Read Nguna Togoa Etafe North PAKI TEA NI ROMA 7 Bible Online

PAKI TEA NI ROMA 7 - Nguna Togoa Etafe North bible

PAKI TEA NI ROMA 7

¹Kite ku pei sap̃o, tai maga (nalakena a pasa ki tea maga waina eu atae nawotaeana), naga nawotaeana e maramara dap̃au natam̃oli sikai ragi waina e mauri doko?

²Nalakena nagoroi waina e peani anawota e pei tea soliana ki nawotaeana paki anawota ragi waina e mauri doko; ma anawota e pe mate e pei tea veresiana m̃elu dua ki nawotaeana ki anawota.

³Nalakena tea wanogoe e pe laki naanoai p̃ota sikai ragi waina anawota e ko mauri doko, e pei tea sosoana ki tea maripele sikai: ma anawota e pe mate, e pei tea veresiana m̃elu dua ki nawotaeana, go e pe laki naanoai p̃ota sikai e da pei tea maripele mau.

⁴Nalakena tea wanogoe, taigu maga, nimu ma ku pei tea mariana ku mate paki nawotaeana pae nap̃atoko ni Kristo; naga nimu kuga laki tea p̃ota, nae waina e pei tea sikeana duleana m̃elu dua ki tea mate maga, naga tuga magi Sup̃e dau ki nawa.

⁵Nalakena ragi waina tu doko nap̃okasi, narogoana maga ni namarinaleosaana maga, waina eu doko pae nawotaeana, eu do p̃osiwosi naleo kakagida maga naga euga magi namateana dau ki nawa.

⁶Ma ragi waia tu pei tea veresiana sua m̃elu dua ki nawoteana, tu mate sua paki tea waina tu pei tea tapesokiana doko asa; dapala waina nigida tu suasua pae navei‐tea‐vau‐ana ni naatana, go e da pae navei‐tea‐tuaiana ni namidiriana mau.

⁷Nalakena tea wanogoe tuga wo noa nasava? Nawotaeana e pei namarinaleosaana kite? Ega ta dapala nogoe mau. Ma nawotaeana e pe ta doko mau, e pe ta atae namarinaleosaana mau: nalakena nawotaeana e pe ta naga, P̃a ta matam̃agura mau, a pe ta atae namatam̃aguraana mau:

⁸ma namarinaleosaana e puati a, po p̃osiwosi au pae natip̃agoroana ki sara namatam̃aguraana: nalakena namarinaleosaana masale ki nawotaeana e mate.

⁹Go kinau a mauri masale ki nawotaeana sala vea: ma ragi waina natip̃agoroana e umai namarinaleosaana e darapa, go kinau a mate;

¹⁰go natip̃agoroana waina e paki namauriana, a pap̃ai a naga e paki namateana:

¹¹nalakena namarinaleosaana e puati a, po pila surue au pae natip̃agoroana po mari punue au pae asa.

¹²Nalakena tea wanogoe nawotaeana e dautau, go natip̃agoroana e dautau, go e leana, go e p̃ia.

¹³Nalakena tea wanogoe tea waina e p̃ia e pei tea mariana e pei namateana paki nau kite? Ega ta dapala nogoe mau. Ma namarinaleosaana, naga ega toko lina naga e pei namarinaleosaana, e do p̃osiwosi ki namateana paki nau pae tea waina e p̃ia, naga namarinaleosaana ega vei tea mariana ega sa p̃arua liu pae natip̃agoroana.

¹⁴Nalakena tu atae naga nawotaeana e pei tea ni naatana, ma kinau a pei tea ni nap̃okasi, tea soriana paki etano ni namarinaleosaana.

¹⁵Nalakena tea waina a maria ada atae a mau: nalakena tea waina a masauna naga aga mari a, tea wanogoe a da mari a mau; ma tea waina a pilosi a, tea wanogoe a mari a.

¹⁶Ma a pe mari tea waina a da masauna naga aga mari a mau, a pe noa sikoti nawotaeana naga e p̃ia.

¹⁷Nalakena e dapala nogoe e da moro pei kinau mau waina a mari a, ma e pei namarinaleosaana waina e doko au doko.

¹⁸Nalakena a atae naga te navatuna wia e da doko au mau, tea wanogoe e pei, e da doko nap̃okasigu mau: nalakena namasauana e sikoti au doko, ma namari‐tea‐wia‐ana e da doko mau.

¹⁹Nalakena tea wia waina a masauna naga aga mari a, a da mari a mau: ma tea sa waina a da masauna naga aga mari a mau, tea wanogoe a mari a.

²⁰Ma a pe mari tea waina a da masauna naga aga mari a mau, e da moro pei kinau mau waina a mari a, ma e pei namarinaleosaana waina e doko au doko.

²¹Nalakena tea wanogoe a pap̃ai nawotaeana waia, naga ragi waina a masauna naga aga mari tea wia, tea sa e sikoti au doko.

²²Nalakena a maro nawotaeana ki Sup̃e pae naatam̃oli ni nap̃alaugu;

²³ma a punusi nawotaeana p̃ota sikai e doko naleo kakagu maga, waina e do mari navakalo paki nawotaeana ni namidodoana aginau, po do piragi lua pavakoto au paki etano ni nawotaeana ni namarinaleosaana waina e doko naleo kakagu maga.

²⁴Kinau naatam̃oli rogo kite sa O! Sei ega wo pua lua au m̃elu dua ki nap̃atoko ni namateana waia?

²⁵A pasadodom̃ata ki Sup̃e pae Yesu Kristo Nawota anigida. Nalakena tea wanogoe kinau a magi nawotaeana ki Sup̃e suasua ki namidodoana aginau; ma a magi nawotaeana ni namarinaleosaana suasua ki nap̃okasigu.