Read Nguna Togoa Etafe North APOSTOLO MAGA 6 Bible Online

APOSTOLO MAGA 6 - Nguna Togoa Etafe North bible

APOSTOLO MAGA 6

¹Ma naaleatia maga wanogoe, ragi waina tea vasapiseikiana maga eu do disu po laapa, natauruuruana sikai e pakilina m̃aleoputo kakada, tea ni Yudea maga waina eu pasa pae Hellas eu dauruuru dip̃a tea maga waina eu pasa pae Heberu, nalakena nagoroi malepu adeada maga eu pei tea leo kalauana nasuasuaana ni sara naaleatia.

²Go tea rualima sikai tamate dua eu soso taua ni tea vasapiseikiana maga umai punusi ra, po naga, E da p̃ia mau naga kinami auga toropusi navasaana ki Sup̃e ega madoko, po magi wede maga suasua.

³Nalakena tea wanogoe, tai maga, kuga tum̃amu leo matadoa m̃elu dua ki mu naatam̃oli larua, waina eu pei tea noasokisokiana, waina eu pura ki Naatana go ki namanumatuaana, waina auga lawo ki da dap̃au nawosiana waia.

⁴Ma kinami auga wo doko mau doko natapasavasaana go nasuasuaana ni navasaana.

⁵Go taua mamau eu dogo m̃ata ki navasaana wanogoe: go eu matadoa Stefano, naatam̃oli sikai waina e pura ki nasaralomauana go ki Naatana Tapu, go Filipo, go Prokoro, go Nikanor, go Timon, go Parmena, go Nikolao proseluto sikai ni Antiokia:

⁶waina eu lawo ki da narae ni apostolo maga: go ragi waina eu dapasavasa sua, eu pusake nam̃elearuda maga ara.

⁷Go navasaana ki Sup̃e e disu po p̃arua; go naveveana ni tea vasapiseikiana maga e disu p̃arua po laapa sa Yerusalem, go taua warua ni tea viri maga eu dogo paratiki nasarolomauana.

⁸Go Stefano, waina e pura ki nasaup̃iaana go nakasuaana, e mari tea ni namagaana warua maga go navaivaiana maga m̃aleoputo ni narei.

⁹Ma tea ni nasum̃a ni nasaisaiana waina e pei tea sosoana ki nasum̃a ni nasaisaiana ki tea Libertini maga seara kakada eu duleana, nara ma tea ni Kurene seara kakada, go tea ni Alexandria seara kakada, go tea ni Kilikia go Asia seara kakada, po pululu ki Stefano.

¹⁰Go eu mari sa lawodugoro namanumatuaana go Naatana waina e pasa asa.

¹¹Ragi wanogoe eu dautau naatam̃oli seara waina eu naga, Au dogoe epasa navasaana sa dip̃a Moses go Sup̃e.

¹²Go eu pasadie narei, go tea matua maga, go tea midiri maga, po umai pa paratiki nia, po pua soki a, po piragi a paki nasaisaiana ni navasap̃otaeana,

¹³po mari tea noasokisoki sorosoro seara eu lawodu, waina eu naga, Naatam̃oli waia e da makoto ki nia mau, ma e do pasa navasaana maga dip̃a tokora tapu waia, go nawotaeana:

¹⁴nalakena au po dogoe enoa, naga Yesu ni Nasareth waia ega wo dakai tokora waia, po doa natomariana maga waina Moses e dua gida ara.

¹⁵Go tea maga mamau puti waina eu doko nasaisaiana ni navasap̃otaeana, eu leosoki a, po punusi naraena e dakiusi narae ni agelo sikai.