Read Nguna Togoa Etafe North 1 PAKI TEA NI KORINTHO 12 Bible Online

1 PAKI TEA NI KORINTHO 12 - Nguna Togoa Etafe North bible

1 PAKI TEA NI KORINTHO 12

¹Ma nalo ni navituam̃olikiana maga ni naatana, tai maga, a da masauna naga nimu kuga vei sap̃o mau.

²Ku atae naga ragi waina ku pei tea ni nalauna maligo maga ku pei tea viragiluaana paki nasup̃e maga waina eu pei pusa, dapala waina ku pe vei tea viragiana;

³Nalakena tea wanogoe a mari mu kuga atae, naga te naata sikai waina e pasa pae Naata ni Sup̃e e da naga, Yesu e pei anathema; go te naata sikai e pe ta pasa pae Naatana Tapu mau, e pe ta mari atae naga, Yesu e pei Yehovah.

⁴Ma navituam̃olikiana visarasara maga eu doko, ma Naatana sikai maau.

⁵Go nasuasuaana visarasara maga eu doko, go Nawota sikai maau.

⁶Go nawosiana visarasara maga eu doko, ma Sup̃e sikai maau, waina e do p̃osiwosi ki naleo maga mamau puti doko tea maga mamau puti.

⁷Ma namaridokolinaana ki Naatana e pei tea vituakiana paki sara naata sikasikai, naga euga mari m̃ataki asa.

⁸Nalakena navasaana ni namanumatuaana e pei tea vituakiana paki tea sikai pae Naatana; go navasaana ni naataeana paki tea p̃ota sikai pae Naatana sikai maau.

⁹Nasaralomauana paki tea p̃ota sikai pae Naatana sikai maau; go navituam̃olikiana maga ni namaripauriana maga paki tea p̃ota sikai pae Naatana sikai maau wanogoe;

¹⁰go nawosiana maga ni nakasuaana maga paki tea p̃ota sikai; go naveanoasaiana paki tea p̃ota sikai; go namidoakip̃otaeana ni naatana maga paki tea p̃ota sikai: namena p̃ota maga paki tea p̃ota sikai; go navasadoaana ni namena maga paki tea p̃ota sikai.

¹¹Ma tea maga mamau puti wanogoe Naatana sikai maau wanogoe e do p̃osiwosi ki da, po do magi sara naata sikasikai dap̃otawotae dapala waina e masauna.

¹²Nalakena dakiusi waina nap̃atoko e sikai maau, po pilake naleo laapa, go naleo maga mamau puti ni nap̃atoko, waina eu laapa, eu pei nap̃atoko sikai maau: Kristo ma e dapala nogoe.

¹³Nalakena nigida maga mamau puti tu pei tea bapetisoana doko Naatana sikai maau paki nap̃atoko sikai maau, tu pe vei tea ni Yudea maga kite tea ni Hellas maga, tu pe vei naviti maga kite tea veresiana maga dum̃agida doko; go tu mamau puti pei tea mariana tu munu Naatana sikai maau.

¹⁴Nalakena nap̃atoko e da pei naleo sikai maau mau, ma e pei naleo laapa.

¹⁵Natua e pe naga, Nalakena a da pei nam̃elearu mau, a da pei tea ni nap̃atoko mau; e da pei tea ni nap̃atoko mau nalakena tea wanogoe kite?

¹⁶Go nadaliga e pe naga, Nalakena a da pei namata mau, a da pei tea ni nap̃atoko mau; e da pei tea ni nap̃atoko mau nalakena tea wanogoe kite?

¹⁷Nap̃atoko mamau e pe vei namata sikai, narogoana e pe toko esava? Tea mamau e pe vei narogoana, nasidogoana e pe toko esava?

¹⁸Ma ragi waia Sup̃e e lawo ki naleo maga eu sikasikai puti doko nap̃atoko, dapala waina e masauna.

¹⁹Go eu pe mamau puti pei naleo sikai maau, nap̃atoko e pe toko esava?

²⁰Ma ragi waia eu pei naleo laapa, ma nap̃atoko sikai maau.

²¹Go namata e mari sa noa ki nam̃elearu, Aga kasa ki‐go? Go nap̃au e mari sa noa ki natua maga, Aga kasa ki mu?

²²Ma e panop̃ota ki nia, naleo maga ni nap̃atoko waina eu dapala eu manainai sa eu pei tea lomau ni nap̃atoko:

²³go natawotu maga ni nap̃atoko, waina tu midoa ki da naga eu da pei tea dodomadaganiana mau, tu doropusi nadodomadaganiana warua liu e doko natawotu maga wanogoe; go natawotu kakagida maga waina eu da pei tea leom̃atakiana mau eu peani naleom̃atakiana warua liu;

²⁴ma natawotu leom̃atakiana kakagida maga eu da peani natikaana mau: ma Sup̃e e mari sarisari nap̃atoko, po pitua ki nadodomadaganiana warua liu paki natawotu waina e dika;

²⁵naga te natap̃otaeana ega ta doko nap̃atoko mau: ma naga naleo maga euga veani namidoakiparatikiana sikai maau dum̃ada paki da.

²⁶Go naleo sikai e pe rogo kite sa, naleo maga mamau puti eu pe rogo kite sa sikoti a; kite naleo sikai e pe vei tea dodomadaganiana; naleo maga mamau puti eu pe laelaea sikoti a.

²⁷Ma nimu ku pei nap̃atoko ni Kristo, go ku sikasikai pei naleo maga kakana.

²⁸Go Sup̃e e lawo ki te seara doko ekalesia, tea vea apostolo maga, kerua profeta maga, ketolu tea vasapiseiki maga, edaku ki tea wanogoe nawosiana kasua maga, edaku ki tea wanogoe navituam̃olikiana maga ni namaripauriana maga, tea silae maga, tea maraki maga, namena visarasara maga.

²⁹Eu mamau puti pei apostolo maga kite? Eu mamau puti pei profeta maga kite? Eu mamau puti pei tea vasa piseiki maga kite? Eu mamau puti pei tea mari nawosiana kasua maga kite?

³⁰Eu mamau puti peani navituam̃olikiana maga ni namaripauriana maga kite? Eu mamau puti pasa ki namena maga kite? Eu mamau puti pasa doa kite?

³¹Ma kuga masau p̃arua ki navituam̃olikiana warua liu maga. Go aga moro piseiki mu napua sikai waina e p̃ia liu.