Read Nguna Togoa Etafe North APOSTOLO MAGA 25 Bible Online

APOSTOLO MAGA 25 - Nguna Togoa Etafe North bible

APOSTOLO MAGA 25

¹Nalakena tea wanogoe Festo, waina e umai paki navanua, edaku ki naaleatia dolu e pae Kaisarea sake paki Yerusalem pano.

²Go tea viri warua maga go naatam̃oli vea maga ni naka ni Yudea eu dapusukao ki Paulo paki nia;

³go eu pavarani a, po datago nasaup̃iaana dip̃a e, naga ega tip̃aki lua paraki nia umai paki Yerusalem; eu naga euga kusugoro e napua naga euga mari punue a.

⁴Ma Festo e pasa dara, naga Paulo e pei tea vavaigoroana Kaisarea, go naga nae e naga ega tum̃ana pano paki asa m̃araverave.

⁵E naga, Nalakena tea wanogoe navarapule maga kakamu, euga siwo sikoti au pano, go te navatuna sa e pe toko naatam̃oli wanogoe, euga vasa dip̃a e asa.

⁶Go ragi waina e doko sua m̃aleoputo kakada naaleatia eu da liu latolu kite rualima sikai mau, e siwo paki Kaisarea pano; go matamai ki nia e dasake malo tasake ni navasap̃otaeana, po dip̃aki Paulo naga ega vei tea viragiana umai.

⁷Go ragi waina e umai sua, tea ni Yudea waina eu pae Yerusalem siwo umai eu lawodu dalivirigoro e, po pasa dip̃a e navasadip̃aana laapa go madaga, waina eu mari sa noa sokisoki a;

⁸ma Paulo e dum̃ana pasa korokoro e po naga, A da mari te naleo sa paki nawotaeana ki naka ni Yudea mau, go paki nasum̃a tapu mau, go paki Kaisar mau.

⁹Ma Festo, waina e masauna naga ega talua nasaup̃iaana ki naka ni Yudea, e pasa dara Paulo, po naga, Ku suasua naga p̃a sake paki Yerusalem pano, po pei tea vasap̃otaeana asa nalo ni tea maga wanogoe naraegu kite?

¹⁰Ma Paulo e naga, A lawodu narae ni malo tasake ni navasap̃otaeana ki Kaisar, tokora waina e p̃ia naga aga vei tea vasap̃otaeana asa: a da mari dagele paki naka ni Yudea mau, go nigo ma ku atae m̃ata ki nia.

¹¹Ma a pe vei tea mari dagele, po mari te navatuna waina e p̃ia ki namateana, a pe ta pavara naga aga ta mate mau: ma te navatuna ni tea maga wanogoe, waina nara waia eu pasadip̃a au ara, e pe ta doko mau, te naata e pe ta mari atae pitua ki nau paki da mau. A pavarani Kaisar.

¹²Ragi wanogoe Festo, ragi waina e pusum̃aki sua paki tea vasap̃otae maga; e pasa dara, e naga, Ku pavarani Kaisar: p̃a wo pa punusi Kaisar.

¹³Go ragi waina naaleatia seara eu nopu, Acrippa nawota go Bernike ero umai paki Kaisarea, po pasa dodomi Festo.

¹⁴Go ragi waina ero doko asa naaleatia laapa, Festo e noa ki sai nawota naleo nalo ni Paulo, e naga, Naatam̃oli sikai e doko waina Felix e doropusi a e pei tea soliana doko:

¹⁵waina, ragi waina a doko Yerusalem, tea viri warua maga go tea matua maga ni naka ni Yudea eu dapusukao ki nia paki nau, po datago naga ega vei tea tip̃akotoviana.

¹⁶Go e pasa dara paki da, naga e da pei natomariana ki naka ni Roma mau naga euga vitua ki te naata, pa pa pa tea vasadip̃aana ega veani tea vasadip̃a maga euga lawodu naraena, go ega veani ragi naga ega tum̃ana pasa korokoro e nalo ni navasadip̃aana.

¹⁷Go ragi waina eu saisai umai paki nea, a da mari daliali mau, ma matamai ki nia a dasake malo tasake ni navasap̃otaeana, po dip̃aki naatam̃oli wanogoe naga ega vei tea viragiana umai.

¹⁸Go ragi waina tea vasa dip̃a maga eu duleana, eu da noa te navasadip̃aana ni tea sa maga nalo kakana mau dapala waina kinau a midoa ki nia;

¹⁹ma eu peani navusuusuana seara dip̃a e nalo ni nalotuana adeada, go nalo ni tea sikai Yesu, waina e mate, waina Paulo e noa sokisoki naga e mauri.

²⁰Go kinau, nalakena a midoaki putuaki navusuusuana nalo ni tea maga wanogoe, a noa naga e pe suasua naga ega vaki Yerusalem, po pei tea vasap̃otaeana asa nalo ni tea maga wanogoe.

²¹Ma ragi waina Paulo e pavara naga ega vei tea vavaigoroana raki navasap̃otaeana ki Aucusto, a dip̃a ki nia naga ega vei tea vavaigoroana pa pa paki ragi waina aga tip̃aki lua e pa punusi Kaisar.

²²Go Acrippa e noa ki Festo, e naga, Kinau ma a masauna naga aga rogo naatam̃oli wanogoe. E naga, Matamai p̃a wo dogo e.

²³Go matamai ki nia, ragi waina Acrippa e umai sua, nara ma Bernike ero dua umai, pilake navakavakaeana warua, go ragi waina ero paki ekopu sua em̃ago ni narogoana, nara ma kiliareko maga, go naatam̃oli warua maga ni natokoana eu mamau, Festo e pitip̃aki go Paulo e pei tea viragiana umai paki ekopu.

²⁴Go Festo e naga, Acrippa nawota, go naatam̃oli maga mamau puti waina tu mamau doko nea, ku leopunusi naatam̃oli waia, waina taua mamau ni naka ni Yudea eu rumai punusi au asa, Yerusalem go tokora waia, eu do pioso naga e da p̃ia mau naga ega mauri doko.

²⁵Ma kinau a pap̃ai naga e da mari te navatuna waina e p̃ia ki namateana mau: go nalakena nae e dum̃ana pavarani Aucusto a midoaki p̃otae naga aga tip̃aki lua e.

²⁶Ma a da peani te navatuna nalo kakana mau waina e pei lomau waina aga midiri paki nawota aginau asa. Nalakena tea wanogoe a po piragi a dave umai e doko naraemu, go p̃arua liu ki nia doko naraem̃a, nawota Acrippa, naga, ragi waina navuausiana ega nopu, aga veani te navatuna waina aga midiri a.

²⁷Nalakena a midoaki nia naga a pe tip̃aki lua tea soliana sikai, po da noa sai navasadip̃aana kakana maga mau, e pe vei lake tika.