐go asa: naatam̃oli pati kakagami eu doko waina eu peani nasaiana sikai e one ara one;

²⁴p̃a viragi lua naatam̃oli maga wanogoe, po dum̃am̃a mari ko p̃a tautau sikoti ra, po madeada pitua ki naulu, naga euga masi nap̃auda: go tea maga mamau puti euga wo atae naga naleo maga waina eu dogo e nalo kakam̃a e da pei te navatuna mau; ma naga nigo ma ku surata leana, po pavaigoro nawotaeana.

²⁵Ma nalo ni tea ni nalauna p̃ota maga waina eu saralomau, kinami au midiri paki da, po pasa p̃otae naga euga tum̃ada pavaigoro ra ki tea maga waina eu pei naviriana paki idolo maga, go ki nada, go ki tea solipunueana, go ki namaripeleana.

²⁶Ragi wanogoe Paulo e piragi lua naatam̃oli maga wanogoe, go matamai ki nia e dum̃ana mari a e dautau sikoti ra po paki roara ni nasum̃a tapu, eu noasai naga eu naga euga vakavuro naaleatia maga ni namaridautauana, pa pa naviriana sikasikai sarasara ra ega madeada pei tea vituakiana.

²⁷Go ragi waina naaleatia larua eu m̃aladigi nopu, tea ni Yudea waina eu pae Asia umai, ragi waina eu punusi a roara ni nasum̃a tapu, eu mari taua ni naatam̃oli maga eu pari puti, go eu nadi ki nam̃elearuda asa,

²⁸po pioso, eu naga, Naatam̃oli ni Israel maga, kuga silae gami: tea waia e pei naatam̃oli, waina e pasa piseiki tea maga mamau puti ni sara tokora dip̃a narei, go nawotaeana go tokora waia: go e piragi naatam̃oli ni Hellas seara eu rumai paki ekopu ni nasum̃a tapu, po mari tokora waia e pei tea m̃oli.

²⁹Nalakena eu pea punusi Trofimo tea ni Efeso e sikoti a natokoana, go eu midoaki nia naga Paulo e piragi a umai paki ekopu ni nasum̃a tapu.

³⁰Go natokoana mamau e pari, go narei eu sava saisai: go eu pua soki Paulo, po dosagi a paki etaku ni nasum̃a tapu: go namata maga eu pei tea kokoroana m̃araverave.

³¹Go ragi waina eu laaga naga euga mari punue a, narogorogoana e sake umai paki kiliareko ni taua ni naatam̃oli maga ni navakalo, naga Yerusalem mamau e pinovinoi.

³²Go e m̃araverave piragi lua naatam̃oli ni navakalo seara go senturio seara, po sava siwo punusi ra: go nara, ragi waina eu punusi kiliareko go naatam̃oli maga ni navakalo, eu makoto ki nawokatiana ki Paulo.

³³Ragi wanogoe kiliareko e umai paki m̃aladigi, po pua soki a, po dip̃aki nia naga ega vei tea soliana ki namori dua; po pusuusu ki e pei sei, go e mari nasava?

³⁴Go te seara ni taua ni naatam̃oli maga eu pioso tea sikai, go te seara eu pioso tea p̃ota sikai: go ragi waina e mari sa atae tea waina e pei lomau nalakena navasap̃araiana, e dip̃aki nia naga ega vei tea viragiana paki ekopu ni nasum̃a ni p̃aaka.

³⁵Go ragi waina e umai paki napua vavadu, e pei tea tapetapeana pae naatam̃oli ni navakalo maga, nalakena namarikasuaana ki taua ni naatam̃oli maga;

³⁶nalakena taua ni narei eu dausi ra po pioso, eu naga, P̃a tape lua e.

³⁷Go ragi waina eu naga euga viragi Paulo paki ekopu ni nasum̃a ni p̃aaka, e noa ki kiliareko, e naga, E p̃ia naga aga noa ki‐go te navatuna kite? Go e naga, Ku atae navasaana ni Hellas kite?

³⁸Go nigo ku da pei tea ni Ityipt waina, waina pea ki naaleatia maga waia e mari naatam̃oli manu pati ni tea mari punue maga eu duleana po piragi lua ra paki masop̃alo?

³⁹Ma Paulo e naga Kinau a pei naatam̃oli sikai ni Yudea, tea ni Tarso ni Kilikia, tea ni natokoana waina e da pei tea m̃oli mau: go a pavarani ko, p̃a suasua ki nau naga aga vasa paki narei.

⁴⁰Go ragi waina e suasua ki nia asa, Paulo, waina e lawodu napua vavadu, e alosoki ki nam̃elearuna paki narei; go ragi waina eu punuta p̃arua, e pasa ki da pae navasaana ni Heberu, po naga.