Read Nguna Togoa Etafe North APOSTOLO MAGA 5 Bible Online

APOSTOLO MAGA 5 - Nguna Togoa Etafe North bible

APOSTOLO MAGA 5

¹Ma naatam̃oli sikai nagisana Anania, nara ma anagoroi Sapfeira, e sori tea veaniana sikai,

²po lawogoro naulu kakana seara, anagoroi ma e atae a, go e dape namagovai sikai kakana umai, po doropusi a pisari nam̃ele ni apostolo maga.

³Ma Petero e naga, Anania, ekasana Satan e pakavuro nap̃op̃om̃a naga p̃a soro Naatana Tapu, go naga p̃a lawogoro naulu ni natano seara kakana?

⁴Ragi waina e doko, e da pei tea anigo kite? Go ragi waina e pei tea soriana sua, e da doko naveinawotaana anigo kite? Ekasana ku doropusi naleo waia nap̃op̃om̃a? Ku da soro naatam̃oli maga mau, ma ku soro Sup̃e.

⁵Go Anania ragi waina e dogo navasaana maga wanogoe e dowo po marodua ki namerona: go namatakuana warua e pakilina ki tea maga mamau puti waina eu dogo e.

⁶Go natureai maga eu duleana po lulugoro e, go eu dapetape a paki katama po ova ki nia.

⁷Go edaku ki namalopa sikai e alagoro pei aura dolu, anagoroi, waina e da atae tea waina e pei tea mariana mau, e umai paki ekopu.

⁸Go Petero e pasa dara paki nia, e naga, P̃a noa ki nau, ku sori natano raki tea waina kite? Go e naga, Ioro, raki tea waina.

⁹Ma Petero e noa ki nia, e naga, Ekasana koro saisai ki nap̃op̃omu naga koroga maridogo Naata ni Yehovah? P̃a leo, nam̃ele ni tea maga waina eu po ova ki am̃awota eu doko pisari namata, go euga wo dapetape ko paki katama.

¹⁰Go e dowo m̃araverave pisari nam̃elena maga po marodua ki namerona: go natureai maga eu rumai paki ekopu po pap̃ai a e mate, go eu dapetape a paki katama, po ova ki nia pisari anawota.

¹¹Go namatakuana warua e pakilina ki ekalesia mamau, go tea maga mamau puti waina eu dogo tea maga wanogoe.

¹²Go navaivaiana laapa go tea ni namagaana laapa eu pei tea mariana pae nam̃elearu ni apostolo maga m̃aleoputo ni narei; go eu mamau puti doko natara‐taup̃a ki Solomon nap̃op̃oda sikai maau asa.

¹³Ma tea p̃ota maga sikai kakada e da piviari puluti ra mau: ma narei eu dodomadagani ra;

¹⁴go tea saralomau laapa eu moro sokari Nawota, taua maga ni naanoai maga go ni nagoroi maga;

¹⁵dapala waina eu dapetape tea sasana maga paki katama paki napua welewelea maga, po doropusi ra eu one nawewele maga go nap̃anu maga, naga, ragi waina Petero ega umai pano, meluna ega melugoro seara kakada.

¹⁶Go taua ni naatam̃oli maga ni natokoana maga dalivirigoro Yerusalem, nara ma eu do umai saisai, eu do dapetape tea sasana maga, go tea maga waina naatana loa maga eu mari sa ki da: go eu do pei tea maripauriana puti.

¹⁷Ma tea viri warua liu e duleana, nara ma tea maga mamau puti waina eu sikoti a doko eu mamau (waina eu pei tagona ni Sadduki maga),

¹⁸go eu pura ki naroitoiana, po nadi ki nam̃elearuda apostolo maga, po doropusi ra eu doko ekopu ni nasum̃a ni navavaiana ki tea laapa.

¹⁹Ma agelo ki Yehovah sikai e p̃olagati namata maga ni nasum̃a ni navavaiana p̃ogi, po piragi lua ra paki katama,

²⁰po naga, Kuga vano, po lawodu nasum̃a tapu po pasa ki narei navasaana maga mamau puti ni Namauriana waia.

²¹Go ragi waina eu dogo tea wanogoe, eu paki nasum̃a tapu ragi ni namakotokotoana, po pasapiseiki. Ma tea viri warua liu e umai, nara ma tea maga waina eu sikoti a doko eu mamau, po soso saisai ki nasaisaiana ni navasap̃otaeana, go tea matua maga mamau puti ni Israel natuna maga, po dip̃aki lua paki nasum̃a ni nasolisoliana naga euga viragi ra umai.

²²Ma tasiga maga waina eu rumai eu da pap̃ai ra ekopu ni nasum̃a ni navavaiana mau; go eu liliu, po dogorogo, po naga,

²³Au pap̃ai nasum̃a ni nasolisoliana e p̃ono kasua, go tea vavai maga eu lawodu pisari namata maga: ma ragi waina au p̃olagati, au da pap̃ai te naata ekopu mau.

²⁴Go ragi waina nawota ki tea vavai maga ni nasum̃a tapu go tea viri warua maga eu dogo navasaana maga wanogoe, eu midoakiputuaki p̃arua nalo kakada, tea wanogoe ega vei nasava?

²⁵Go sikai e umai po dogorogo paki da, e naga, Kuga leo, naatam̃oli maga waina ku doropusi ra ekopu ni nasum̃a ni navavaiana eu doko nasum̃a tapu, eu lawodu po do pasapiseiki narei.

²⁶Ragi wanogoe nawota ki tea vavai maga e pano, nara ma tasiga maga eu mamau, po piragi ra umai, ma eu da mari kasua ki da mau; nalakena eu matauki narei, eu pe vei tea nadiana ki vatu.

²⁷Go ragi waina eu piragi sua ra umai, eu lawo ki da narae ni nasaisaiana ni navasap̃otaeana.

²⁸Go tea viri warua liu e pusuusu paki da, e naga, Au pasa paratiki kasua ki mu naga kuga ta pasapiseiki pae nagisa waina mau: go kuga leo, ku pakavuro Yerusalem ki navasapiseikiana animu, po midoa ki nia naga kuga mari nada ni naatam̃oli waina ega liko gami.

²⁹Ma Petero go apostolo maga eu pasa dara po naga, E one gami one naga auga rogo paratiki p̃arua ki Sup̃e go naga auga rogo paratiki kiki ki naatam̃oli maga.

³⁰Sup̃e ki tamagida maga e sike Yesu e duleana, waina nimu ku mari punue a, ku sara ki nia nakau sikai.

³¹Nae Sup̃e e dape a pakilagi ki nam̃elearuna ni matua naga ega vei Nawota go Tea Maumau pauri, naga ega tua Israel namidoakidoaana go namidoakikorokoroana ni namarinaleosaana maga.

³²Go kinami au pei tea noa sokisoki maga ni tea maga wanogoe; go Naatana Tapu, waina Sup̃e e dua tea maga asa waina eu dogo paratiki nia.

³³Ma ragi waina eu dogo tea wanogoe, eu maeto p̃arua, po mdioaki nia naga euga mari punue ra.

³⁴Ma sikai e duleana nasaisaiana ni navasap̃otaeana, Farisi sikai, nagisana Camaliel, tea vasapiseiki sikai ni nawotaeana, waina narei mamau eu dodomadagani a, go e pitip̃aki naga euga mari naatam̃oli maga waia euga tave pano ragi kiki.

³⁵Go e noa ki da, e naga, Naatam̃oli ni Israel maga, kuga tum̃amu leo parati ki mu nalo ni naatam̃oli maga waia, tea waina ku naga kuga mari a.

³⁶Nalakena pea ki naaleatia maga waia Teuda e duleana, po dum̃ana noa e naga e pei te naata; waina taua ni naatam̃oli maga, eu alagoro pei p̃onotia pati, eu puluti a: waina e pei tea maripunueana, go tea maga mamau puti waina eu dogo parati ki nia eu pei taperavera, po pei tea m̃oli.

³⁷Edaku ki naatam̃oli wanogoe Yuda ni Calilea e duleana naaleatia maga ni namidiri‐nagisada‐ana, po piragi lua narei seara kakada eu dausi a: nae ma e mate; go tea maga mamau puti waina eu dogoparatiki nia eu pei taperavera.

³⁸Go ragi waia a noa ki mu, Kuga m̃elu dua ki naatam̃oli maga waia, po doropusi ra euga madoko: nalakena namidoakip̃otaeana waia kite nawosiana waia e pe vei tea ni naatam̃oli maga, e pe wo pei tea rakaiana:

³⁹ma e pe vei tea ni Sup̃e, ku mari sa dakai ra; mase ku pe vei tea vap̃aiana ku marimari Sup̃e.

⁴⁰Go eu dogo paratiki nia: go ragi waina eu soso sua apostolo maga umai punusi ra, eu parati ra, po pasa dip̃agoro ra naga euga ta pasa pae nagisa ni Yesu mau, go eu suasua ki da naga euga vano.

⁴¹Nalakena tea wanogoe eu m̃elu dua ki narae ni nasaisaiana ni navasap̃otaeana pano, po laelaea nalakena eu pei tea midoakiana naga eu pei tea wia naga euga sua namaridaoana nalakena Nagisana.

⁴²Go sara naaleatia, nasum̃a tapu go nasum̃a adeada maga, eu da makoto ki nia mau, ma eu do pasapiseiki po do dogorogo ki Yesu naga e pei Kristo.