Read Nguna Togoa Etafe North PAKI TEA NI ROMA 2 Bible Online

PAKI TEA NI ROMA 2 - Nguna Togoa Etafe North bible

PAKI TEA NI ROMA 2

¹Nalakena tea wanogoe ku pei tea tika navasakorokoroana, naatam̃oli O, sara naata waina ku do pasa p̃otae; nalakena tea waina ku pasa p̃otae tea p̃ota asa, ku dum̃am̃a dip̃akotovi ko asa; nalakena ragi waina ku do pasa p̃otae ku do mari tea sikai maau maga wanogoe.

²Go tu atae naga navasap̃otaeana ki Sup̃e e doko pae nalomauana dip̃a tea maga waina eu do mari tea tapala nogoe maga.

³Go ku midoa ki tea waia, naatam̃oli O, waina ku do pasa p̃otae tea maga waina eu do mari tea tapala nogoe maga, go waina ku do mari tea sikai maau maga wanogoe, naga nigo p̃a wo sava dua ki navasap̃otaeana ki Sup̃e kite?

⁴Kite ku midoaki p̃alo ki nasogolapaana ni navakaleana go ni nasokiana go ni naveimaritasokiana aneana, po da atae mau naga navakaleana ki Sup̃e e do piragi ko paki namidoakidoaana?

⁵Ma pae nakasuaana anigo go p̃op̃o ta midoaki doa mau ku do dum̃am̃a manigo daua ki namaetoana raki naaleatia ni namaetoana go ni namaripakasakiana ni navasap̃otaeana leana ki Sup̃e.

⁶Waina Supe ega wo lagati dua sara naatam̃oli euga sikasikai ega vae nawosiana adeada maga:

⁷paki tea maga waina eu do laaga pae nasokiana ni nawosiana wia nasamasamaana go nadodomadaganiana go namatesap̃oana, namauriana waina e du mau du:

⁸ma paki tea maga waina eu pei tea mari putuaki, po do dogo piri nalomauana, ma eu dogo paratiki namarinaleotageleana namaetoana go namaritausuana, nariesokiana go narogokitesaana,

⁹paki sara naata ni naatam̃oli waina eu do mari tea sa, ni tea ni Yudea pea, go ni tea ni Hellas;

¹⁰ma nasamasamaana go nadodomadaganiana go natam̃ateana agi sara naata waina eu do mari tea wia, agi tea ni Yudea pea, go agi tea ni Hellas:

¹¹nalakena naviragi‐narae‐ana e da sikoti Sup̃e mau.

¹²Nalakena tea maga waina eu dika nawotaeana po mari naleo sa, euga wo dika nawotaeana mate puoli; go tea maga waina eu mari naleo sa doko nawotaeana, euga wo pei tea vasap̃otaeana pae nawotaeana:

¹³nalakena tea rogo nawotaeana eu da leana narae ni Sup̃e mau, ma tea mari nawotaeana euga wo pei tea marileanakiana:

¹⁴nalakena ragi waina tea ni nalauna p̃ota maga waina eu dika nawotaeana eu mari pae navakilinaana tea maga ni nawotaeana, nara, waina eu dika nawotaeana, eu dum̃ada madeada pei nawotaeana;

¹⁵waina eu pisei ki nawosiana ni nawotaeana waina e pei tea midiriana nap̃op̃oda, natum̃adaataeana e do noa sokisoki sikoti a, go namidodoana adeada maga dum̃ada paki da eu do pasa dip̃a kite eu do pasa korokoro;

¹⁶naaleatia waina Sup̃e ega wo pasa p̃otae tea surukiana maga ki naatam̃oli maga pae narogorogoana wia aginau pae Yesu Kristo.

¹⁷Ma nigo ku pe vei tea salagisaana ki tea ni Yudea, po pavatu nawotaeana,

¹⁸po pakavakae Sup̃e, po atae namasauna aneana, po mari dogo tea maga waina eu panop̃ota, po pei tea vasapiseikiana pae nawotaeana,

¹⁹po dum̃am̃a saralomau ako naga ku pei tea maraki tea kesa maga pae napua, namarama sikai agi tea maga waina eu doko namaligo,

²⁰tea vasa piseiki tea vei sap̃o maga, tea vasa piseiki pipia maga, waina ku peani namaridawonakiana ni naataeana go ni nalomauana doko nawotaeana;

²¹nalakena tea wanogoe nigo waina ku do pasa piseiki tea p̃ota, ku da dum̃am̃a pasa piseiki‐go kite? Ku do dogorogo naga euga ta panako mau, nigo ku panako kite?

²²Ku do noa naga euga ta maripele mau, nigo ku maripele kite? Ku do mamarago ki nasup̃e maga, ku dapepavakoto tea ni nasum̃a tapu adeada maga kite?

²³Waina ku pakavakae nawotaeana, ku dododao Sup̃e pae natapiriana ni nawotaeana kite?

²⁴Nalakena nagisa ni Sup̃e e pei tea vasasakiana nalakena nimu m̃aleoputo ni tea ni nalauna p̃ota maga, dapala waina e pei tea midiriana.

²⁵Nalakena ku pe to mari nawotaena, natovadaviviana e pe vei tea silae lomau: ma ku pe vei tea tapiri nawotaeana, natovadaviviana anigo e pe vei tea mariana e pe ta pei natovadaviviana mau.

²⁶Nalakena tea wanogoe naata waina e da pei tea tovadaviviana mau e pe vavaigoro natawonakiana maga ni nawotaeana, natikaana aneana ni natovadaviviana e pe wo da pei tea midoakiana naga ega vei natovadaviviana kite?

²⁷Go natikaana ni natovadaviviana waina e pei tea ni navakilinaana, e pe vakavuro nawotaeana, e pe wo da pasa p̃otae ko, waina ku pei tea tapiri nawotaeana pae navasaana midiriana go natovadaviviana kite?

²⁸Nalakena tea waina e pei tea ni Yudea pae lina e da pei tea ni Yudea mau; go tea waina e pei natovadaviviana pae lina doko nap̃okasi, e da pei natovadaviviana mau:

²⁹ma tea waina e pei tea ni Yudea pae tea sili e pei tea ni Yudea; go natovadaviviana e pei tea ni nap̃op̃o, doko naatana, e da doko navasaana midiriana mau; waina nasamasamani‐a‐ana e da pei tea ni naatam̃oli maga mau, ma e pei tea ni Sup̃e.