Read Nguna Togoa Etafe North PAKI TEA NI KORINTHO 11 Bible Online

PAKI TEA NI KORINTHO 11 - Nguna Togoa Etafe North bible

PAKI TEA NI KORINTHO 11

¹A masauna naga kuga soki au nalo ni namanumatavusaana tea kiki: ma ku do soki au.

²Nalakena a dotowo kasua ki mu ki natotowokasua‐ana sikai ki Sup̃e: nalakena a magi naanoai sikai maau pasa soki mu, naga aga mari mu kuga lawodu narae ni Kristo kuga tapala nagoroi atara tautau sikai.

³Ma a mataku, mase, dapala waina m̃aata e pilasurue Eva ki namarimanumatuaana aneana, namidodoana animu maga eu pe vei tea marisakiana m̃elu dua ki naveilomauana go natautauana waina e doko Kristo.

⁴Nalakena tea waina e umai e pe rogorogo ki Yesu p̃ota sikai, waina au da pea dogorogo ki nia mau, kite ku pe tape naatana vanop̃ota sikai, waina ku da pea dape a mau, kite narogorogoana wia sikai waina ku da pea dape a mau, ku pe soki a ku mari p̃ia.

⁵Nalakena a midoaki nia naga a da edaku ki tea warua liu ni apostolo maga mau.

⁶Ma a pe vei naatam̃oli m̃oli ki navasaana, ma a da pei naatam̃oli m̃oli ki naataeana mau; ma nalo ni sara naleo au mari a e doko lina m̃aleoputo ni tea maga mamau puti paki mu.

⁷Kite a mari namarinaleosaana sikai nalo ni waina a dum̃agu mari au a pakitano naga nimu kuga vei tea mariana kuga vakilagi, nalakena a dogorogo ki narogorogoana wia ki Sup̃e paki mu navakokotoana e dika?

⁸A dapepavakoto tea ki ekalesia p̃ota maga, a do dape namoriana kiada naga aga manimu suasua;

⁹go ragi waina a doko sikoti mu po dika, a da pei tea madaga one te naata mau; nalakena natikaana aginau taigida maga eu sokaripakavuro e, ragi waina eu pae Masedonia umai; go nalo ni sara naleo a dum̃agu leoparatiki nau naga aga ta pei tea madaga paki mu mau, go aga wo do dum̃agu leoparatiki nau.

¹⁰Waina nalomauana ki Kristo e doko au te naata sikai ega wo da mari au aga vunuta ki navakavakaeana wanogoe tokora maga ni Akaia mau.

¹¹Ekasana? Nalakena a da dodomi mu mau kite? Sup̃e e atae a.

¹²Ma tea waina a mari a aga wo do mari a, naga aga taelua tea vuatiana ki tea maga waina eu masau tea vuatiana sikai; naga, nalo ni tea waina eu pakavakae asa, euga vei tea vap̃aiana naga eu dakiusi gami asa.

¹³Nalakena tea tapala nogoe maga eu pei apostolo sorosoro maga, tea wosiwosi surue maga, eu do dum̃ada mari ra eu oli apostolo maga ki Kristo.

¹⁴Go e da pei tea ni namagaana mau; nalakena Satan ma e dum̃ana mari a e oli agelo sikai ni namarama.

¹⁵Nalakena tea wanogoe e da pei tea warua mau tea suasua aneana maga ma eu pe tum̃ada mari ra eu pe tapala tea suasua maga ni namarinaleoleanaana; waina ragi edaku adeada ega wo dapala nawosiana adeada maga.

¹⁶A moro naga, Te naata ega ta midoaki nau naga a pei tea manumatavusa mau; ma ku pe midoaki nia, kuga viragi au dapala a pei tea manumatavusa, naga kinau ma aga tum̃agu pakavakae kiki ki nau.

¹⁷Tea waina a pasa asa a da pasa pae Nawota mau, ma dapala e pae namanumatavusaana, nalakena navavatuana waia ni navakavakaeana.

¹⁸Nalakena tea laapa eu pakavakae pae nap̃okasi, kinau ma aga wo pakavakae.

¹⁹Nalakena ku laelaea soki tea manumatavusa, nalakenu nimu ku pei tea manumatua maga.

²⁰Nalakena ku soki te naata, e pe mari mu ku pei naviti maga, te naata e pe kanidiro mu, te naata e pe vuapavakoto mu, te naata e pe tum̃ana dape a sake, te naata e pe tip̃a naraemu.

²¹A noa e pae nadododaoana, dapala waina kinami au pe manainai. Ma nalo ni te waina te naata e piviari asa (a noa e pae namanumatavusaana). Kinau ma a piviari asa.

²²Eu pei Heberu maga kite? Go kinau. Eu pei tea ni Israel maga kite? Go kinau. Eu pei naworawora ni Abraham kite?

²³Go kinau. Eu pei tea suasua maga ki Kristo kite? (A pasa dapala tea daratara sikai) kinau a p̃arua liu ra; ki nawosimawosa‐ana maga p̃arua liu, ki nasum̃a ni navavaiana maga p̃arua liu, ki navaratiana maga do liu totowo, ki namateana maga paka laapa.

²⁴A paka lima dape ki tea ni Yudea maga navaratiana rualima pati sikai e puoli ki nia.

²⁵A paka tolu pei tea varatiana ki nakau varati, a paka sikai pei tea nadiana ki vatu maga, paka tolu rarua waina a porau asa e mawora, a doko epua nap̃ogiana sikai go naaleatia sikai:

²⁶ki nasurataana maga paka laapa, ki namatakuana maga ni noai sara maga, ki namatakuana maga ni tea tapepavakoto maga, ki namatakuana maga m̃elu tea ni nalauna aginau, ki namatakuana maga m̃elu tea ni nalauna p̃ota maga, ki namatakuana maga natokoana, ki namatakuana maga masop̃alo, ki namatakuana maga natasi, ki namatakuana maga m̃aleoputo ni taigida sorosoro maga;

²⁷ki nawosiana kasua go ki namawosaana, ki naleleogoroana maga paka laapa, ki navitoloana go namadouana, ki navaliana maga paka laapa, ki namaladiana go nam̃alam̃alaana.

²⁸Naga aga ta noa tea p̃ota maga mau, tea waina e diesoki au sara naaleatia e doko, namidoakiparatikiana ni ekalesia maga mamau puti.

²⁹Sei e manainai go a da manainai mau? Sei e pei tea mariana e dapilagona go kinau a da soro mau?

³⁰E pe one au one naga aga vakavakae, aga wo pakavakae naleo maga ni namanainaiana aginau.

³¹Sup̃e go Tama ni Nawota Yesu, nae waina e pei tea vasap̃iakiana pa pa ega tu mau du, e atae naga a da sorosoro mau.

³²Ragi waina a doko Damaseko doko tea maramara ki Areta nawota e pavaigoro natokoana ki tea ni Damaseko maga, naga ega vua soki au:

³³go a pei tea toroana pakitano duaduru namata leoduru sikai doko nala sikai pae nakoro, po sava m̃elu dua ki nam̃elearuna maga.