Read Nguna Togoa Etafe North PAKI TEA NI ROMA 13 Bible Online

PAKI TEA NI ROMA 13 - Nguna Togoa Etafe North bible

PAKI TEA NI ROMA 13

¹Sara naata euga toko etano paki naveinawotaana maga waina eu pakilagi liu ra: nalakena te naveinawotaana e da doko mau waina e da pae Sup̃e mau; go tea maga waina eu doko eu pei tea tawonakiana pae Sup̃e.

²Nalakena tea wanogoe naata waina e dugoro naveinawotaana e lawodugoro natawonakiana ki Sup̃e: go tea maga waina eu lawodugoro euga wo dum̃ada madeada dape navasap̃otaeana.

³Nalakena tea maraki maga eu da pei namatakuana paki nawosiana wia mau, ma eu pei namatakuana paki tea sa. Go ku masauna naga p̃a ta matauki naveinawotaana kite? P̃a mari tea waina e p̃ia, go p̃a wo peani nasamasamaniana m̃elu asa:

⁴nalakena e manigo pei tea suasua sikai ki Sup̃e raki tea waina e p̃ia. Ma ku pe mari tea waina e sa, p̃a mataku; nalakena e da pilake m̃oli ki lova mau: nalakena e pei tea suasua sikai ki Sup̃e, tea sikosiko sikai raki namaetoana paki tea waina e mari tea waina e sa.

⁵Nalakena tea wanogoe e one mu one naga kuga toko etano, namaetoana e da masikina pei nalakena mau, ma nalakena natum̃amu‐atae‐mu‐ana.

⁶Nalakena tea wanogoe e moro pei nalakena ku pitua ki nasautoga, nalakena eu pei tea suasua maga ki Sup̃e, waina eu do doko raki tea wanogoe pitip̃atip̃a.

⁷Kuga vitua paki tea maga mamau puti ki nateaoneana adeada maga: nasautoga paki tea waina nasautoga e maneana one: duti paki tea waina duti e maneana one: namatakuana paki tea waina namatakuana e maneana one: nadodomadaganiana paki tea waina nadodomadaganiana e maneana one.

⁸Te naleo sikai ki te naata sikai ega ta one mu one mau, ma naga kuga tum̃amu dodomi mu sikai maau: nalakena tea waina e dodomi tea p̃ota e pakavuro nawotaeana.

⁹Nalakena tea waia, P̃a ta mari pele mau, P̃a ta mari punue mau, P̃a ta panako mau, P̃a ta matam̃agura mau, go te natip̃akiana p̃ota sikai e pe toko, e pei tea saisaikiana doko navasaana waia, P̃a dodomi tea ni m̃aladigi ki‐go ega tapala waina ku dum̃am̃a dodomi ko.

¹⁰Nadodomiana e da mari tea sa paki tea ni m̃aladigi ki nia mau; nalakena tea wanogoe nadodomiana e pei navakavuroana ni nawotaeana.

¹¹Go tea waia, ku atae ragi, naga e pei aura ragi waia waina kuga tarapa asa m̃elu dua ki namaturuana: nalakena ragi waia namautipauri‐gida‐ana e pei m̃aladigi liu dapala waina e doko ragi waina tu pea saralomau.

¹²Nap̃ogiana e disu pano, go naaleatia e pei m̃aladigi: nalakena tea wanogoe tuga toropusi nawosiana maga ni namaligo, go tuga suni nalikau maga ni namarama.

¹³Tuga surata pae tea waina e pei tea leom̃atakiana, dapala ragi waina e pei aleati tuga ta pae namaridarataraana go namatamalokuana mau, tuga ta pae namaripeleana maga go namasausauana maga mau, tuga ta pae navileana go naroitoiana mau.

¹⁴Ma kuga suni Nawota Yesu Kristo, go kuga ta magi nap̃okasi mari naveamidoakiana raki namasauana sa kakana maga mau.