Read Nguna Togoa Etafe North PAKI TEA NI KORINTHO 13 Bible Online

PAKI TEA NI KORINTHO 13 - Nguna Togoa Etafe North bible

PAKI TEA NI KORINTHO 13

¹Sala ketolu waia a naga aga valoti punusi mu. Sara navasaana euga wo pei tea lawosokiana pae nawoka ni tea noa sokisoki dua kite dolu.

²A pea noa sala vea, go a pea noa ragi waia, dapala ragi waina a doko sikoti mu sala kerua, go ragi waia waina a puoli ki mu, a pea noa ki tea maga waina eu pea mari naleo sa, go ki tea p̃ota maga mamau puti, naga, a pe moro paloti, a pe wo da mari malemale mau;

³nalakena ku laaga navaivaiana sikai ki Kristo waina e doko au pasa; waina e da manainai paki mu mau, ma e kasua m̃aleoputo kakamu:

⁴nalakena e pei tea turiana nakau valadagoto m̃elu namanainaiana, ma e mauri m̃elu nakasuaana ki Sup̃e. Nalakena kinami ma au manainai doko asa, ma auga wo mauri sikoti a m̃elu nakasuaana ki Sup̃e paki mu.

⁵Kuga tum̃amu maridogo mu, ku doko nasaralomauana kite; kuga tum̃amu maridogoatae mu. Kite ku da dum̃amu atae mu mau, naga Yesu Kristo e doko mu? Ku pe ta pei tea maridogo‐dip̃adoa‐ana lomau mau e pe toko mu.

⁶Ma a leogoro naga kuga wo atae naga kinami au da pei tea maridogodip̃adoa‐ana mau.

⁷Ma au dapasavasa paki Sup̃e naga nimu kuga ta mari te naleo sa mau; e da pei naga kinami auga toko lina naga au pei tea maridogo‐piragi‐ana mau, ma naga nimu kuga mari tea waina e pei tea dodomadaganiana, go naga kinami auga tapala tea maridogodip̃adoa‐ana maga.

⁸Nalakena au da mari atae mari te navatuna dip̃a nalomauana mau, ma au do magi nalomauana mari a.

⁹Nalakena au laelaea, ragi waina kinami au manainai, go nimu ku kasua: go au do masau p̃arua ki tea waia, namarip̃ialua‐ki‐mu‐ana.

¹⁰Nalakena tea wanogoe a midiri tea maga waia ragi waina a puoli, naga ragi waina aga toko sikoti mu aga ta mari makalikali mau, pae naveinawotaana waina Nawota e dua au asa raki natavagiana, go e da raki narakaipakitano‐ana mau.

¹¹Tea p̃ota sikai, tai maga kuga laelaea. Kuga vei tea mariana kuga wia lua; kuga vei tea vakavakaleana; kuga midoaki tea sikai maau; kuga tam̃ate doko: go Sup̃e ni nadodomiana go ni natam̃ateana ega wo doko sikoti mu.

¹²Kuga tum̃amu pasadodomi mu ki natum̃iliana tautau sikai.

¹³Tea tautau maga mamau puti eu pasadodomi mu.

¹⁴Nasaup̃iaana ki Nawota Yesu Kristo, go nadodomiana ki Sup̃e, go nasaisaipeaniana ni Naatana Tapu, euga sikoti puti mu.