Read Nguna Togoa Etafe North PAKI TEA NI ROMA 5 Bible Online

PAKI TEA NI ROMA 5 - Nguna Togoa Etafe North bible

PAKI TEA NI ROMA 5

¹Nalakena tea wanogoe waina tu pei tea marileanakiana ki nasaralomauana tuga veani natam̃ateana paki Sup̃e pae Nawota anigida Yesu Kristo;

²waina tu peani pae asa naviragiana ki nasaralomauana paki nasaup̃iaana wanogoe waina tu lawodu asa, go tu do pakavakae nalakena naleogoroana ni nasamasamaana ki Sup̃e.

³Go tea wanogoe e da sikina mau, ma tu pakavakae nalakena nariesokiana maga: tu atae naga nariesokiana e mari nasokiana;

⁴go nasokiana e mari namaridogoana; go namaridogoana e mari naleogoroana:

⁵go naleogoroana e da mari gida tu maliere mau; nalakena nadodomiana ki Sup̃e e pei tea takiana np̃op̃ogida pae Naatana Tapu waina e pei tea vituakiana paki gida.

⁶Nalakena ragi waina nigida tu ko manainai doko, Kristo e magi tea sigisigileo maga mate ragi kakana.

⁷Nalakena e m̃aladigi mari sa pei tea mariana naga te naata sikai ega magi tea leana sikai mate: nalakena mase te naata sikai e pe viviari magi tea wia mate.

⁸Ma Sup̃e e mari nadodomiana aneana paki gida e doko lina, nalo ni, ragi waina nigida tu ko pei tea mari naleo sa maga, Kristo e manigida mate.

⁹Nalakena tea wanogoe, waina tu pei tea marileanakiana ragi waia ki nadana, tuga wo pei tea mautip̃auriana pae asa m̃elu dua ki namaetoana ki Sup̃e ega warua liu.

¹⁰Nalakena ragi waina tu pei tea kokona maga, tu pe vei tea mariana tu pe vei p̃op̃o wia paki Sup̃e pae namateana ki Natuna, ragi waina tu pei tea mariana tu pei p̃op̃o wia sua, tu pe wo pei tea mautipauriana pae namauriana aneana e pe warua liu,

¹¹go tea wanogoe e da sikina mau, ma tu do pakavakae Sup̃e pae Nawota anigida Yesu Kristo, waina tu dape navei‐p̃op̃o‐wia‐ana pae asa ragi waia.

¹²Nalakena tea wanogoe, dapala waina namarinaleosaana e umai paki maramana pae naatam̃oli sikai, go namateana e umai pae namarinaleosaana; go dapala nogoe namateana e umai pa paratiki naatam̃oli maga mamau puti, nalakena tea maga mamau puti eu mari naleo sa.

¹³Nalakena namarinaleosaana e doko maramana pa pa paki nawotaeana: ma namarinaleosaana e da pei tea midoakidip̃aana mau ragi waina nawotaeana e da doko mau.

¹⁴Ma namateana e maramara pae Adam pa pa paki Moses, dap̃au tea maga waina eu da mari naleo sa pae natakiusiana ni natapiriana ki Adam mau, waina e pei naatulakeana ni tea waina e naga ega umai.

¹⁵Ma e do dapala natapiriana, navituam̃olikiana ma e da dakiusi a mau. Nalakena tea laapa eu pe mate ki natapiriana ki tea sikai, nasaup̃iaana ki Sup̃e, go navituaana pae nasaup̃iaana ki naatam̃oli sikai, Yesu Kristo, ero pe vei tea warua liu paki tea laapa e pe warua liu.

¹⁶Go e da dapala pae tea sikai waina e mari naleo sa, navituaana e da dakiusi a mau: nalakena navasap̃otaeana e pae tea sikai umai paki natip̃akotoviana, ma navituam̃olikiana e pae natapiriana laapa umai paki namarileanakiana.

¹⁷Nalakena namateana e pe maramara ki natapiriana ki tea sikai pae tea sikai; tea maga waina eu dape nawarualiuana ni nasaup̃iaana go ni navituaana ni namarinaleoleanaana eu pe wo maramara namauriana pae tea sikai, Yesu Kristo, e pe warua liu.

¹⁸Nalakena tea wanogoe dapala waina navasap̃otaeana pae natapiriana sikai e umai paki naatam̃oli maga mamau puti paki natip̃akotoviana; dapala nogoe navituam̃olikiana ma pae namariana leana sikai e umai paki naatam̃oli maga mamau puti paki namarileanakiana ni namauriana.

¹⁹Nalakena dakiusi waina tea laapa eu pei tea mariana eu pei tea mari naleo sa pae narogopiriana ki naatam̃oli sikai, dapala nogoe tea laapa euga wo pei tea mariana euga wo leana pae narogoparatikiana ki tea sikai.

²⁰Go nawotaeana e umai paki asa, naga natapiriana ega laapa; ma tokora waina namarinaleosaana e laapa asa, nasaup̃iaana e p̃arua asa p̃aruwarua liu:

²¹naga, dakiusi waina namarinaleosaana e maramara doko namateana, dapala nogoe nasaup̃iaana ma ega maramara pae namarinaleoleanaana paki namauriana waina e du mau du pae Yesu Kristo Nawota anigida.