Read Nguna Togoa Etafe North 1 PAKI TEA NI KORINTHO 8 Bible Online

1 PAKI TEA NI KORINTHO 8 - Nguna Togoa Etafe North bible

1 PAKI TEA NI KORINTHO 8

¹Ma nalo ni naleo maga waina eu pei naviriana paki nasup̃e maga: Tu atae naga tu mamau puti peani naataeana. Naataeana e do mari e pei tea p̃op̃o vuka, ma nadodomiana e do davagi.

²Te naata e pe midoaki nia naga e atae te navatuna, e ko da atae mau dapala waina e one asa one naga ega atae;

³ma te naata e pe dodomi Sup̃e, naata wanogoe e pei tea ataeana pae asa.

⁴Go nalo ni nakaniana ni naleo maga waina eu pei naviriana paki nasup̃e maga, tu atae naga nasup̃e e da pei te navatuna maramana mau, go naga Sup̃e p̃ota sikai e da doko mau ma tea sikai maau.

⁵Nalakena tea maga waina eu pei tea sosoana ki sup̃e maga eu pe toko, nakoroatelagi kite maramana; dapala waina sup̃e laapa eu doko, go nawota laapa;

⁶ma anigida Sup̃e sikai mau e doko, Tamana, waina naleo maga mamau puti eu m̃elu asa, go nigida tu maneana doko; go Nawota sikai maau, Yesu Kristo, waina naleo maga mamau puti eu pae asa, go nigida tu pae asa.

⁷Ma naataeana wanogoe e da doko tea maga mamau puti mau: ma te seara, nalakena natomariana ni nasup̃e pa pa paki ragi waia, eu gani a dapala e pei naleo waina e pei naviriana paki nasup̃e sikai; go natum̃adaatae‐ana waina e manainai e pei tea mariana e loa asa.

⁸Ma navinaga ega wo da mari gida tuga lawodu narae ni Sup̃e mau: go tu pe ta ganikani mau, tu pe ta sa asa mau; go tu pe kanikani, tu pe ta p̃ia asa mau.

⁹Ma kuga vunusi naga naveinawotaana animu wanogoe ega ta pei tea tapilagonaana sikai paki tea manainai maga mau.

¹⁰Nalakena te naata e pe vunusi ko waina ku peani naataeana ku pe kere one ganikani ekopu ni nasum̃a ni nasup̃e sikai, go e pe manainai, natum̃ana‐atae‐ana e pe wo da pei tea tavagiana naga ega kani naleo maga waina eu pei naviriana paki nasup̃e maga kite?

¹¹Go tea waina e manainai e mate puoli nalakena naataeana anigo, taigida waina Kristo e mate nalakena nae.

¹²Go dapala nogoe, ragi waina ku mari naleo sa dip̃a taigida maga, po p̃okati natum̃ada‐atae‐ana ragi waina e manainai, ku mari naleo sa dip̃a Kristo.

¹³Nalakena tea wanogoe, navinaga e pe mari taigu e pe tapilagona, a pe wo da gani te nap̃okasi seara mau pa pa e pe tu mau du, naga aga ta mari taigu ega tapilagona mau.