Read Nguna Togoa Etafe North PAKI TEA NI ROMA 16 Bible Online

PAKI TEA NI ROMA 16 - Nguna Togoa Etafe North bible

PAKI TEA NI ROMA 16

¹A pasa p̃ia ki noa ki mu Foebe goregida, waina e pei tea suasua sikai ki ekalesia waina e doko Kegkerea;

²naga kuga viragi soki a doko Nawota ega tapala waina e p̃ia ki tea tautau maga, go naga kuga silae a nawosiana waina e pe wo masau mu asa: nalakena nae ma e pei tea leoparatiki‐silae sua tea laapa, go kinau.

³Kuga vasa dodomi Priska go Akula tea wosiwosi sikoti au doko Kristo Yesu,

⁴waina ero magi namauriana aginau doropusi nanoada; waina kinau a da sikigu pasadodom̃ata ki da mau, ma ekalesia maga mamau puti ni nalauna p̃ota maga eu pasadodom̃ata ki da:

⁵go kuga vasadodomi ekalesia ni nasum̃a adeada. Kuga vasa dodomi Epaineto tea dodomiana aginau, waina e pei takavea ni Asia paki Kristo.

⁶Kuga vasa dodomi Maria, waina e maginami p̃osiwosi p̃arua.

⁷Kuga vasa dodomi Androniko go Yunia, tea vei namatarau aginau maga, go tea viragiluapavakotoana maga sikoti au, waina ero pei tea rogoana m̃aleoputo ni Apostolo maga, go waina ero doko Kristo pea ki nau.

⁸Kuga vasa dodomi Ampliato tea dodomiana aginau doko Nawota.

⁹Kuga vasa dodomi Urbano tea wosiwosi sikoti gami doko Kristo, go Staku tea dodomiana aginau.

¹⁰Kuga vasa dodomi Apelle, tea maridogoana doko Kristo. Kuga vasa dodomi tea maga waina eu pei tea ni nasum̃a ki Aristobulo.

¹¹Kuga vasa dodomi Herodion tea vei namatarau aginau. Kuga vasa dodomi tea maga ni nasum̃a ki Narkisso, waina eu doko Nawota.

¹²Kuga vasa dodomi Trifaina go Trifosa, waina ero do p̃osiwosi doko Nawota. Kuga vasa dodomi Persis tea dodomiana, waina e p̃osiwosi p̃arua doko Nawota.

¹³Kuga vasa dodomi Rufo tea matadoaana doko Nawota, go p̃ilana go p̃ilagami.

¹⁴Kuga vasa dodomi Asugkrito, Flecon, Herme, Patroba, Herma, go taigida maga waina eu doko sikoti ra.

¹⁵Kuga vasa dodomi Filoloco go Yulia, Nereu go gorena, go Olimpa, go tea tautau maga mamau puti waina eu doko sikoti ra.

¹⁶Kuga tum̃amu pasa dodomi mu ki natum̃iliana tautau sikai. Ekalesia maga mamau puti ki Kristo eu pasa dodomi mu.

¹⁷Ma a paravani mu, tai maga, kuga leo p̃ai tea maga waina eu do mari natap̃otaeana maga go tea tapilagonaana maga, waina eu panop̃ota ki navasapiseikiana waina nimu ku ataedogo sua e: go kuga tawasi m̃elu dua ki da pano.

¹⁸Nalakena tea maga waina eu dapala nogoe eu da magi Nawota anigida Kristo suasua mau, ma eu magi nap̃eleda suasua; go eu pilasurue pae navasapakaleana go navasap̃iaana nap̃op̃o ni tea maga waina eu da sa mau.

¹⁹Nalakena narogoparatikiana animu e sokapule paki naatam̃oli maga mamau puti. Nalakena tea wanogoe a laelaea nalakena nimu: ma a masauna naga kuga vei tea manumatua nalo ni tea waina e p̃ia, go tea ta marisaki mau nalo ni tea waina e sa.

²⁰Go Sup̃e ni natam̃ateana ega wo mari p̃oraworae Satan etano ki nam̃elemu maga m̃araverave. Nasaup̃iaana ki Nawota anigida Yesu Kristo ega sikoti mu.

²¹Timotheo, tea wosiwosi sikoti au e pasa dodomi mu; go Lukio go Yason go Sosipater, tea vei namatarau aginau maga.

²²Kinau Tertio, waina a midiri epistole waia, a pasa dodomi mu doko Nawota.

²³Caio waina e piragi au, go ekalesia mamau au pei nam̃enaki maga, e pasa dodomi mu. Erasto tasiga leoparatiki m̃ane ni natokoana e pasa dodomi mu, go Kuarto taigida.

²⁴Nasaup̃iaana ki Nawota anigida Yesu Kristo ega sikoti puti mu. Amen.

²⁵Ma agi tea waina e mari atae lawosoki mu pae narogorogoana wia aginau go narogorogo‐ki‐Yesu‐Kristoana, pae nanoapakasakiana ni p̃aia waina e pei tea mariana e punuta ragi maga ni tuai waina eu pano,

²⁶ma ragi waia e pei tea mariana e doko lina, go pae navasaana midiriana maga ki profeta maga, pae natip̃akiana ki Sup̃e waina e du mau du, e pei tea mariana e pei tea ataeana paki nalauna maga mamau puti paki narogoparatikiana ni nasaralomauana;

²⁷agi Sup̃e waina e masikina manumatua, nasamasamaana ega vei aneana pae Yesu Kristo pa pa ega tu mau du. Amen.