Read Nguna Togoa Etafe North 1 PAKI TEA NI KORINTHO 3 Bible Online

1 PAKI TEA NI KORINTHO 3 - Nguna Togoa Etafe North bible

1 PAKI TEA NI KORINTHO 3

¹Go kinau, tai maga, a mari sa pasa ki mu dapala ku pei tea ni Naatana, ma a pasa ki mu dapala ku pei tea ni nap̃okasi, dapala ku pei pipia maga doko Kristo.

²A dua mu milk ku munu, a da dua mu navinaga mau; nalakena ku ko da mari atae mau: go ragi waia ku ko da mari atae mau;

³nalakena ku ko pei tea ni nap̃okasi; nalakena waina naroitoiana go navululuana ero doko m̃aleoputo kakamu, ku da pei tea ni nap̃okasi, po surata pae naatam̃oli maga kite?

⁴Nalakena ragi waina sikai e naga, Kinau a pei tea ki Paulo; go tea p̃ota sikai e naga, Kinau a pei tea ki Apollo, ku da pei naatam̃oli maga kite?

⁵Nalakena tea wanogoe Apollo e pei nasava? Go Paulo e pei nasava? Tea suasua maga waina ku saralomau pae ara; go ero sikasikai dapala waina Nawota e dua ra sarasara ra.

⁶Kinau a lalawo, Apollo e pue; ma Sup̃e e mari a e ulua.

⁷Nalakena tea wanogoe naata waina e lalawo e da pei te navatuna mau, go tea waina e pue e da pei te navatuna mau, ma Sup̃e sikina waina e mari a e ulua.

⁸Ma tea waina e lalawo go tea waina e pue ero pei tea sikai maau: ma eroga wo sikasikai dape namoriana adeada sarasara ra ega vataka nawosi‐mawosa‐ana adeada.

⁹Nalakena au pei tea wosiwosi sikoti Sup̃e: ku pei natano kiliana ki Sup̃e, nasum̃a tavagiana ki Sup̃e.

¹⁰Pae nasaup̃iaana ki Sup̃e waina e pei tea vituakiana paki nau, dapala tea vei mataisau matua ni nasum̃a a doropusi laketano sikai; go tea p̃ota sikai e do davagi elagi asa. Ma sara naata euga sikasikai punusi dapala waina eu do davagi elagi asa.

¹¹Nalakena laketano p̃ota sikai te naata e da mari atae doropusi a mau, ma tea waina e pei tea toropusisuaana e sikina, waina e pei Yesu Kristo.

¹²Ma te naata e pe tavagi elagi ni laketano kold, silver, vatu maga ni navakokotoana warua, nakau, nam̃enau, stro;

¹³nawosiana ki sara naatam̃oli sikasikai ega wo pei tea mariana ega toko lina: nalakena naaleatia wanogoe ega wo mari a ega toko lina, nalakena e pei tea maripakasakiana ki nakapu; go nakapu ega wo mari dogo nawosiana ki sara naatam̃oli sikasikai e dapale sava?

¹⁴Nawosiana ki te naata waina e davagi a asa e pe toko, ega wo dape namoriana sikai.

¹⁵Nawosiana ki te naata e pe vei tea tap̃arakiana, ega wo dika namoriana, ma nae ega wo pei tea mautipauriana; ma ega wo dapala waina e pe vae nakapu.

¹⁶Ku da atae naga ku pei nasum̃a tapu ki Sup̃e, go naga Naata ni Sup̃e e doko mu doko kite?

¹⁷Te naata e pe mari sa ki nasum̃a tapu ki Sup̃e, Sup̃e ega wo mari sa ki naata wanogoe; nalakena nasum̃a tapu ki Sup̃e e dautau, go nimu ku dapala nogoe.

¹⁸Te naata ega ta dum̃ana pilasurue a mau. Te naata e pe midoaki nia naga e pei tea manumatua m̃aleoputo kakamu maramana waia, ega vei tea manumatavusa, naga ega vei tea manumatua.

¹⁹Nalakena namanumatuaana ni maramana waia e pei namanumatavusaana narae ni Sup̃e.

²⁰Nalakena e pei tea midiriana, e naga, Nae waina e do pua soki tea manumatua maga doko namarimanumatuaana adeada: go e moro naga, Yehovah atae namidodoana maga ki tea manumatua maga naga eu pei tea p̃alo.

²¹Nalakena tea wanogoe te naata ega ta pakavakae naatam̃oli maga mau. Nalakena naleo maga mamau puti eu pei animu;

²²e pe vei Paulo, kite Apollo, kite Kefa, kite maramana, kite namauriana, kite namateana, kite naleo maga waina eu doko ragi waia, kite naleo maga waina euga wo umai; tea maga mamau puti eu pei animu.

²³Go nimu ku pei tea ki Kristo; go Kristo e pei tea ki Sup̃e.