Read Nguna Togoa Etafe North APOSTOLO MAGA 28 Bible Online

APOSTOLO MAGA 28 - Nguna Togoa Etafe North bible

APOSTOLO MAGA 28

¹Go ragi waina au pei tea mautipauriana sua, au atae ragi wanogoe naga naure wanogoe e pei tea sosoana ki Melita.

²Go naatatoko maga eu piseiki gami nadodomi‐naatam̃oliana waina e da pei tea m̃oli mau: nalakena eu sui nakapu sikai, po piragi soki puti gami, nalakena usa waina e doko, go nalakena namaladiana.

³Ma ragi waina Paulo e pila daua ki taua sikai ni nakau kokolo, po doropusi a nakapu, m̃aata sa sikai e dave umai nalakena navivitinuana, po liko nam̃elearuna.

⁴Go ragi waina naatatoko maga eu punusi nalo mauri wanogoe e dau pae nam̃elearuna, eu dum̃ada noa ki da, eu naga, Naatam̃oli waia e pei tea mari punue lomau, waina e po pei tea mautipauriana pa dua ki natasi, ma Nasikoana e da suasua ki nia naga ega mauri mau.

⁵Ma e pulua ki nalo mauri wanogoe paki nakapu, po da sua te nasaana mau.

⁶Ma eu leogoro naga ega topu, kite naga ega rowo pakitano po mate m̃araverave; ma ragi waina eu leogoro ragi varau, po da punusi te navatuna sa e pakilina ki nia mau, eu midoaki piri, po noa naga e pei sup̃e sikai.

⁷Go m̃aladigi ki tokora wanogoe vanua seara e doko waina e pei tea ki naatam̃oli warua ni naure wanogoe, nagisana Poplio; waina e piragi soki gami, po pakale m̃ata ki gami naaleatia dolu.

⁸Go e pakilina naga Poplio tamana e sasana one, e sua namasakiana go nasidomialaana: go Paulo e paki ekopu punusi a, po dapasavasa, go e pusake nam̃elearuna maga asa po mari pauri a.

⁹Go ragi waina tea wanogoe e pei tea marisuaana, tea p̃ota maga ni naure wanogoe waina eu sua nasasanaana maga nara ma eu rumai, po pei tea maripauriana: go eu dodomadagani gami ki nadodomadaganiana laapa;

¹⁰go ragi waina au porau pano, eu maginami duatua shipe naleo maga waina au dika ara.

¹¹Go edaku ki atelagi dolu au porau shipe ni Alexanderia sikai, waina e doko naure wanogoe ragi ni namaladiana, waina navaivaiana kakana e pei Nedue Naanoai.

¹²Go au paki euta Sirakuse, po doko asa doko naaleatia dolu.

¹³Go au m̃elu dua ki tokora wanogoe, po daliviri umai paki Recio: go edaku ki naaleatia sikai nalagi ni sauth sikai e sau, go wasa ki nia au rumai paki Puteoli:

¹⁴waina au pap̃ai taigida seara asa, po pei tea vavaraniana naga auga toko sikoti ra naaleatia larua: go au dapala nogoe umai paki Roma.

¹⁵Go taigida maga, ragi waina eu dogo gami, eu pae asa umai naga euga sua gami pa pa pa paki Malo ni Navakokotoana ki Appio, go Nasum̃a ni Nam̃enakiana Dolu: go ragi waina Paulo e punusi ra, e pasadodom̃ata ki Sup̃e, po marasike.

¹⁶Go ragi waina au rumai paki Roma, Paulo e pei tea suasuakiana naga ega toko mamau sikoti naatam̃oli ni navakalo sikai waina e do pavaigoro e.

¹⁷Go e pakilina, naga edaku ki naaleatia dolu e soso saisai ki tea maga waina eu pei tea warua ni tea ni Yudea: go ragi waina eu saisai umai, e noa ki da, e naga, Taigu maga, kinau, waina a da mari te navatuna dip̃a narei, kite natomariana maga ki tamagida maga, a pei tea vituakiana soliana m̃elu dua ki Yerusalem paki nam̃elearu ni tea ni Roma:

¹⁸waina, ragi waina eu puausi sua au, eu masauna naga euga veresi au, nalakena te nalakena ni namateana e da doko au mau.

¹⁹Ma ragi waina tea ni Yudea eu pasa dugoro e, a pei tea mariana a pavarani Kaisar; ma a da peani te navatuna mau waina aga vasa dip̃a nalauna aginau asa.

²⁰Go tea wanogoe e pei nalakena a pitautau mu naga aga vunusi mu po pusum̃aki paki mu: nalakena naleogoroana ki Israel e pei nalakena a pei tea soliana ki namori ni vatu waia.

²¹Go eu noa ki nia, eu naga, Kinami au da dape te tusi pae Yudea nalo kakam̃a mau, go te naata sikai ni taigida maga e da umai po dogorogo kite pasa te navatuna sa nalo kakam̃a mau.

²²Ma au masauna naga auga rogo kiam̃a tea waina ku midoaki nia: nalakena nalo ni tagona waia e pei tea ataeana paki gami naga e pei tea vasadugoroana sara tokora.

²³Go ragi waina eu maneana datuta ki naaleatia sikai, eu rumai punusi a paki tokora waina e m̃enaki asa, eu laapa; go e pasa lawolawo ki nia paki da, po noa sokisoki kasua ki namasakiana ki Sup̃e, po pasadie ra nalo ni Yesu, pae nawotaeana ki Moses go pae profeta maga, e pae malip̃ogi pa pa paki ragi melu.

²⁴Go te seara eu saralomau tea maga waina eu pei tea noaana, go te seara eu da saralomau mau.

²⁵Go ragi waina eu pasa panop̃ota dum̃ada paki da, eu pano, edaku ki Paulo e noa sua navasaana sikai, e naga, Naatana Tapu e pasa p̃ia pae profeta Isaiah paki tamamu maga, e naga,

²⁶P̃a va punusi narei waia, po naga, Kuga wo dogo ki narogoana, po da midoaki atae mau. Go kuga wo leosai po do leosai, po da leo atae mau:

²⁷Nalakena nap̃op̃o ni narei waia e m̃anopunopu, Go eu dogo madagadaga ki nadaligada maga, Go eu puluti namatada; Naga euga ta punusi ki namatada mau, Po da dogo ki nadaligada mau, Po da midoaki atae ki nop̃op̃oda mau, Po da liliu umai mau. Go naga aga ta mari pauri ra mau.

²⁸Nalakena tea wanogoe ega vei tea ataeana paki mu, naga namautipauriana waia ki Sup̃e e pei tea tip̃akiluaana paki tea ni nalauna p̃ota maga: go nara euga wo dogo e.

²⁹(Go ragi waina e noa sua tea maga wanogoe, tea ni Yudea eu pano, po peani navusuusuana warua dum̃ada paki da.)

³⁰Go e doko natau mamau dua nasum̃a vasadapuiana aneana, po piragi soki tea maga mamau puti waina eu paki ekopu punusi a,

³¹e do dogorogo ki namarakiana ki Sup̃e, po do pasa piseiki da tea maga nalo ni Nawota Yesu Kristo ki sara naviviariana, te naata e da dip̃agoro e asa mau.