Read Nguna Togoa Etafe North PAKI TEA NE CALATIA 2 Bible Online

PAKI TEA NE CALATIA 2 - Nguna Togoa Etafe North bible

PAKI TEA NE CALATIA 2

¹Go edaku ki natau rualima sikai tamate pati a moro sake paki Yerusalem pano, kinami ma Barnaba, go a piragi Tito e sikoti au pano.

²Go a sake pae nanoapakasakiana pano; go a noa ki sai ra narogorogoana wia waina a dogorogo ki nia m̃aleoputo ni tea ni nalauna p̃ota maga, ma a noa panako e paki tea maga waina eu pei tea midoakip̃aruakiana, mase a pe to sava m̃oli, kite a pe sava m̃oli sua.

³Ma Tito waina e sikoti au, waina e pei tea ni Hellas, e da pei tea maridieana mau naga ega vei tea tovadaviviana:

⁴ma e dapala nogoe nalakena taigida sorosoro maga, tea viragi‐panako‐ana umai sili, waina eu sili panako umai naga euga leo pavaraka naveresigida‐ana waina tu peani a doko Kristo Yesu, naga euga mari gida tuga vei naviti maga:

⁵waina au da pa dua ki da ki natoko‐etano‐ana, aura sikai mau; naga nalomauana ni narogorogoana wia ega toko sikoti mu doko.

⁶Ma ki tea maga waina eu pei tea midoakip̃aruakiana naga eu pei te navatuna (dapala waina eu doko, e da mari a e panop̃ota paki nau mau: Sup̃e e da piragi narae ni te naatam̃oli mau), tea maga waina eu pei tea midoakip̃aruakiana eu da pasa piseiki nau te navatuna mau:

⁷ma e panop̃ota ki nia, ragi waina eu punusi naga a pei tea vavatuana ki narogorogoana wia paki tea maga waina eu da pei tea tovadaviviana mau, dapala waina Petero e pei tea vavatuana ki narogorogoana wia paki tea tovadaviviana

⁸maga (nalakena tea waina e magi Petero p̃osiwosi paki navei‐apostoloana paki tea tovadaviviana maga e maginau ma p̃osiwosi paki tea ni nalauna p̃ota maga);

⁹go ragi waina eu atae nasaup̃iaana waina e pei tea vituakiana paki nau, Yakobo go Kefa go Yoane, waina eu pei tea midoakip̃aruakiana naga eu pei tip̃a maga, eu dua gami ma Barnaba nam̃elearuda ni matua ni nasaisaipeaniana, naga kinami auga va punusi tea ni nalauna p̃ota maga, ma nara euga va punusi tea tovadaviviana maga;

¹⁰tea sikai maau eu masauna naga aroga midoa ki tea tika maga; waina a dum̃agu m̃arekareka naga aga mari tea wanogoe.

¹¹Ma ragi waina Kefa e umai paki Antiokia, a lawo dugoro e paki naraena, nalakena e pei tea tip̃akotoviana.

¹²Nalakena pea ki te naata seara eu m̃elu Yakobo umai, e ganikani sikoti tea ni nalauna p̃ota maga: ma ragi waina eu rumai, e dum̃ana sukasuka ki nia po dum̃ana marimasale ki nia, e matauki tea ni natovadaviviana maga.

¹³Go tea ni Yudea p̃ota maga ma eu mari pae nakalep̃oana sikoti a; dapala waina Barnaba ma e pei tea viragiluaana ki nakalep̃oana adeada.

¹⁴Ma ragi waina a punusi naga eu da surata leana pae nalomauana ni narogorogoana wia mau, a noa ki Kefa narae ni tea maga mamau puti, Nigo, waina ku pei tea ni Yudea, ku pe mauri pae nalauna p̃ota maga, go ku pe ta mauri pae Yudea mau, ekasana ku maridie tea ni nalauna p̃ota maga naga euga mauri pae Yudea?

¹⁵Nigida waina tu pei tea ni Yudea maga pae navakilinaana, go tu da pei tea mari naleo sa maga ni nalauna p̃ota maga mau,

¹⁶ma tu atae naga te naatam̃oli sikai e da pei tea marileanakiana ki nawosiana maga ni nawotaeana mau, ma e pae nasaralomauana doko Yesu Kristo nigida ma tu saralomau Kristo Yesu, naga tuga vei tea marileanakiana ki nasaralomauana doko Kristo, go tu da pei tea marileanakiana ki nawosiana maga ni nawotaeana mau; nalakena te nap̃okasi sikai ega wo da pei tea marileanakiana ki nawosiana maga ni nawotaeana mau.

¹⁷Ma ragi waina tu do laaga naga tuga vei tea marileanakiana doko Kristo, tu pe vei tea vap̃aiana naga nigida ma tu pei tea mari naleo sa maga, Kristo e pe vei tea suasua sikai ni namarinaleosaana kite? Ega ta dapala nogoe mau.

¹⁸Nalakena a pe moro davagi naleo maga waina a dakai ra, a pe tum̃agu mari au a pe toko lina naga a pei tea tapiri sikai.

¹⁹Nalakena kinau a pae nawotaeana mate paki nawotaeana, naga aga mauri paki Sup̃e.

²⁰A pei tea turiana nakau valadagoto sikoti Kristo; ma a mauri; e da moro pei kinau mau, ma Kristo e mauri doko au: go namauriana waina a mauri asa doko nap̃okasi ragi waia, a mauri asa doko nasaralomauana, waina e paki Sup̃e Natuna, waina e dodomi au, po maginau dum̃ana pitua ki nia oli au.

²¹A da mari nasaup̃iaana ki Sup̃e e pei tea p̃alo mau: nalakena namarinaleoleanaana e pe vae nawotaeana umai, nalakena tea wanogoe Kristo e pe mate m̃oli.