Read Nguna Togoa Etafe North APOSTOLO MAGA 23 Bible Online

APOSTOLO MAGA 23 - Nguna Togoa Etafe North bible

APOSTOLO MAGA 23

¹Go Paulo e leo soki nasaisaiana, po naga, Tai maga, kinau a magi Sup̃e mari dapala waina nap̃op̃ogu e midoaki p̃otae naga e pei tea wia pa pa paki naaleatia waia.

²Go Anania tea viri warua liu e dip̃a ki tea maga waina eu lawodu pisari a naga euga wokati nawokana.

³Ragi wanogoe Paulo e noa ki nia, e naga, Sup̃e ega wo p̃okati ko, namalo pakasakiana tare: go nigo ku dasake naga p̃a vasa p̃otae au pae nawotaeana, go ku dip̃a ki nau naga aga vei tea wokatiana papele nawotaeana kite?

⁴Go tea maga waina eu lawodu pisari a eu naga, Ku suori tea viri warua liu ki Sup̃e kite?

⁵Go Paulo e naga, A da atae, tai maga, naga e pei tea viri warua liu: nalakena e pei tea midiriana, e naga, P̃a ta pasa sa ki tea maraki sikai ki narei anigo mau.

⁶Ma ragi waina Paulo e atae naga namagovai kakada eu pei Sadduki maga, go naga namagovai eu pei Farisi maga, e pioso nasaisaiana ni navasap̃otaeana, e naga, Tai maga, kinau a pei Farisi sikai, natu ni Farisi maga: nalo ni naleogoroana go namoroduleanaana ni tea mate maga kinau a pei tea vasap̃otaeana asa.

⁷Go ragi waina e noa sua tea wanogoe, navululuana sikai e pakilina namawota ni Farisi maga go ni Sadduki maga: go nasaisaiana e pamawota.

⁸Nalakena Sadduki maga eu noa naga namoroduleanaana e dika, go naga agelo e dika, go naatana: ma Farisi maga eu noasai sokata ki da.

⁹Go naviosoana warua e pakilina: go tea midiri maga seara kakada ni namagovai ni Farisi maga eu duleana, po pululu, po naga, Au da pap̃ai te navatuna sa naatam̃oli waia mau: ma naatana sikai e pe vasa ki nia, kite agelo sikai ega kasava?

¹⁰Go ragi waina navululuana warua sikai e pakilina, kiliareko, waina e mataku Paulo e pe vei tea vuap̃oraworaeana pae ara, e dip̃a ki tea ni navakalo maga naga euga siwo po pua lua pavakoto asa m̃elu dua ki m̃aleoputo kakada, po piragi a umai paki ekopu ni nasum̃a ni p̃aaka.

¹¹Go p̃ogi ki nia Nawota e lawodu pisari a, po naga, P̃a marasike: nalakena dapala waina ku noa sokisoki kasua ki tea maga nalo kakagu Yerusalem, e one ako one naga p̃a moro noa sokisoki ega tapala nogoe Roma.

¹²Go ragi waina e pei aleati, naka ni Yudea eu mari navilasaikiana sikai, po dum̃ada pasa sa ki da, eu noa naga euga ta ganikani go naga euga ta munu mau pa pa euga mari punue sua Paulo.

¹³Go tea maga waina eu mari navivisaana wanogoe eu laapa liu rualima pati.

¹⁴Go eu rumai punusi tea viri warua maga go tea matua maga, po naga, Au po dum̃agami pasa sa ki p̃arua ki gami, naga auga ta kati dogo te navatuna mau pa pa auga mari punue sua Paulo.

¹⁵Nalakena tea wanogoe nimu ma nasaisaiana ni navasap̃otaeana kuga mamau noa ki kiliareko ragi waia naga ega viragi a siwo umai punusi mu, dapala ku pe naga kuga vuausi paratiki atae tea kakana maga: go kinami au po mari m̃ata sua naga auga mari punue a, ragi waina ega ko da umai paki m̃aladigi mau.

¹⁶Ma p̃elemata ni Paulo e dogo nakusugoroana adeada, go e umai po paki ekopu ni nasum̃a ni p̃aaka, po noa ki sai Paulo asa.

¹⁷Go Paulo e soso senturio maga sikai kakada umai punusi a, go e noa ki nia, e naga, P̃a viragi natureai waia pa punusi kiliareko: nalakena e peani te navatuna naga ega noa ki sai a asa.

¹⁸Nalakena tea wanogoe e piragi lua e, po piragi a pa punusi kiliareko, po naga, Paulo tea soliana e soso au umai punusi a, po pavarani au naga aga viragi natureai waia umai punusi ko, waina e peani te navatuna naga ega noa ki‐go asa.

¹⁹Go kiliareko e puati nam̃elearuna, po paki malo daki po pusuusu paki nia, ero dua maau, e naga, Tea waina ku peani a naga p̃a noa ki sai au asa e pei nasava?

²⁰Go e naga, Navarapule maga ni Yudea eu po saisai ki sua navasaana naga euga vavarani ko naga p̃a viragi Paulo siwo paki nasaisaiana ni navasap̃otaeana matamai, dapala ku pe masauna naga p̃a vusuusu ki paratiki te navatuna nalo kakana.

²¹Ma nigo p̃a ta dogo paratiki da mau: nalakena nara naatam̃oli rualima pati tamate seara kakada eu kusugoro e, waina eu po dum̃ada pasa sa ki da, naga euga ta ganikani go naga euga ta munu mau pa pa euga mari punue sua e: go ragi waia eu mari m̃ata sua, po do leogoro nasaiana kiam̃a.

²²Go kiliareko e dip̃aki lua natureai wanogoe po pasa soki a, e naga, P̃a ta noa ki te naata mau naga ku po noa ki sai au tea maga wanogoe.

²³Go e soso senturio maga e dua kakada umai punusi a, po naga, Koroga marim̃ata ki naatam̃oli ni navakalo p̃onotia dua naga euga vano pa pa paki Kaisarea, go tea maga waina eu sakesaake horse euga vei rualima larua, go tea maga waina eu pua naio euga vei p̃onotia dua, aura ketolu ni nap̃ogiana:

²⁴go e noa ki da naga eroga vuati nalo tuavati seara, naga euga mari Paulo ega sakesaake ara, po piragi a ega mauri pa punusi Felix tea maramara.

²⁵Go e midiri tusi sikai waina e dapala tea waia.

²⁶Klaudio Lisia e noa ki Felix tea maramara wia liu, e naga, P̃a laelaea.

²⁷Naatam̃oli waia e pei tea vuasokiana pae naka ni Yudea, po naga ega vei tea maripunueana pae ara, ma kinau go naatam̃oli ni navakalo maga au rumai pa paratiki da po pua lua e, a pei tea noakisaiana naga e pei tea ni Roma.

²⁸Go nalakena a masauna naga aga atae tea waina e pei nalakena eu pasa dip̃a e asa, a piragi a siwo paki nasaisaiana ni navasap̃otaeana adeada:

²⁹go a pap̃ai naga e pei tea vasadip̃aana nalo ni navusuusuana maga ni nawotaeana adeada, ma naga e dika ki navasadip̃aana waina e p̃ia ki namateana kite nasoliana.

³⁰Go ragi waina e pei tea noasaiana paki nau naga nasekeana sikai ega wo doko dip̃a naatam̃oli wanogoe, a dip̃aki lua e paloti punusi ko m̃araverave, po dip̃aki tea vasadip̃a e maga naga euga noa naraem̃a tea waina eu peani a dip̃a e.

³¹Nalakena tea wanogoe tea ni navakalo maga, pae tea waina e pei tea tip̃akiana paki da, eu puati Paulo e pagi, po piragi a p̃ogi paki Antipatri.

³²Ma matamai ki nia eu doropusi tea maga waina eu sakesaake horse maga naga euga sikoti a pano, go eu liliu paki nasum̃a ni p̃aaka:

³³go nara, ragi waina eu rumai paki Kaisarea, po pitua ki tusi wanogoe paki tea maramara, eu lawo ki Paulo ma naraena.

³⁴Go ragi waina e peve sua e, e pusuusu ki naga E pei tea ni seve navanua? Go ragi waina e atae naga e pei tea ni Kilikia,

³⁵e naga, Aga wo dogo ko ragi waina tea vasa dip̃a ko maga ma euga wo umai: go e dip̃a ki nia naga ega vei tea vavaigoroana ekopu ni pretorio ki Herod.