Read Nguna Togoa Etafe North 1 PAKI TEA NI KORINTHO 14 Bible Online

1 PAKI TEA NI KORINTHO 14 - Nguna Togoa Etafe North bible

1 PAKI TEA NI KORINTHO 14

¹Kuga sava dausi nadodomiana; ma kuga masau p̃arua ki navituam̃olikiana maga ni naatana, ma p̃arua liu naga kuga vea noa sai.

²Nalakena tea waina e pasa ki namena sikai e da pasa ki naatam̃oli maga mau, ma e pasa ki Sup̃e; nalakena te naata sikai e da dogo atae mau; ma e pasa p̃aia maga ki naatana.

³Ma tea waina e pea noa sai e pasa ki naatam̃oli maga natavagiana, go navasaparatikiana, go navasapakavakaleana.

⁴Tea waina e pasa ki namena sikai e dum̃ana davagi a; ma tea waina e pea noa sai e davagi ekalesia.

⁵Ma a masauna naga kuga mamau puti pasa ki namena maga, ma a masau p̃arua ki nia naga kuga vea noa sai: go tea waina e pea noa sai e p̃arua liu tea waina e pasa ki namena maga, e pe ta pasa doa mau, naga ekalesia ega tape natavagiana.

⁶Ma ragi, waia, tai maga, a pe valoti punusi mu po pasa ki namena maga, ma a pe ta pasa ki mu pae nanoapakasakiana, kite pae naataeana kite pae naveanoasaiana, kite pae navasapiseikiana mau, a pe silae mu nasava asa? Go naleo maga waina eu da mauri mau,

⁷waina eu pitua ki nadaleo, e pe vei lokore kite harp, eu pe ta pitua ki namawota ni nasaruruana maga mau, tea waina e pei tea noaana lokore kite harp ega wo pei tea ataeana dapale sava?

⁸Nalakena paiga e pe vitua ki nadaleo waina e da noa p̃otae mau, sei ega wo dum̃ana mari m̃ata ki nia raki navakalo?

⁹Dapala nogoe nimu ma, ku pe ta pitua pae namenamu ki navasaana rogo atae m̃atakiana mau, tea waina e pei tea noaana ega wo pei tea ataeana dapale sava? Nalakena ku pe wo pei tea vasa paki namalopa.

¹⁰Nadaleo laapa visarasara eu alagoro doko maramana, go te navatuna e da pei tea daleo tika mau.

¹¹Nalakena tea wanogoe a pe ta atae namidoakip̃otaeana ni nadaleo mau, a pe vei tea ni navanua p̃ota sikai paki tea waina e do pasa, go tea waina e do pasa e pe vei tea ni navanua p̃ota sikai nalo kakagu.

¹²Dapala nogoe nimu ma, nalakena ku pei tea masau p̃arua ki navituam̃olikiana maga ni naatana, kuga laaga naga kuga mari p̃arua ki nia paki natavagiana ni ekalesia.

¹³Nalakena tea wanogoe naata waina e pasa ki namena sikai ega tapasavasa naga ega vasa doa.

¹⁴Nalakena a pe tapasavasa ki namena sikai, naatagu e pe tapasavasa, ma namidoakiataeana aginau e pe vei tea oro:

¹⁵Nalakena tea wanogoe e pei nasava? Aga wo dapasavasa ki naatagu, go aga wo dapasavasa ki namidoakiataeana aginau: aga wo lega ki naatagu, go aga wo lega ki namidoakiataeana aginau.

¹⁶Nalakena ku pe vasa p̃ia ki naatam̃a, tea ni nasaisaiana waina e pei naatam̃oli veisap̃o ega wo noa Amen sokari navasadodom̃atakiana anigo dapale sava, ragi waina e da atae tea waina ku noa e mau?

¹⁷Nalakena nigo ku pasadodom̃ataki p̃ia lomau, ma tea p̃ota e da pei tea tavagiana asa mau.

¹⁸A pasadodom̃ataki Sup̃e, nalakena a pasa ki namena maga p̃arua liu puti mu:

¹⁹ma a masauna naga aga vasa navasaana lima ki namidoakiataeana aginau doko nasaisaiana, naga aga vasapisei ki tea p̃ota maga, p̃arua liu naga aga vasa navasaana tivilia sikai pae namena sikai.

²⁰Tai maga, kuga ta pei piakiki maga nalo ni namidodoana mau, ma kuga vei pipia maga nalo ni navilosiana, ma kuga vei tea matua maga nalo ni namidodoana.

²¹E pei tea midiriana doko nawotaeana, naga Aga wo pasa ki narei waia pae naatam̃oli maga ni namena p̃ota maga go pae nagole ni naatam̃oli p̃ota maga; ma euga wo da dogo paratiki nau dapala nogoe mau, Yehovah e noa e.

²²Nalakena tea wanogoe namena maga eu pei navaivaiana, eu da magi tea saralomau maga pei navaivaiana mau, ma eu magi tea ta saralomau maga pei navaivaiana: ma naveanoasaiana e da magi tea ta saralomau maga pei navaivaiana mau, ma e magi tea saralomau maga pei navaivaiana.

²³Nalakena tea wanogoe ekalesia mamau eu pe vei tea saisaikiana paki tokora sikai, go tea maga mamau puti eu pe vasa ki namena maga, go naatam̃oli veisap̃o maga kite tea waina eu da saralomau mau eu pe umai paki ekopu, eu pe wo da noa naga ku daratara kite?

²⁴Ma tea maga mamau puti eu pe vea noa sai, go tea sikai waina e da saralomau mau kite naatam̃oli veisap̃o sikai e pe umai paki ekopu, e pe vei tea vasap̃aiana pae tea maga mamau puti, e pe vei tea vasap̃otaeana pae tea maga mamau puti;

²⁵tea surukiana maga ni nap̃op̃ona eu pe vei tea mariana eu pe toko lina; go dapala nogoe e pe wo dowo dap̃olosiwo po lotu ki Sup̃e, po dogorogo naga Sup̃e e doko m̃aleoputo kakamu lomau.

²⁶Nalakena tea wanogoe e pei nasava, tai maga? Ragi waina ku saisai, sara naata eu sikasikai peani salamo sikai, eu peani navasapiseikiana sikai, eu peani nanoapakasakiana sikai, eu peani namena sikai, eu peani navasadoaana sikai. Naleo maga mamau puti euga vei tea mariana raki natavagiana.

²⁷Te naata e pe vasa ki namena sikai, tea ruarua eroga vasa, kite euga ta liu dolutolu mau, go euga tum̃ada dua olioli ra; go sikai ega vasa doa:

²⁸ma tea vasa doa e pe tika, ega vunuta doko nasaisaiana; go ega tum̃ana pasa ki nia, go paki Sup̃e.

²⁹Go profeta maga edua kite edolu euga vasa, go tea p̃ota maga euga midoaki p̃otae.

³⁰Ma te navatuna e pe vei tea noapakasakiana paki tea p̃ota sikai waina e doko, tea vea ega vunuta.

³¹Nalakena ku mamau puti mari atae sikasikai pea noa sai, naga tea maga mamau puti euga ataedogo, go naga tea maga mamau puti euga vei tea vasapakavakaleana;

³²go naatana maga ni profeta maga eu doko etano paki profeta maga;

³³nalakena Sup̃e e da pei Sup̃e ni navariana mau, ma e pei Sup̃e ni natam̃ateana; dapala waina e doko ekalesia maga mamau puti ni tea tautau maga.

³⁴Nagoroi maga euga vunuta doko nasaisaiana maga; nalakena e da pei tea suasuakiana paki da mau naga euga vasa; ma euga toko etano, ega tapala waina nawotaeana ma e noa e.

³⁵Go eu pe masauna naga euga ataedogo te navatuna, euga vusuusu paki adawota maga sum̃a ni kiada: nalakena e pei tea malierekiana ki nagoroi naga ega vasa nasaisaiana.

³⁶Kite nasava? Navasaana ki Sup̃e e m̃elu mu pano? Kite e umai paki mu sikimu?

³⁷Te naata e pe tum̃ana midoaki nia naga e pei profeta, kite tea ni Naatana, ega atae m̃ata ki tea maga waina a midiri paki mu ara, naga eu pei natip̃akiana maga ki Nawota.

³⁸Ma te naata e pe vei sap̃o ega vei sap̃o.

³⁹Nalakena tea wanogoe, taigu maga, kuga masau p̃arua ki naga kuga vea noa sai, go kuga ta dip̃agoro mau naga euga ta pasa ki namena maga.

⁴⁰Ma naleo maga namau puti euga vei tea mariana pae naleom̃atakiana go pae namarimatanakiana.