Read Nguna Togoa Etafe North APOSTOLO MAGA 27 Bible Online

APOSTOLO MAGA 27 - Nguna Togoa Etafe North bible

APOSTOLO MAGA 27

¹Go ragi waina e pei tea midoakip̃otaeana naga auga vorau paki Italia pano, eu pitua ki Paulo go tea soliana p̃ota seara paki senturio sikai nagisana Iulio, tea ni tagona ki Aucusto.

²Go au pagi shipe ni Adramittio sikai, waina e naga ega sava paki tokora maga ni elau ni Asia, po porau pano, Aristarko, tea ni Thessalonika ni Masedonia sikai e sikoti gami pano.

³Go matamai ki nia au paki euta Sidon: go Iulio e saup̃ia ki Paulo, po suasua ki nia naga ega va punusi tana ri maga naga ega sua nadodomiana.

⁴Go au m̃elu dua ki tokora wanogoe, po porau etano ki Kupero, nalakena nalagi maga waina eu sau pae kivea.

⁵Go ragi waina au porau duagoto sua natasi waina e doko p̃ai Kilikia go Pamfilia, au rumai paki Mira ni Likia.

⁶Go tokora wanogoe senturio e pap̃ai shipe sikai ni Alexanderia waina e sava paki Italia; go e mari gami au pagi asa.

⁷Go ragi waina au sava daliali naaleatia laapa, po umai ki namarisaraana doko p̃ai Knido, go nalakena nalagi e da moro suasua ki gami mau, au sava sili Krete, doko p̃ai Salmone;

⁸go au sava orovi a ki namarisaraana po umai paki tokora sikai waina e pei tea sosoana ki Nawora Wia; waina natokoana Lasea e pei m̃aladigi ki nia.

⁹Go ragi waina ragi varau e nopu, go navorauana e sa, nalakena naaleatia ni Navaliana e po pano sua, Paulo e pasa paratiki da,

¹⁰po noa ki da, e naga, Maariki maga, a punusi naga navorauana waia ega wo pilake namarisakiana go natapepuolikiana warua, naloriki musagiana go rarua eroga wo da sikida sua e mau, ma namauriana anigida ma ega wo sua e.

¹¹Ma senturio e dogo paratiki p̃arua ki nawota ni shipe go ni talakeana, ma e dogo paratiki kiki ki tea maga waina eu pei tea noaana pae Paulo.

¹²Go nalakena nawora wanogoe e da p̃ia naga euga toko asa ragi ni namaladiana mau, tea laapa kakada eu pitua ki namidodoana adeada naga euga vorau m̃elu dua ki nia pano, eu pe alagoro mari atae umai paki Foinix, po doko asa ragi ni namaladiana; e pei nawora sikai ni Krete waina e leo paki nalagi tokolau wia go ruatu.

¹³Go ragi waina nalagi ni sauth e sau matemate, eu midoaki nia naga eu pap̃ai tea waina eu masauna, go eu pua dakati agker po sava orovi Krete, m̃aladigi ki euta.

¹⁴Ma edaku ki ragi e da parau mau, nalagi atu sikai e atu siwo pae asa umai, waina e pei tea sosoana ki Eurokiedon:

¹⁵go ragi waina shipe e pei tea vuatiana, po mari sa punusi namata ni nalagi, au dakare po pei tea tapeana pano.

¹⁶Go au sava sili naure kiki sikai waina e pei tea sosoana ki Kauda, po mari atae ki nawosiana warua mari soki boti:

¹⁷go ragi waina eu puati sua e pakilagi, eu dape tea silae maga, po soli soki rarua ara; go, nalakena eu mataku eu pe vei tea nadikiana paki Sirti, eu doro nalae pakitano, po sale pano dapala nogoe.

¹⁸Go nalakena nalagi atu e mari gami au datasoki p̃arua, matamai ki nia eu atulake nadi ki naloriki musagiana paki natasi;

¹⁹go wasa ki nia eu nadi ki naleo maga ni rarua ki nam̃elearuda.

²⁰Go ragi waina elo go m̃asoe maga eu da maramalaga mau naaleatia laapa, go nalagi atu e da kiki mau e one gami one, naleogoroana naga auga vei tea mautipauriana e pei tea tapeluaana puti.

²¹Go ragi waina eu da ganikani ragi varau, Paulo e lawodu m̃aleoputo kakada, po naga, Maariki maga, ku pe rogo parati ki nau, po da porau pae Krete mau, po da pap̃ai namarisakiana go natapepuolikiana waia mau, e pe wia.

²²Go ragi waia a pasa paratiki mu naga kuga marasike: nalakena namauriana ki te naata kakamu ega wo da puoli mau, ma shipe ega wo sikina puoli.

²³Nalakena agelo sikai ki Sup̃e waina e peani au, go waina a maneana suasua, e lawodu pisari au p̃ogi waia,

²⁴po naga, P̃a ta mataku mau, Paulo; e one ako one naga p̃a lawodu narae ni Kaisar: go p̃a leo, Sup̃e e po dua ko tea maga mamau puti waina eu porau sikoti ko.

²⁵Nalakena tea wanogoe kuga marasike, maariki maga: nalakena a saralomau navasaana ki Sup̃e, naga ega wo pakilina dapala waina e po pei tea noa ki nau‐ana.

²⁶Ma e one gida one naga tuga vei tea nadikiana paki euta naure sikai.

²⁷Ma ragi waina nap̃ogiana kerualima sikai tamate kevati e umai, go au pei tea tape dagiagikiana natasi ni Adria, p̃ogi matua naatam̃oli ni rarua eu midoaki nia naga eu rumai paki m̃aladigi ki navanua sikai;

²⁸go eu nadidorogo, po pap̃ai tau rualima dua: go edaku ki ragi kiki, eu moro nadidorogo, po pap̃ai tau rualima sikai tamate lima.

²⁹Go nalakena eu mataku mase eu pe vei tea nadikiana paki euta malo ni vatu, eu diroa ki agker pati pae kiedaku, po masau p̃arua ki aleati.

³⁰Go ragi waina naatam̃oli ni shipe eu laaga naga euga sava m̃elu dua ki shipe pano, po doro sua boti paki natasi, ki nakokorokiana, dapala eu pe naga euga tiroa ki agker seara pae kivea,

³¹Paulo e noa ki senturio go tea ni navakalo maga, e naga, Nara eu pe ta doko shipe mau, ku mari sa pei tea mautipauriana.

³²Ragi wanogoe tea ni navakalo maga eu masi kotovi namea maga ni boti, po doroe esale pano.

³³Go ragi waina aleati e pei m̃aladigi, Paulo e pavarani puti ra naga euga kani navinaga seara, e naga, Masoso e pei naaleatia kerualima sikai tamate kevati waina ku do leogoro po pali doko, po da gani te navatuna mau.

³⁴Nalakena tea wanogoe a pavarani mu naga kuga kani navinaga seara: nalakena tea wanogoe e p̃ia ki namautipaurimu‐ana: nalakena napati ni nalolu sikai ega wo da puoli ki nap̃au ni te naata sikai kakamu mau.

³⁵Go ragi waina e noa sua tea wanogoe, po dape sua bred, e pasa dodom̃ata ki Sup̃e narae ni tea maga mamau puti: go e dovap̃orae a, po atulake ganikani.

³⁶Ragi wanogoe eu mamau puti marasike, go nara ma eu gani navinaga seara.

³⁷Go au mamau puti waina au doko shipe au pei naatam̃oli p̃onotia dua rualima takuna larua tamate latesa.

³⁸Go ragi waina eu ganikani sua, eu mari shipe e masalesale, eu nadi ki korn paki natasi.

³⁹Go ragi waina e pei aleati, eu da atae navanua mau: ma eu punusi naweluki sikai waina e pei nawora, go eu pusum̃aki eu pe mari atae mari shipe ega vaki euta asa.

⁴⁰Go eu peresi lua agker maga, po doropusi ra eu madoko natasi, go ragi sikai maau wanogoe eu peresi namea maga ni nawose p̃owolau dua: go eu pua sike nalae ni kivea paki nalagi, po p̃owolau paki euta.

⁴¹Ma eu duap̃alausi tokora sikai waina natasi dua ero saisai asa, go eu mari shipe e paki euta; go kivea e gona po kasua doko, ma kiedaku e atulake maworawora ki nakasuaana ni napeao maga.

⁴²Go namidoakip̃otaeana ki tea ni navakalo maga e pei naga euga mari punue tea soliana maga naga te naata sikai kakada ega ta ava paki euta, po sava pano mau.

⁴³Ma senturio, nalakena e masauna naga ega mauti pauri Paulo, e dip̃agoro ra namidoakimasauana adeada; po pitip̃aki naga tea maga waina eu ava atae euga vea dum̃ada nadi ki da paki natasi, po pea paki euta:

⁴⁴go naga tea p̃ota maga, seara euga one napapa maga, go seara euga one naleo p̃ota maga ni rarua. Go dapala nogoe e pakilina naga eu mamau puti pei tea mautipauriana paki euta.