Read Nguna Togoa Etafe North 1 PAKI TEA NI KORINTHO 16 Bible Online

1 PAKI TEA NI KORINTHO 16 - Nguna Togoa Etafe North bible

1 PAKI TEA NI KORINTHO 16

¹Ma nalo ni navilaesaisaikiana magi tea tautau maga, dapala waina a dip̃a ki ekalesia maga ni Calatia asa, nimu ma kuga mari ega tapala nogoe.

²Naaleatia vea ni wiik sara naata kakamu euga sikasikai doropusi daua ki ega toko pisari a, tea waina e pe talua e, naga ragi waina aga valoti navilaesaisaikiana seara euga ta pei tea mariana ragi wanogoe mau.

³Go ragi waina aga valoti doko sikoti mu, tea maga waina ku pe wo midoaki p̃otae ra naga eu p̃ia, aga wo dip̃aki lua tea maga wanogoe pae tusi maga naga euga tape nasaup̃iaana animu paki Yerusalem pano:

⁴go e pe vataka ni waina kinau ma aga vano, eu pe wo sikoti au pano.

⁵Ma aga wo paloti punusi mu, ragi waina aga wo surata duaduru sua Masedonia; nalakena a naga aga surata duaduru Masedonia;

⁶ma mase a pe wo doko sikoti mu, kite a pe wo doko sikoti mu ragi ni namaladiana, naga nimu kuga vusi au naga aga vaki tokora waina a pe wo paki asa pano. Nalakena a da masauna naga aga vunusi mu pae napua ragi waia mau;

⁷nalakena a leogoro naga aga toko sikoti mu doko te ragi, Nawota e pe suasua.

⁸Ma aga toko Efeso doko pa pa Pentekoste;

⁹nalakena namata warua sikai go marimatua e maginau dap̃olaga doko, go tea tugoro maga eu laapa.

¹⁰Ma Timotheo e pe valoti, kuga vunusi naga ega ta mataku doko sikoti mu mau; nalakena e do p̃osiwosi nawosiana ki Nawota dapala waina kinau ma a mari a:

¹¹nalakena tea wanogoe te naata ega ta midoaki p̃alo ki nia mau. Ma kuga vusi a doko natam̃ateana pano, naga ega umai punusi au: nalakena a do leogoro asa ega sikoti taigida maga umai.

¹²Ma nalo ni Apollo taigida, a pavarani p̃arua ki nia naga ega sikoti taigida maga paloti punusi mu: go e da pei namasauana aneana mau naga ega valoti ragi waia: ma ega wo paloti ragi waina ega wo peani ragi waina e p̃ia ki nia.

¹³Kuga to leleogoro, kuga to lawodu doko nasaralomauana, kuga vei naanoai maga, kuga kasua.

¹⁴Naleo animu maga mamau puti euga vei tea mariana doko nadodomiana.

¹⁵Ma a pavarani mu, tai maga (ku atae nasum̃a ki Stefana, naga eu pei takavea ni Akaia, go naga eu dum̃ada lawo ki da naga euga magi tea tautau maga suasua),

¹⁶naga nimu ma kuga toko etano paki tea tapala nogoe maga, go paki sara naata waina eu do p̃osiwosi sikoti ra po do posiwosimawosa.

¹⁷Go a laelaea nalakena naumaiana ki Stefana go ki Fortunato go ki Akaiko: nalakena navuoliana animu nara eu pakavuro e.

¹⁸Nalakena eu pakamaromaro ki naatagu go ki animu: nalakena tea wanogoe kuga atae m̃ata ki tea maga waina eu dapala nogoe.

¹⁹Ekalesia maga ni Asia eu pasadodomi mu, Akula go Priska ero pasadodomi p̃arua ki mu doko Nawota, nara ma ekalesia ni nasum̃a adeada.

²⁰Taigida maga mamau puti eu pasadodomi mu. Kuga tum̃amu pasadodomi mu ki natum̃iliana tautau sikai.

²¹Navasadodomiana aginau, Paulo, ki aginau nam̃elearugu.

²²Te naata e pe ta dodomi Nawota mau, ega vei tea vasasakiana. Nawota ega wo umai.

²³Nasaup̃iaana ki Nawota Yesu Kristo ega sikoti mu.

²⁴Nadodomiana aginau ega sikoti puti mu doko Kristo Yesu. Amen.