Read Nguna Togoa Etafe North APOSTOLO MAGA 22 Bible Online

APOSTOLO MAGA 22 - Nguna Togoa Etafe North bible

APOSTOLO MAGA 22

¹Taigu maga go mama maga, kuga rogo navasakorokoroana waina a maginau pasa paki mu asa ragi waia.

²Go ragi waina eu dogo naga e pasa paki da pae navasaana ni Heberu, eu datam̃ate p̃arua: go e naga.

³Kinau a pei naatam̃oli sikai ni Yudea, a pakilina Tarso ni Kilikia, ma a pei tea vakaleana natokoana waia, pisari nam̃ele ni Camaliel, a pei tea viseikiana pae namarigaraana ni nawotaeana ki tamagida maga, po magi Sup̃e pei tea suisui, dakiusi waina nimu ku mamau puti doko masoso:

⁴go a kopalele Napua waia pa pa paki namateana, a do soli po pitua ki naanoai maga go nagoroi maga paki ekopu ni nasum̃a ni navavaiana maga.

⁵Dapala waina tea viri warua liu ma e maginau noa sokisoki, go nasaisaiana mamau ni tea matua maga: waina a dape tusi maga kiada paki taigida maga, po surata paki Damaseko pano, naga aga viragi tea maga waina eu doko asa euga vei tea soliana umai paki Yerusalem, naga euga vei tea varatiana.

⁶Go e pakilina, naga, ragi waina a do surata, po do paki m̃aladigi ki Damaseko, e alagoro pei aleati matua, namarama warua sikai e m̃araverave maramalaga pae nakoroatelagi umai dalivirigoro au.

⁷Go a dowo paki natano, po dogo nadaleo sikai e noa ki nau, e naga, Saul, Saul, ekasana ku kopalele au?

⁸Go kinau a pasa dara, a naga, Ku pei sei, Nawota? Go e noa ki nau, e naga, Kinau e pei Yesu ni Nasareth, waina nigo ku kopalele asa.

⁹Go tea maga waina eu sikoti au eu punusi namarama lomau, ma eu da dogo nadaleo ni tea waina e pasa ki nau mau.

¹⁰Go a naga, Aga mari nasava, Nawota? Go Nawota e noa ki nau, e naga, P̃a tuleana, po paki Damaseko pano; go tokora wanogoe ega wo pei tea vasa ki‐goana asa nalo ni tea maga waina eu pei tea tawonakiana naga p̃a mari ra.

¹¹Go ragi waina a da leosai mau nalakena nawarawaraana ni namarama wanogoe, a pei tea vuatiana ki nam̃elearugu surata pae tea maga waina eu sikoti au, po umai paki Damaseko.

¹²Go tea sikai, Anania, naatam̃oli tape p̃ia pae nawotaeana, tea noasokisokiana pae tea ni Yudea mamau puti waina eu doko tokora wanogoe,

¹³e umai punusi au, po lawodu pisari au po noa ki nau, e naga, Taigu Saul, p̃a moro leosai. Go kinau a leosai punusi a aura wanogoe.

¹⁴Go e naga, Sup̃e ki tamagida maga e dawona ki‐go naga p̃a atae namasauana aneana, go naga p̃a vunusi Tea Leana, go naga p̃a rogo nadaleo sikai pae nawokana.

¹⁵Nalakena p̃a wo maneana pei tea noasokisoki sikai paki naatam̃oli maga mamau puti ni tea maga waina ku po punusi ra po dogo ra.

¹⁶Go ragi waia ekasana ku mari daliali? Pa tuleana, po pei tea bapetisoana, po sarue lua namarinaleosaana anigo maga, po pioso paki nagisana.

¹⁷Go e pakilina, naga, ragi waina a liliu sua paki Yerusalem, go ragi waina a do dapasavasa ekopu ni nasum̃a tapu, nasaram̃akotoana sikai e pakilina ki nau,

¹⁸go a punusi a e noa ki nau, e naga, P̃a mari m̃araverave, go p̃a m̃elu dua ki Yerusalem pano m̃araverave: nalakena euga wo da dape nanoasokisokiana anigo nalo kakagu mau.

¹⁹Go kinau a naga, Nawota, nara eu dum̃ada atae naga kinau a do kokoro tea maga waina eu saralomau ako ekopu ni nasum̃a ni navavaiana, po parati ra ekopu ni sara nasum̃a ni nasaisaiana:

²⁰go ragi waina nada ni Stefano tea noa sokisoki anigo e pei tea takiana, kinau ma a lawodu pisari a, po suasua, po pavaigoro sugoro maga ki tea maga waina eu mari punue a.

²¹Go e noa ki nau, e naga, P̃a vano: nalakena kinau aga wo dip̃aki lua ko paki uvea punusi tea ni nalauna p̃ota maga.

²²Go eu daki dorogo paki nia pa pa paki navasaana wanogoe; go eu sike nadaleoda, po naga, P̃a tape lua tea tapalana m̃elu dua ki maramana: nalakena e da p̃ia mau naga nae ega mauri doko.

²³Go ragi waina eu do pioso, po do sawo lua sugoro adeada maga, po do nadi ki nam̃otam̃ota paki namalopa,

²⁴kiliareko e dip̃a ki nia naga ega vei tea viragiana paki ekopu ni nasum̃a ni p̃aaka, po noa naga ega vei tea vuausiana ki navaratiana, naga ega atae tea waina e pei nalakena eu pioso dip̃a e dapalana.

²⁵Go ragi waina eu soli sua e ki natali maga, Paulo e noa ki senturio waina e lawodu, e naga, E pae nawotaeana naga kuga varati naatam̃oli sikai waina e pei tea ni Roma, go waina e da pei tea tip̃akotoviana mau kite?

²⁶Go ragi waina senturio e dogo e, e pa punusi kiliareko, po noa ki sai a, e naga, Ku naga p̃a mari nasava? Nalakena naatam̃oli waia e pei tea ni Roma.

²⁷Go kiliareko e umai, po noa ki nia, e naga, P̃a noa ki nau, nigo ku pei tea ni Roma kite? Go e naga, Ioro.

²⁸Go kiliareko e pasa dara, e naga, Kinau a pakotovi navei‐naata‐tokoana wanogoe ki taua warua sikai ni m̃ane. Go Paulo e naga. Ma kinau a pakilina pei tea ni Roma.

²⁹Nalakena tea wanogoe tea maga waina eu naga euga vuausi a eu m̃elu dua ki nia pano m̃araverave: go kiliareko ma e mataku, ragi waina e atae naga e pei tea ni Roma, go nalakena e soli a.

³⁰Ma matamai ki nia, nalakena e masauna naga ega atae tea waina e pei nalakena lomau, waina naka ni Yudea eu pasa dip̃a e asa, e peresi a, po dip̃a ki tea viri warua maga go nasaisaiana ni navasap̃otaeana mamau naga euga saisai umai, go e piragi Paulo e siwo, po lawo ki nia naraeda.