Read Nguna Togoa Etafe North 1 PAKI TEA NI KORINTHO 11 Bible Online

1 PAKI TEA NI KORINTHO 11 - Nguna Togoa Etafe North bible

1 PAKI TEA NI KORINTHO 11

¹Kuga vei tea mari oli au, ega tapala waina kinau ma a mari oli Kristo.

²Ma a pasa samasamani mu nalakena ku midoa ki nau nalo ni naleo maga mamau puti, po dape soki navasaana vituakiana maga, dapala waina a pitua ki da paki mu.

³Ma a masauna naga kuga atae naga Kristo e pei nap̃au ni sara naatam̃oli; go naga naanoai e pei nap̃au ni nagoroi; go naga Sup̃e e pei nap̃au ni Kristo.

⁴Sara naanoai waina eu suni kalup̃au, ragi waina eu dapasavasa kite ragi waina eu pea noa sai, eu dododao nap̃auda.

⁵Ma sara nagoroi waina nap̃auda eu da pei tea kovagoroana mau ragi waina eu dapasavasa kite ragi waina eu pea noasai eu dododao nap̃auda: nalakena e pei tea sikai maau ma e pei tea karoana.

⁶Nalakena nagoroi sikai e pe ta pei tea kovagoroana mau, ega moro pei tea alatiana: ma e pe vei tea malierekiana ki nagoroi sikai naga ega vei tea alatiana kite tea karoana, ega vei tea kovagoroana.

⁷Nalakena e one naanoai sikai one lomau naga nap̃auna ega ta pei tea kovagoroana mau, nalakena e pei nunu go nasamasamaana ni Sup̃e, ma nagoroi e pei nasamasamaana ni naanoai.

⁸Nalakena naanoai e da m̃elu nagoroi mau; ma nagoroi e m̃elu naanoai.

⁹Go nalakena naanoai e da pei tea tawonakiana nalakena nagoroi mau; ma nagoroi e pei tea tawonakiana nalakena naanoai.

¹⁰Nalakena tea wanogoe e one nagoroi one naga ega veani naveinawotaana doko nap̃auna, nalakena agelo maga.

¹¹Ma nagoroi e da doko masale ki naanoai mau, go naanoai e da doko masale ki nagoroi mau, doko Nawota.

¹²Nalakena dakiusi waina nagoroi e m̃elu naanoai, dapala nogoe naanoai ma e pae nagoroi; ma naleo maga mamau puti eu m̃elu Sup̃e.

¹³Kuga midoaki p̃otae nap̃alaumu: e pataka ni nagoroi sikai naga ega ta pei tea kovagoroana dapasavasa paki Sup̃e kite?

¹⁴Navakilinaana e da pasa piseiki mu, naga, naanoai sikai e pe vilake naloluna varau, e pe maneana pei namaliereana kite?

¹⁵Ma nagoroi sikai e pe vilake naloluna varau, e pe maneana pei nasamasamaana: nalakena naloluna e pei tea vituakiana paki nia naga ega vei tea kovagoro sikai.

¹⁶Ma te naata e pe alagoro pei tea masau navululuana, kinami au da dape natomariana tapala nogoe mau, go ekalesia maga ki Sup̃e eu da dape a mau.

¹⁷Ma ragi waina a dip̃aki mu tea wanogoe, a da pasa samasamani mu mau, nalakena ragi waina ku saisai ku da p̃ia asa mau, ma ku sa asa.

¹⁸Nalakena pea mau, ragi waina ku saisai doko ekalesia, a dogo naga natap̃otaeana maga eu doko m̃aleoputo kakamu; go a saralomau magovai asa.

¹⁹Nalakena e one asa one naga tagona p̃ota maga euga toko m̃aleoputo kakamu, naga tea maridogopiragiana maga euga vei tea mariana euga toko lina m̃aleoputo kakamu.

²⁰Nalakena tea wanogoe ragi waina ku saisai paki tokora sikai maau, e da pei naga kuga kani nakaniana ki Nawota mau:

²¹nalakena ragi waina ku ganikani sara naatam̃oli eu sikasikai dape nakaniana adeada pea ki tea p̃ota, go sikai e pitolo, go tea p̃ota e matamaloku.

²²Nasava? Ku da peani nasum̃a maga waina kuga kanikani po munu ara? Kite ku midoaki p̃alo ki ekalesia ki Sup̃e, po mari tea maga waina eu da peani mau eu maliere? Aga noa ki mu nasava? Aga vasa samasamani mu tea wanogoe kite? A da pasa samasamani mu mau.

²³Nalakena kinau a dape ki Nawota tea waina a moro pitua ki nia paki mu, naga Nawota Yesu, nap̃ogiana waina e pei tea vituakiana asa, e dape bred;

²⁴go ragi waina e pasadodom̃ataki sua, e dova p̃orae a, po naga, Tea waia e pei nap̃atokogu, waina e manimu pei tea marip̃oraeana: kuga mari tea waia naga kuga midoaki nau asa.

²⁵Dapala nogoe lasa munu, edaku ki nakaniana, po naga, Lasa munu waia e pei navasasokiana vau ni nadagu: kuga mari tea waia, ragi maga waina ku pe munugi a, naga kuga midoaki nau asa.

²⁶Nalakena ragi maga waina ku pe kani bred waia, po munu lasa munu, ku do dogorogo ki namateana ki Nawota asa pa pa ega wo umai.

²⁷Nalakena tea wanogoe naata waina e pe kani sa ki bred wanogoe kite munu sa ki lasa munu ki Nawota, sogi ni nap̃atoko ni Nawota go ni nadana e pe wo liko asa.

²⁸Ma naatam̃oli ega tum̃ana midoaki usiusi a, go dapala nogoe ega kani bred wanogoe, po munu lasa munu wanogoe.

²⁹Nalakena tea waina e ganikani po munu, e pe ta midoaki p̃otae nap̃atoko ni Nawota mau, e pe kani po munu navasap̃otaeana dum̃ana paki nia.

³⁰Nalakena tea wanogoe tea laapa m̃aleoputo kakamu eu manainai go eu sasana, go tea laapa eu maturu.

³¹Ma tu pe tum̃agida midoaki p̃otae gida, tu pe ta pei tea vasap̃otaeana mau.

³²Ma ragi waina tu pei tea vasap̃otaeana, tu pei tea varatiana pae Nawota, naga tuga ta pei tea tip̃akotoviana sikoti maramana mau.

³³Nalakena tea wanogoe, taigu maga, ragi waina ku saisai naga kuga kanikani kuga tum̃amu leogoro mu.

³⁴Go te naata e pe vitolo, ega kanikani sum̃a ni kiana; naga kuga ta saisai paki navasap̃otaeana mau. Ma naleo p̃ota maga ragi waina aga valoti aga wo pasa dawona ki da.