Read Nguna Togoa Etafe North PAKI TEA NI ROMA 12 Bible Online

PAKI TEA NI ROMA 12 - Nguna Togoa Etafe North bible

PAKI TEA NI ROMA 12

¹Nalakena tea wanogoe a pavarani mu, tai maga, pae namaritadodomiana maga ki Sup̃e, naga kuga vitua ki nap̃atokomu maga euga vei naviriana mauri sikai, tea tautau, tea midoakim̃atakiana ki Sup̃e, waina e pei nasuasuaana midodoa animu.

²Go kuga ta dum̃amu mari mu kuga takiusi tea ni maramana waia mau: ma kuga vei tea maridoaana kuga vanop̃ota ki namaripaukiana ni namidodoana animu, naga kuga mari dogo tea waina e pei namasauana ki Sup̃e tea waina e p̃ia go waina e pei tea midoakim̃atakiana go waina e p̃ia lua.

³Nalakena a noa, pae nasaup̃iaana waina e pei tea vituakiana paki nau, ki sara naatam̃oli waina eu doko m̃aleoputo kakamu, naga euga ta midodoa pakilagi mau liu tea waina e one ara one naga euga midodoa; ma naga euga midodoa ega tapala waina euga midodoa p̃ia, ega tapala waina Sup̃e e magi sara naata sikasikai p̃otawotae totowo sikasikai ni nasaralomauana.

⁴Nalakena dakiusi waina tu pilake naleo laapa doko nap̃atoko sikai maau, go naleo maga eu da mamau puti peani nawosiana sikai maau mau:

⁵dapala nogoe nigida, waina tu laapa, tu pei nap̃atako sikai maau doko Kristo, go tu sikasikai dum̃agida pei naleo kakagida maga.

⁶Go waina tu peani navituam̃olikiana maga pisarasara pae nasaup̃iaana waina e pei tea vituakiana paki gida, e pe vei naveanoasaiana tuga veanoasai ega vae totowo ni nasaralomauana anigida;

⁷kite e pe vei nasuasuaana tuga toko raki nasuasuaana anigida; kite e pe vei tea waina e pasapiseiki, ega toko raki navasapiseikiana aneana;

⁸kite e pe vei tea waina e pasaparatiki ega toko raki navasaparatikiana aneana: tea waina e pitua ega vitua pae naveilomauana; tea waina e maraki ega maraki pae nam̃arekarekaana; tea waina e mari nadodomiana ega mari a pae nalaelaeaana.

⁹Nadodomiana ega ta pei nakalep̃oana mau. Kuga mamarago ki tea waina e sa; kuga vuluti tea waina e p̃ia.

¹⁰Nadodomi‐taigida‐ana kuga vei maritadodomi dum̃amu paki mu asa; nadodomadaganiana kuga tum̃amu maraki mu asa:

¹¹nam̃arekarekaana kuga ta mamale asa mau; kuga vei tea vivitinu pae naatamu; tea magi Nawota suasua;

¹²tea laelaea naleogoroana; tea soki nariesokiana; tea to dapasavasa pitip̃atip̃a;

¹³tea vitua paki natikaana maga ki tea tautau maga; tea sava dausi nadodominam̃enaki‐ana.

¹⁴Kuga vasap̃ia ki tea maga waina eu kopalele mu; kuga vasa p̃ia ki, go kuga ta pasa sa ki mau.

¹⁵Kuga laelaea sikoti tea maga waina eu laelaea; kuga tagi sikoti tea maga waina eu dagi.

¹⁶Kuga vei tea midoaki tea sikai maau dum̃amu paki mu. Kuga ta pei tea midoaki tea vakilagi maga mau, ma kuga vei tea viragiluaana sikoti tea vakitano maga. Kuga ta pei tea tum̃amu midoa ki mu naga ku manumatua mau.

¹⁷Kuga ta lagati dua te naata tea sa dip̃a tea sa mau. Kuga vea midoaki tea dodomadaganiana maga namata ni naatam̃oli maga mamau puti.

¹⁸E pe vei tea mariataeana, nalo ni tea animu, kuga tam̃ate paki naatam̃oli maga mamau puti.

¹⁹Kuga ta dum̃amu manimu sikosiko mau, tea dodomiana maga, ma kuga tua namaetoana tokora: nalakena e pei tea midiriana, naga Nasikoana e pei aginau; kinau aga wo pitua dip̃a, Yehovah e noa e.

²⁰Ma tea kokona ki‐go e pe vitolo, p̃a tua e ega kanikani; e pe madou, p̃a tua e ega munu: nalakena ku pe mari tea wanogoe ku pe wo daua ki nam̃elevara ni nakapu nap̃auna.

²¹P̃a ta pei tea marimatuakiana pae tea sa mau, ma p̃a marimatua ki tea sa ki tea wia.