Read Nguna Togoa Etafe North PAKI TEA NI ROMA 10 Bible Online

PAKI TEA NI ROMA 10 - Nguna Togoa Etafe North bible

PAKI TEA NI ROMA 10

¹Tai maga, namasauana ni nap̃op̃ogu go navavaraniana aginau paki Sup̃e e madeada pei naga euga vei tea mautipauriana.

²Nalakena a madeada noasokisoki naga eu magi Sup̃e peani nasuisuiana sikai, ma e da pae naataeana mau.

³Nalakena eu pei sap̃o namarinaleoleanaana ki Sup̃e, po do laaga naga euga lawokilaketoko tea adeada, go eu da doko etano paki namarinaleoleanaana ki Sup̃e mau.

⁴Nalakena Kristo e magi sara naata waina eu saralomau pei namarisuana ni nawotaeana paki namarinaleoleanaana.

⁵Nalakena Moses e midiri naga naatam̃oli waina e do mari namarinaleoleanaana waina e pei tea ni nawotaeana ega wo mauri asa.

⁶Ma namarinaleoleanaana waina e pei tea ni nasaralomauana e noa dapala waia, e naga, P̃a ta noa nap̃alau ni nap̃op̃om̃a mau, Sei ega wo sake paki nakoroatelagi pano? (Tea wanogoe e pei, naga ega viragi Kristo ega siwo umai:) kite,

⁷Sei ega wo siwo paki epua pano? (Tea wanogoe e pei, naga ega viragi Kristo ega sake m̃elu dua ki tea mate maga umai.)

⁸Ma e noa nasava? Navasaana e pei m̃aladigi ki‐go, e doko nawokam̃a, go e doko nap̃op̃om̃a: tea wanogoe e pei, navasaana ni nasaralomauana, waina au do dogorogo ki nia:

⁹nalakena ku pe noa sai ki nawokam̃a Nawota Yesu, po saralomau ki nap̃op̃om̃a naga Sup̃e e sike a e duleana m̃elu dua ki tea mate maga, ku pe wo pei tea mautipauriana:

¹⁰nalakena naatam̃oli e saralomau ki nap̃op̃ona paki namarinaleoleanaana; go e noa sai ki nawokana paki namautipauriana.

¹¹Nalakena navasaana midiriana e naga, Sara naata waina eu saralomau asa euga wo da pei tea mariana euga maliere mau.

¹²Nalakena tea ni Yudea go tea ni Hellas eu da dum̃ada panop̃ota ki‐da mau: nalakena Nawota sikai maau e pei Nawota ki tea maga mamau puti, go e pei sogolapa paki tea maga mamau puti waina eu pioso paki nia:

¹³nalakena, Sara naata waina eu pe wo pioso paki nagisa ni Yehovah euga wo pei tea mautipauriana.

¹⁴Ma euga wo pioso paki tea waina eu da saralomau asa mau dapale sava? Go euga wo saralomau tea waina eu da dogo e mau dapale sava? Go tea rogorogo e pe tika euga wo dogo dapale sava?

¹⁵Go eu pe ta pei tea tip̃akiluaana mau, eu pe wo dogorogo dapale sava? Dapala waina e pei tea midiriana, e naga, Nam̃ele maga ni tea maga waina eu do dogorogo ki narogorogoana wia ni tea wia maga eu pei tea leom̃atakiana pa!

¹⁶Ma eu da mamau puti dogo parati ki narogorogoana wia mau. Nalakena Isaiah e naga, Nawota, sei e saralomau narogorogoana aginami?

¹⁷Nalakena tea wanogoe nasaralomauana e pei tea ni narogoana, go narogoana e pae navasaana ki Kristo.

¹⁸Ma a naga, Eu da dogo kite? Ioro, eu dogo, Nadaleoda e pano usuraki navanua mamau, Go navasaana adeada maga eu paki namatap̃ago maga ni maramana.

¹⁹Ma a naga, Israel e da atae kite? Moses e pea naga, Kinau aga wo mari mu kuga dotowo kasua nalakena tea waina eu da pei nalauna sikai mau, Aga wo mari mu kuga maeto nalakena nalauna sikai waina eu midoaki sap̃o.

²⁰Go Isaiah e piviari p̃arua po naga, A pei tea vap̃aiana ki tea maga waina eu da laaga au mau; A pei tea mariana a doko lina ki tea maga waina eu da pusuusu ki nau mau.

²¹Ma nalo ni Israel e naga, Naaleatia mamau a darasai ki nam̃elearugu maga asa paki narei sikai waina eu do dogo piri go waina eu do pasa dugoro.