Read Nguna Togoa Etafe North APOSTOLO MAGA 3 Bible Online

APOSTOLO MAGA 3 - Nguna Togoa Etafe North bible

APOSTOLO MAGA 3

¹Go Petero go Yoane ero sake paki nasum̃a tapu aura ni natapasavasaana, aura keloveti.

²Go naatam̃oli sikai waina e pei pito pae nap̃ele ni p̃ilana e pei tea tapetapeana, waina eu doropusi a sara naaleatia e one pisari namata ni nasum̃a tapu, waina e pei tea sosoana ki Tea leom̃atakiana, naga ega tatagovi tea maga waina eu paki roara ni nasum̃a tapu ki nadodomiana;

³go ragi waina e punusi Petero go Yoane ero naga eroga vaki roara ni nasum̃a tapu, e datago naga ega tape nadodomiana sikai.

⁴Go Petero e leosoki a, nara ma Yoane, po naga, P̃a leo paki gami.

⁵Go nae e midoakisoki ra, e midoaki nia naga ega tape te navatuna kiada.

⁶Ma Petero e naga, Silver go kold a dika ara; ma tea waina a peania adua ko asa. Pae nagisa ni Yesu Kristo ni Nasareth, p̃a surata.

⁷Go e puati nam̃elearuna ni matua, po sike a: go nam̃elena maga go navatu ni nakurukuna maga eu kasua m̃araverave.

⁸Go e sokamidi duleana, po lawodu, po pae asa surata; go e sikoti ra paki ekopu ni nasum̃a tapu, e surata, po sokamidi, po pasa samasamani Sup̃e.

⁹Go narei mamau eu punusi a e surata po pasa samasamani Sup̃e:

¹⁰go eu loatae a naga nae e pei tea waina e do natano raki nadodomiana pisari Namata‐pua Leom̃atakiana ni nasum̃a tapu; go eu pei tea vuatiana ki namagaana go ki nasaram̃akotoana nalakena tea waina e pakilina ki nia.

¹¹Go ragi waina nae e do pua soki Petero go Yoane, narei mamau eu sava saisai punusi ra, natara‐taup̃a waina e pei tea sosoana ki tea ki Solomon, eu maga p̃arua.

¹²Go ragi waina Petero e punusi a, e pasa dara paki narei, e naga, Naatam̃oli ni Israel maga, ekasana ku maga nalo ni naatam̃oli waia? Kite ekasana ku siko gami, dapala waina au pe mari a e surata ki nakasuaana aginami kite ki nawiaana aginami?

¹³Sup̃e ki Abraham, go ki Isaak, go ki Yakob, Sup̃e ki tamagida, e paka samasamani Tea Suasua aneana Yesu; waina nimu ku pitua ki nia, po pasa goro e narae ni Pilato, ragi waina nae e midoaki p̃otae naga ega veresi a.

¹⁴Ma nimu ku pasa goro Tea Tapu go Tea Leana, po datago naga naatam̃oli mari punue sikai ega vei tea vituakiana paki mu, go ku mari punue Nawota ni namauriana;

¹⁵waina Sup̃e e sike a e duleana m̃elu dua ki tea mate; waina kinami au pei tea noasokisoki kakana.

¹⁶Go nagisana nalakena nasaralomauana ni nagisana, e mari naatam̃oli waia e kasua, waina ku leo punusi a po atae a: io, nasaralomauana waina e pae asa e dua e nawialuaana waia naraemu mamau puti.

¹⁷Go ragi waia, tai maga, a atae naga ku mari a nalakena naveisap̃oana, dakiusi waina tea maraki animu maga ma eu mari a.

¹⁸Ma tea maga waina Sup̃e e pea noa sai a pae nawoka ni profeta maga mamau puti, naga Kristo aneana ega sua navitinumateana, e mari a e lolomana dapala nogoe.

¹⁹Nalakena tea wanogoe kuga midoaki doa, po moro maradoa, naga namarinaleosaana animu maga euga vei tea kasiluaana, naga ragi ni namaromaroana maga euga tapala nogoe pae narae ni Yehovah umai;

²⁰go naga ega tip̃aki lua Kristo umai, waina e manimu pei tea tawonakiana,

²¹Yesu, waina e one nakoroatelagi one naga ega viragi a pa pa paki ragi maga ni natapeliliuakiana ni naleo maga mamau puti, waina Sup̃e e pasa ara pae nawoka ni profeta tautau aneana maga pae ragi vea ni maramana pa pa.

²²Moses e noa lomau, e naga, Yehovah Sup̃e ega wo manimu mari profeta sikai m̃elu taimu maga ega vakilina, dakiusi au; kuga wo dogo paratiki nia nalo ni naleo maga mamau puti waina ega wo pasa paki mu ara.

²³Go ega wo doko naga sara naatam̃oli waina euga wo da dogo paratiki profeta wanogoe mau, euga wo pei tea maripuolikiana m̃elu dua ki narei.

²⁴Io, go profeta maga mamau puti pae Samuel go tea maga waina eu edakugoro pa pa, tea maga waina eu pasa, nara ma eu dogorogo ki naaleatia maga waia.

²⁵Nimu ku pei natu ni profeta maga, go ni navasasokiana waina Sup̃e e pasa soki tamamu maga asa, e noa ki Abraham, e naga, Go naworam̃a nalauna maga mamau puti ni maramana euga wo pei tea vasap̃iakiana asa.

²⁶Sup̃e e mari Tea Suasua aneana e pakilina, e dip̃aki lua e umai pea punusi mu, naga ega vasa p̃ia ki mu, ega vua doa sara naata kakamu m̃elu dua ki namarinaleotageleana animu maga.