Read Nguna Togoa Etafe North PAKI TEA NI KORINTHO 6 Bible Online

PAKI TEA NI KORINTHO 6 - Nguna Togoa Etafe North bible

PAKI TEA NI KORINTHO 6

¹Ma au do p̃osiwosi sikoti a go au pasa paratiki mu naga kuga ta dape p̃alo ki nasaup̃iaana ki Sup̃e

²mau (nalakena e naga, Ragi ni nasaup̃iaana a dogo ko asa, Go naaleatia ni namautipauriana a silae ko asa: Kuga leo, ragi waia e pei ragi ni nasaup̃iaana; kuga leo, ragi waia e pei naaleatia ni namautipauriana).

³Doko da pitua ki te nalakena sikai ni natapilagonaana nalo ni te navatuna mau, naga nasuasuaana aginami ega ta pei tea vasadip̃aana mau; ma nalo ni sara naleo,

⁴dapala tea suasua maga ki Sup̃e, au do dum̃agami mari gami au doko lina; ki nasokiana warua, doko nariesokiana maga doko namarisogiana maga, doko nariesoki‐pulutiana maga,

⁵doko navaratiana maga, doko nasum̃a ni navavaigoroana maga, doko navariana maga, doko nawosi‐mawosaana maga, doko naleleogoroana maga, doko navaliana maga,

⁶ki natautauana, ki naataeana, ki naveimaritasoki‐parau‐ana, ki navakaleana, ki Naatana Tapu, ki nadodomiana waina e da pei nakalep̃oana mau, ki navasaana ni nalomauana, ki nakasuana ki Sup̃e;

⁷pae nalikau maga ni namarinaleoleanaana waina eu doko nap̃irikiagami ni matua go nap̃irikiagami ni mawiri,

⁸pae nasamasamaana go nadododaoana, pae navasasakiana go navasap̃iakiana; dapala tea vilasurue maga, go au pei tea noa lomau maga;

⁹dapala tea salup̃eana maga, go au pei tea ataem̃atakiana maga; dapala tea to mate maga, go kuga leo, au mauri doko; dapala tea varatiana maga, go au da pei tea maripunueana mau;

¹⁰dapala tea susue maga, ma au do laelaea sara ragi: dapala tea tika maga, ma au do mari tea laapa eu pei sogolapa; dapala tea ta peani te navatuna mau, go au pei talakea ni naleo maga mamau puti.

¹¹Nawokagami e dap̃olaga doko paki mu, tea ni Korintho maga, nap̃op̃ogami e pei tea mariana e p̃elewelea.

¹²Ku da pei tea riesokipulutiana gami mau, ma ku pei tea riesoki‐puluti‐ana namaritadodomiana animu maga.

¹³Ma namoridip̃aana ni tea sikai maau wanogoe (a pasa dapala a pasa ki natugu maga), nimu ma kuga vei tea mariana kuga welewelea.

¹⁴Kuga ta pei tea vilasaikiana nimu ma tea ta saralomau maga mau; nalakena namarinaleoleanaana go namarinaleotageleana ero peani p̃otae nasava? Kite namarama go namaligo ero saisai peani nasava?

¹⁵Go Kristo go Belial ero saisai ki nadaleoda noa nasava? Kite tea saralomau e peani seve matele sikoti tea waina e da sara lomau mau?

¹⁶Go nasum̃a tapu ki Sup̃e e peani seve nasuasuakiana sikoti nasup̃e maga? Nalakena nimu ku pei nasum̃a tapu ki Sup̃e mauri; dakiusi waina Sup̃e e naga, Aga wo doko ara, go aga wo surata ara, go aga wo pei Sup̃e adeada, go nara euga wo pei narei aginau.

¹⁷Nalakena tea wanogoe, Kuga m̃elu dua ki m̃aleoputo kakada umai, go kuga vei tea marimasalekiana, Yehovah e noa e, Go kuga ta kisidogo tea waina e da dautau mau; Go kinau aga wo piragi soki mu,

¹⁸Go aga wo manimu pei tamamu sikai, Go nimu kuga wo maginau pei natugu naanoai maga go natugu nagoroi maga, Yehovah Tea Kasua mau e noa e.