Read Nguna Togoa Etafe North PAKI TEA NI ROMA 3 Bible Online

PAKI TEA NI ROMA 3 - Nguna Togoa Etafe North bible

PAKI TEA NI ROMA 3

¹Nalakena tea wanogoe navakilagiliu‐ana ki tea ni Yudea e pei nasava? Kite nasilaeana ni natovadaviviana e pei nasava?

²E p̃arua pae sara vatuna: tea vea, nalakena eu pei tea vavatuana ki nanoaana maga ki Sup̃e.

³Nalakena te seara eu pe ta saralomau mau e pe tapale sava? Natikaana ni nasaralomauana adeada ega wo mari naveilomauana ki Sup̃e ega vei tea m̃oli kite?

⁴Ega ta dapala nogoe mau: ma Sup̃e ega vei tea noa lomau, go sara naatam̃oli euga vei tea sorosoro; ega tapala waina e pei tea midiriana, e naga, Naga p̃a vei tea marileanakiana nalo ni navasaana anigo maga, Po marimatua ragi waina p̃a wo pei tea vasap̃otaeana.

⁵Ma namarinaleotageleana anigida e pe mari namarinaleoleanaana ki Sup̃e e pe toko lina, tuga noa nasava? Sup̃e e pei tea tagele waina e do pilake namaetoana umai kite? (A pasa pae naatam̃oli.)

⁶Ega ta dapala nogoe mau: nalakena e pe tapala nogoe Sup̃e e pe wo pasap̃otae maramana dapale sava?

⁷Ma nalomauana ki Sup̃e e pe warua liu nalakena nasorosoroana aginau paki nasamasamaana aneana, ekasana kinau ma a ko pei tea vasap̃otaeana dapala tea mari naleo sa sikai?

⁸Go ekasana tuga ta noa (ega tapala waina au pei tea vasasakiana asa, go dapala waina seara eu noa naga au noa e), Tuga mari tea sa maga, naga tea wia maga euga umai; waina natip̃akotovi‐ra‐ana e leana.

⁹Nalakena tea wanogoe nasava? Tu p̃ia liu ra kite? Ee, e dika: nalakena au pea pasa dip̃a tea ni Yudea maga go tea ni Hellas maga, naga eu mamau puti doko etano ki namarinaleosaana;

¹⁰dapala waina e pei tea midiriana, e naga, Tea leana sikai e da doko mau, tea sikai maau e dika;

¹¹Tea waina e midoaki atae e da doko mau, Tea waina e do laaga Sup̃e e da doko mau;

¹²Eu mamau puti dawasi, eu pei taua malasi; Tea mari naleo p̃ia e da doko mau, tea sikai maau sa e dika:

¹³Namanuda e pei matigo wolagatiana sikai; Eu sorosoro ki namenada: Noai ni namateana ni adder maga e doko etano ni nagoleda maga;

¹⁴Waina nawokada e pura ki navasasakiana go ki nakokonaana:

¹⁵Nam̃eleda eu sava kasua naga euga ta ki nada;

¹⁶Namarisakiana go narogokitesaana ero doko napua adeada maga;

¹⁷Go napua ni natam̃ateana eu da atae a mau:

¹⁸Namatau ki Sup̃eana e da doko kivea ki namatada maga mau.

¹⁹Ma tu atae naga tea maga waina nawotaeana e noa ra, e pasa ki tea maga waina eu doko nawotaeana; naga sara nawoka euga vunuta, go maramana mamau euga tapala euga vei tea vasap̃otaeana ki Sup̃e:

²⁰nalakena te nap̃okasi seara euga wo da pei tea marileanakiana ki nawosiana maga ni nawotaeana naraena mau: nalakena naataeana ni namarinaleosaana e pae nawotaeana umai.

²¹Ma ragi waia namarinaleoleanaana sikai ki Sup̃e e pei tea mariana e doko lina masale ki nawotaeana, e pei tea noasokisokiana pae nawotaeana go profeta maga;

²²namarinaleoleanaana ki Sup̃e pae nasaralomau‐Yesu‐Kristoana paki tea maga mamau puti waina eu saralomau; nalakena navanop̃otaana e dika;

²³nalakena tea maga mamau puti eu mari naleo sa, po da pa paratiki nasamasamaana ki Sup̃e;

²⁴eu pei tea marileanakim̃olikiana ki nasaup̃iaana aneana pae natauluaana waina e doko Kristo Yesu:

²⁵waina Sup̃e e mari a e doko lina, naga ega vei naviriana sikai ki nadana, pae nasaralomauana, naga ega viseiki namarinaleoleanaana aneana, nalakena namidoakikalauana ni namarinaleosaana maga waina eu pei tea mariana sala vea, doko nasokiana ki Sup̃e;

²⁶naga ega viseiki namarinaleoleanaana aneana ragi waia: naga nae ega vei tea leana: po pei tea mari leana ki tea waina e saralomau Yesu.

²⁷Nalakena tea wanogoe tea vakavakaeana wai? E pei tea kokoroana pano. Pae nawotaeana dapale sava? Ni nawosiana maga kite? Ee; ma pae nawotaeana ni nasaralomauana.

²⁸Nalakena tea wanogoe, tu midoaki nia naga naatam̃oli sikai e pei tea marileanakiana ki nasaralomauana masale ki nawosiana maga ni nawotaeana.

²⁹Kite Sup̃e e pei Sup̃e ki tea ni Yudea maga eu sikida? E da pei Sup̃e ki tea ni nalauna p̃ota maga kite? Ioro, e pei Sup̃e ki tea ni nalauna p̃ota maga:

³⁰Sup̃e e pe vei tea sikai maau, waina ega wo marileana ki tea tovadaviviana maga ki nasaralomauana, go ki tea maga waina eu da pei tea tovadaviviana mau pae nasaralomauana adeada.

³¹Nalakena tea wanogoe tu mari nawotaeana e pei tea m̃oli pae nasaralomauana kite? Ega ta dapala nogoe mau: ma tu lawokilaketoko nawotaeana.