Read Nguna Togoa Etafe North PAKI TEA NI ROMA 9 Bible Online

PAKI TEA NI ROMA 9 - Nguna Togoa Etafe North bible

PAKI TEA NI ROMA 9

¹A noa nalomauana doko Kristo, a da sorosoro mau, natum̃agu‐atae‐auana e do maginau noa sokisoki doko Naatana Tapu,

²naga a peani nasusueana warua go navitinuana pitip̃atip̃a nap̃op̃ogu.

³Nalakena a mari atae masauna naga kinau aga magi taigu maga pei anathema m̃elu dua ki Kristo, namatarau aginau maga pae nap̃okasi:

⁴waina eu pei naworawora ni Israel; waina navakasereana e pei adeada, go nasamasamaana, go navasasokiana maga, go navituakiana ni nawotaeana, go nalotuana, go nasaiana maga;

⁵waina tamagida maga eu pei adeada, go waina Kristo e m̃elu ara nalo ni nap̃okasina, waina e dap̃au tea maga mamau puti, Sup̃e tea vasap̃iakiana pa pa ega tu mau du. Amen.

⁶Ma e da dapala navasaana ki Sup̃e e pe rowo puoli mau. Nalakena tea maga waina eu pei tea ni Israel eu da mamau puti pei Israel mau:

⁷go nalakena eu pei naworawora ni Abraham eu da mamau puti pei natuna maga mau: ma, Naworaworam̃a euga vei tea sosoana pae Isaak.

⁸Tea wanogoe e pei, nap̃okasi natuna maga nara eu da pei Sup̃e natuna maga mau; ma nasaiana natuna maga eu pei tea midoakiana naga eu pei naworana sikai.

⁹Nalakena tea waia e pei navasaana sikai ni nasaiana, Ragi wanogoe aga wo umai asa, go Sarah ega wo dape natuna naanoai sikai.

¹⁰Go tea wanogoe e da sikina mau; ma Rebekah ma waina e diena pae sikai, tamagida

¹¹Isaak nalakena ragi waina pipia maga ero ko da pakilina mau, go ero ko da mari te navatuna wia kite sa mau, naga namidoakisokiana ki Sup̃e pae namatadoaana ega lawodu, e da pei tea ni nawosiana maga mau, ma e pei tea ni tea waina e soso, e pei tea noaana paki nia,

¹²e naga, Takalapa ega wo magi takariki suasua.

¹³Dapala waina e pei tea midiriana, e naga, A dodomi Yakob, ma a pilosi Esau.

¹⁴Nalakena tea wanogoe tuga noa nasava? Namarinaleotageleana e sikoti Sup̃e kite?

¹⁵Ega ta dapala nogoe mau. Nalakena e noa ki Moses, e naga, Aga wo saup̃ia ki tea waina aga saup̃ia ki nia, go aga wo maritadodomi tea waina aga maritadodomi a.

¹⁶Nalakena tea wanogoe e da pei tea ki tea waina e masauna mau, go e da pei tea ki tea waina e sava mau, ma e pei tea ki Sup̃e waina e saup̃ia.

¹⁷Nalakena navasaana midiriana e noa ki Faraoh, e naga, A mari ko ku lawodu nalakena tea waia, naga aga viseiki nakasuaana aginau ako, go naga nagisagu ega vei tea rogorogokiana usuraki maramana mamau.

¹⁸Nalakena tea wanogoe e saup̃ia ki tea waina e masauna, go tea waina e masauna e mari a e kasua.

¹⁹Nalakena tea wanogoe p̃a wo noa ki nau, Ma ekasana e pasa dip̃a? Nalakena sei e lawodugoro namasauana aneana?

²⁰Ioro, naatam̃oli O, ma nigo ku pei sei waina ku pasa dara dip̃a Sup̃e? Tea maridawonakiana ega wo noa ki tea maridawonaki, Ekasana ku mari au dapala waia, kite?

²¹Kite tea mari lasa ni natano e da peani naveinawotaana dap̃au naruku, naga ega mari tea ni taua sikai maau seara kakana ega vei lasa sikai paki nadodomadaganiana, go tea p̃ota sikai paki nadododaoana, kite?

²²Ma Sup̃e e pe masauna naga ega viseiki namaetoana aneana, po mari nakasuaana aneana ega vei tea ataeana, go e pe tapetape pilake naveimaritasokiana warua lasa maga ni namaetoana waina eu pei tea maridawonakiana paki namarisakiana:

²³go naga ega mari ega vei tea ataeana nasogolapaana ni nasamasamaana aneana nalo ni lasa maga ni nasaup̃iaana, waina e pea mari m̃ata ki da paki nasamasamaana,

²⁴nigida, waina e soso gida, tu da pei tea ni Yudea maga sikida mau, ma tu pei tea ni nalauna p̃ota maga.

²⁵Dapala waina e noa e Hosea, e naga, Aga wo soso tea maga waina eu da pei narei aginau mau, ki narei aginau: Go tea waina e da pei tea dodomiana mau, ki tea dodomiana.

²⁶Go ega wo doko, naga tokora waina e pei tea noaana paki da asa, Nimu ku da pei narei aginau mau, Tokora wanogoe euga wo pei tea sosoana asa ki Sup̃e mauri natuna maga.

²⁷Go Isaiah e pioso nalo ni Israel, e naga, Naveveana ni Israel natuna maga e pe tapala naworaone ni natasi, ma e pei namagovai kakada waina euga wo pei tea mautipauriana:

²⁸nalakena Yehovah ega wo mari navasaana aneana maramana, ega wo mari sua e po mari a ega vuru.

²⁹Go, dapala waina Isaiah e pea noa e, e naga, Yehovah ni Taua maga e pe ta manigida doropusi namagovai kiki sikai mau, Tu pe tapala Sodom, go tu pe vei tea mariana tu pe tapala Comorrah.

³⁰Nalakena tea wanogoe tuga noa nasava? Naga tea ni nalauna p̃ota maga, waina eu da sava dausi namarinaleoleanaana mau, eu puasoki namarinaeloleanaana, namarinaleoleanaana waina e pei tea ni nasaralomauana:

³¹ma Israel waina eu do sava dausi nawotaeana ni namarinaleoleanaana, eu do pa parati ki nawotaeana wanogoe mau. Nalakena nasava?

³²Nalakena eu da laaga asa pae nasaralomauana mau, ma dapala e pe vei tea ni nawosiana maga. Eu dapilagona vatu ni natapilagonaana;

³³dapala waina e pei tea midiriana, e naga, Kuga leo, a doropusi doko Sion vatu sikai ni natapilagonaana, go vatu laketoko sikai ni natapilagonadowoana: Go tea waina e saralomau asa ega wo da pei tea mariana ega maliere mau.