Read Nguna Togoa Etafe North 1 PAKI TEA NI KORINTHO 15 Bible Online

1 PAKI TEA NI KORINTHO 15 - Nguna Togoa Etafe North bible

1 PAKI TEA NI KORINTHO 15

¹Ma a mari mu kuga atae, tai maga, narogorogoana wia waina a dogorogo ki sua e paki mu, go waina ku dape a, go waina ku lawodu asa,

²go waina ku do pei tea mautipauriana pae asa, ku pe midoaki soki navasaana waina a dogorogo ki narogorogoana wia paki mu asa, go ku pe ta saralomau p̃alo mau.

³Nalakena a pea pitua paki mu ki tea waina ku dape a, naga Kristo e mate nalakena namarinaleosaana anigida maga pae navasaana midiriana maga;

⁴go naga e pei tea ovakiana; go naga e pei tea sikeana duleana naaleatia ketolu pae navasaana midiriana maga;

⁵go naga e pakilina ki Kefa; edaku ki nia ki tea rualima sikai tamate dua;

⁶edaku ki nia e pakilina ki taigida laapa liu p̃onotia lima paka sikai, waina tea laapa kakada eu doko pa pa paki ragi waia, ma te seara teu maturu;

⁷edaku ki nia e pakilina ki Yakob; edaku ki nia ki apostolo maga mamau puti;

⁸ma sala edaku mau e pakilina ki nau, waina a dapala tea solapesiana sikai.

⁹Nalakena kinau a pei tea kiki sa ni apostolo maga, waina a da p̃ia mau naga aga vei tea sosoana ki apostolo sikai, nalakena a kopalele ekalesia ki Sup̃e.

¹⁰Ma ki nasaup̃iaana ki Sup̃e a doko dapala waina a doko: go nasaup̃iaana aneana waina e pei tea vituakiana paki nau e da pei tea p̃alo mau; ma a p̃osiwosi‐mawosa p̃arua liu puti ra: ma e da pei kinau mau, ma e pei nasaup̃iaana ki Sup̃e waina e sikoti au.

¹¹Nalakena tea wanogoe e pe vei kinau kite e pe vei nara, au do dogorogo dapala nogoe, go ku saralomau dapala nogoe.

¹²Ma Kristo e pe vei tea rogorogokiana naga e pei tea sikeana duleana m̃elu dua ki tea mate maga, ekasana te seara ni m̃aleoputo kakamu eu noa naga namoroduleanaana ki tea mate maga e da doko mau?

¹³Ma namoroduleanaana ki tea mate maga e pe ta doko mau, Kristo e da pei tea sikeana duleana mau:

¹⁴go Kristo e pe ta pei tea sikeana duleana mau, narogorogoana aginami e pei tea p̃alo, go nasaralomauana animu e pei tea p̃alo.

¹⁵Ioro, go au pe vei tea vap̃aiana au pei tea noa sokisoki sorosoro maga nalo ni Sup̃e; nalakena au noa sokisoki nalo ni Sup̃e naga e sike Kristo e duleana waina e da sike a e duleana mau, tea mate maga eu pe ta pei tea sikeana duleana lomau mau.

¹⁶Nalakena tea mate maga eu pe ta pei tea sikeana duleana mau, Kristo e da pei tea sikeana duleana mau:

¹⁷go Kristo e pe ta pei tea sikeana duleana mau, nasaralomauana animu e pei tea p̃alo; ku ko doko namarinaleosaana animu maga.

¹⁸Go tea maga ma waina eu maturu doko Kristo eu mate puoli.

¹⁹Tu pe leogoropavatu Kristo ragi ni namauriana waia sikai maau, tu pei tea rogokitesa p̃arua liu naatam̃oli maga mamau puti.

²⁰Ma ragi waia Kristo e pei tea sikeana duleana m̃elu dua ki tea mate maga, e pei takavea ni tea maturu maga.

²¹Nalakena dapala waina namateana e pae naatam̃oli umai, namoroduleanaana ki tea mate maga e pae naatam̃oli umai.

²²Nalakena dakiusi waina tea maga mamau puti eu mate doko Adam, dapala nogoe tea maga mamau puti euga wo pei tea vakamaurikiana doko Kristo.

²³Ma sara naatam̃oli euga wo sikasikai doko tagona adeada: takavea Kristo: edaku ki nia tea maga waina eu pei tea ki Kristo, ragi ni naumaiana aneana.

²⁴Edaku ki nia tea edaku mau, ragi waina ega wo pitua ki namarakiana paki Sup̃e, Tamana; ragi waina ega wo mari puoli ki sua sara namarakiana go sara naveinawotaana go sara nakasuaana.

²⁵Nalakena e one asa one naga ega maramara pa pa ega wo doropusi sua tea kokona ki nia maga mamau puti euga toko etano ki nam̃elenatuana maga.

²⁶Tea kokona edaku mau waina ega wo pei tea maripuolikiana e pei namateana.

²⁷Nalakena, E doropusi naleo maga mamau puti eu doko etano ki nam̃elenatuana maga. Ma ragi waina e naga, Naleo maga mamau puti eu pei tea toropusiana eu doko etano, e doko lina naga nae e doko waina e doropusi naleo maga mamau puti eu doko etano paki nia.

²⁸Ma ragi waina naleo maga mamau puti euga wo doko etano sua paki nia, ragi wanogoe nae ma, Natuna, ega wo doko etano paki tea waina e doropusi naleo maga mamau puti eu doko etano paki nia, naga Sup̃e ega vei naleo maga mamau puti doko tea maga mamau puti.

²⁹Nalakena e pe ta dapala nogoe mau, tea maga waina eu do pei tea bapetisoana oli tea mate maga euga wo mari nasava? Tea mate maga eu pe ta pei tea sikeana duleanadogo mau, ekasana te seara eu do pei tea bapetisoana oli ra?

³⁰Go ekasana kinami au sua namatakuana sara aura?

³¹A pivisa pae navakavakaeana aginau nalo kakamu, tai maga, waina a peani a doko Kristo Yesu Nawota anigida, naga e mate sara naaleatia.

³²A pe marimari dip̃a nalo mila maga Efeso pae naatam̃oli, a pe veani nasava asa? Tea mate maga eu pe ta pei tea sikeana duleana mau, tuga kanikani po munu, nalakena matamai tuga wo mate.

³³Kuga ta pei tea vilasurueana mau: Nasikotiana sa maga eu mari sa ki natomariana wia maga.

³⁴Kuga atusake ega vae namarinaleoleanaana, go kuga ta mari naleo sa mau; nalakena te seara eu da peani naatae‐Sup̃e‐ana mau. A pasa tea wanogoe naga kuga maliere.

³⁵Ma te naata ega wo naga, Tea mate maga eu pei tea sikeana duleana dapale sava? Go euga wo pilake nap̃atoko dapale sava umai?

³⁶Tea manumatavusa, tea waina nigo ku lawoe epe ta mate mau e pe ta pei tea vakamaurikiana mau:

³⁷go tea waina ku lawo e ku da lawo nap̃atoko waina ega wo pakilina mau, ma napati m̃alu sikai, mase e pei tea ni whiit, kite tea ni tea p̃ota maga sikai;

³⁸ma Sup̃e e dua e nap̃atoko sikai dapala waina e masauna, go e dua puti sara napati sikasikai adeada nap̃atokoda.

³⁹Sara nap̃okasi eu da pei nap̃okasi sikai maau mau: ma tea sikai ni naatam̃oli maga e doko, go nap̃okasi p̃ota sikai ni nalo tua vati maga e doko, go nap̃okasi p̃ota sikai ni manu maga e doko, go tea p̃ota sikai ni naika maga e doko.

⁴⁰Go nap̃atoko maga ni nakoroatelagi eu doko, go nap̃atoko maga ni maramana eu doko: ma natawarawaraana ni tea ni nakoroatelagi maga e pei tea sikai, go natawarawaraana ni tea ni maramana maga e pei tea p̃ota sikai.

⁴¹Natawarawaraana sikai ni elo e doko, go natawarawaraana p̃ota sikai ni atelagi e doko, go natawarawaraana p̃ota sikai ni m̃asoe maga e doko: nalakena m̃asoe sikai e panop̃ota ki m̃asoe p̃ota sikai nalo ni natawarawaraana.

⁴²Go namoroduleanaana ni tea mate maga e dapala nogoe. E pei tea lawoana doko namesoana; e pei tea sikeana duleana doko namesosap̃oana:

⁴³e pei tea lawoana doko nadododaoana; e pei tea sikeana duleana doko nasamasamaana: e pei tea lawoana doko namanainaiana; e pei tea sikeana duleana doko nakasuaana:

⁴⁴e pei tea lawoana e pei nap̃atoko ni namero; e pei tea sikeana duleana e pei nap̃atoko ni naatana. Nap̃atoko ni namero e pe toko, tea ni naatana ma e pe toko.

⁴⁵Dapala nogoe e pei tea midiriana, Naatam̃oli vea, Adam, e pei tea mariana e pei naatana mauri. Adam edaku e pei tea mariana e pei naatana vakamauri.

⁴⁶Ma tea waina e pei tea ni naatana e da pea mau, ma tea waina e pei tea ni namero e pea; edaku ki nia tea waina e pei tea ni naatana.

⁴⁷Naatam̃oli vea e m̃elu maramana, e pei tea ni natano: naatam̃oli kerua e m̃elu nakoroatelagi.

⁴⁸Dapala waina tea waina e pei tea ni natano e doko, dapala nogoe tea maga waina ma eu pei tea ni natano eu doko: go dapala waina tea ni nakoroatelagi e doko, dapala nogoe tea maga waina ma eu pei tea ni nakoroatelagi eu doko:

⁴⁹go dapala waina tu pilake nunu ni tea ni natano, tuga wo pilake nunu ni tea ni nakoroatelagi.

⁵⁰Ma a noa tea waia, tai maga, naga nap̃okasi go nada ero mari sa peani namarakiana ki Sup̃e, go namesoana e da peani namesosap̃oana mau.

⁵¹Kuga leo, a noa ki mu p̃aia sikai: Tuga wo da mamau puti maturu mau, ma tuga wo mamau puti pei tea mariana tuga wo panop̃ota,

⁵²ragi kiki sa, ragi ni nawilimataana sikai, ragi ni paiga edaku: nalakena paiga ega wo dagi, go tea mate maga euga wo pei tea sikeana duleana po pei tea mesosap̃o, go nigida tuga wo pei tea mariana tuga wo panop̃ota.

⁵³Nalakena e one tea mesoatae waia one naga ega suni navei‐tea‐meso‐sap̃oana, go e one tea mate atae waia one naga ega suni navei‐tea‐matesap̃oana.

⁵⁴Ma ragi waina tea meso atae waia ega wo suni navei‐teameso‐sap̃oana, go tea mate atae waia ega wo suni navei‐tea‐matesap̃oana, ragi wanogoe navasaana waina e pei tea midiriana ega wo lolomana, e naga, Namateana e pei tea tinomiana paki namarimatuaana.

⁵⁵Namateana, namarimatuaana anigo wai? Namateana, natip̃a anigo wai?

⁵⁶Namarinaleosaana e pei natip̃a ni namateana; go nawotaeana e pei nakasuaana ni namarinaleosaana:

⁵⁷ma tuga vasadodom̃ata ki Sup̃e, waina e dua gida namarimatuaana pae Nawota anigida Yesu Kristo.

⁵⁸Nalakena tea wanogoe taigu dodomiana maga, kuga vei tea toko kasua, tea ta pei tea risuakiana mau, kuga to mari p̃arua ki nawosiana ki Nawota sara ragi, ku atae naga nawosi‐mawosa‐ana animu e da pei tea p̃alo mau doko Nawota.