Read Nguna Togoa Etafe North PAKI TEA NI ROMA 14 Bible Online

PAKI TEA NI ROMA 14 - Nguna Togoa Etafe North bible

PAKI TEA NI ROMA 14

¹Ma tea waina e manainai nasaralomauana kuga viragi soki a, masale ki namidoakip̃otaeana maga ni namidodoana maga.

²Naatam̃oli sikai e saralomau naga ega kani sara naleo, ma tea waina e manainai e gani tea lawoana maga.

³Tea waina e ganikani ega ta midoaki p̃alo ki tea waina e da ganikani mau; go tea waina e da ganikani mau, ega ta pasa p̃otae tea waina e ganikani: nalakena Sup̃e e piragi soki a.

⁴Nigo ku pei sei waina ku pasa p̃otae tea suasua ki tea p̃ota? E magi nawota aneana lawodu kite e dowo. Ma ega wo pei tea silaeana ega lawodu; nalakena Nawota e mari atae mari a ega lawodu.

⁵Naatam̃oli sikai e midoaki p̃otae naaleatia sikai naga e p̃arua liu naaleatia p̃ota sikai: tea p̃ota sikai e midoaki p̃otae sara naaleatia naga eu pataka sikai. Sara naatam̃oli euga sikasikai saralomau pakavuro doko namidodoana adeada.

⁶Tea waina e midoaki naaleatia, e magi Nawota midoaki nia; go tea waina e ganikani, e magi Nawota ganikani, nalakena e pasadodom̃ata ki Sup̃e; go tea waina e da ganikani mau, e magi Nawota da ganikani mau, po pasadodom̃ata ki Sup̃e.

⁷Nalakena te naata sikai kakagida e da dum̃ana maneana mauri mau, go te naata sikai e da dum̃ana maneana mate mau.

⁸Nalakena tu pe mauri, tu magi Nawota mauri; kite tu pe mate tu magi Nawota mate: nalakena tea wanogoe tu pe mauri, kite tu pe mate, tu pei tea ki Nawota.

⁹Nalakena raki tea wanogoe Kristo e mate, po moro mauri, naga ega vei Nawota ki tea mate maga go ki tea mauri maga.

¹⁰Ma nigo, ekasana ku pasa p̃otae taim̃a? Kite nigo ma, ekasana ku midoaki p̃alo ki taim̃a? Nalakena tuga wo mamau puti lawodu narae ni malo tasake ni navasap̃otaeana ki Sup̃e.

¹¹Nalakena e pei tea midiriana, e naga, Kinau a mauri, Yehovah e noa e, sara nap̃atua euga wo ditip̃atua paki nau, Go sara namena euga wo pasadodom̃ata ki Sup̃e.

¹²Nalakena tea wanogoe sara naata kakagida euga wo dum̃ada atusi ra paki Sup̃e.

¹³Nalakena tea wanogoe tuga ta moro dum̃agida pasa p̃otae gida mau: ma kuga vasa p̃otae tea waia, naga te naata sikai ega ta doropusi tea tapilagonaana sikai narae ni taina mau, kite tea waina ega rowo asa.

¹⁴A atae, po saralomau kasua doko Nawota Yesu, naga te navatuna sikai e da dum̃ana loa mau: ma te naata e pe midoaki te navatuna naga e loa, e loa paki naata wanogoe.

¹⁵Nalakena taim̃a e pe susue nalakena navinaga, ku da moro surata pae nadodomiana mau. Tea waina Kristo e maneana mate p̃a ta mari sa ki nia ki navinaga anigo mau.

¹⁶Nalakena tea wanogoe tea wia anigo ega ta pei tea vasasakiana mau:

¹⁷nalakena namarakiana ki Sup̃e e da pei nakaniana go namunuana mau, ma e pei namarinaleoleanaana go natam̃ateana go nalaelaeaana doko Naatana Tapu.

¹⁸Nalakena tea waina e magi Kristo suasua tea wanogoe e pei tea midoakim̃atakiana ki Sup̃e, go tea maridogopiragiana ki naatam̃oli maga.

¹⁹Nalakena tea wanogoe tuga sava dausi naleo maga ni natam̃ateana, go naleo maga ni natavagiana dum̃agida paki gida.

²⁰P̃a ta dakai nawosiana ki Sup̃e nalakena navinaga mau. Naleo maga mamau puti eu dautau lomau; ma e sa ki naatam̃oli waina e ganikani pae natapilagonaana.

²¹E p̃ia naga p̃a ta gani nap̃okasi mau, go naga p̃a ta munu waine mau, go naga p̃a ta mari te navatuna mau waina taim̃a e dapilagona asa.

²²Nasaralomauana waina nigo ku peani a, p̃a veani a ega sikoti ko narae ni Sup̃e. Naata waina e da dum̃ana pasa p̃otae a mau nalo ni tea waina e midoaki nia naga e p̃ia e maropa.

²³Ma tea waina e midoakisara e pe kanikani e pei tea tip̃akotoviana asa, nalakena e da ganikani pae nasaralomauana mau; go sara naleo waina eu da pei tea ni nasaralomauana mau eu pei namarinaleosaana.